ທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວປະຈຳແລງວັນພະຫັດມື້ນີ້ ເຮົາຈະນຳເອົາການສຳພາດ ກັບ ນາງມາຍລາ ອະທິຕັງ ອາຍຸ 17 ປີ ນັກຮຽນມັດທະຍົມ ປີສຸດທ້າຍ ຢູ່ Kings Mountain High School ມາສະເໜີທ່ານ. ມາຍລາ ຈະຮຽນຈົບມັດທະຍົມໃນເດືອນມິຖຸນາ ປີ 2020 ຈະມາເຖິງນີ້ ແລະຈະໄປຮຽນຕໍ່ທີ່ມະຫາວິທະຍາໄລ. ນາງມາຍລາ ມີພອນສະຫວັນດ້ານການຂຽນນະວະນິຍາຍ ປື້ມຂອງນາງຊື່ວ່າ “Annalise” ຫົວທຳອິດ ໄດ້ພິມເຜີຍແຜ່ ໂດຍຂາຍຜ່ານ ບໍລິສັດ Amazon ແລະຢູ່ຕາມຮ້ານສັບພະສິນຄ້າ Walmart ທົ່ວສະຫະລັດ. ກິ່ງສະຫວັນ ຈະນຳເອົາການສຳພາດ ກັບມາຍລາ ມາສະເໜີທ່ານ ໃນອັນດັບຕໍ່ໄປ.
ນາງມາຍລາ ອະທິຕັງ ອາຍຸ 17 ປີ ແມ່ນນັກຂຽນນະວະນິຍາຍໜຸ່ມນ້ອຍອາເມຣິກັນເຊື້ອສາຍລາວ. ພໍ່ເປັນຄົນຫຼວງພະບາງ ແລະແມ່ເປັນຄົນວຽງຈັນ. ນາງມາຍລາ ເກີດຢູ່ໃນສະລັດ ປັດຈຸບັນນີ້ກຳລັງຮຽນຢູ່ມັດທະຍົມປີສຸດທ້າຍທີ່ Kings Mountain High School ເມືອງ Shelby ລັດຄາໂຣໄລນາເໜືອ ສະຫະລັດອາເມຣິກາ. ນາງມາຍລາ ເປັນນັກຂຽນນະວະນິຍາຍ ຫຼື fiction ນາງເປັນນັກຮຽນທີ່ຫ້າວຫັ້ນ ສະຫຼຽວສະຫຼາດ ວ່ອງໄວ ແລະໃຊ້ເວລາໃນແຕ່ລະວັນໃຫ້ເປັນປະໂຫຍດ. ນາງມາຍລາ ມັກອ່ານ ແລະມັກຂຽນມາແຕ່ນ້ອຍ ໂດຍທີ່ພໍ່ແມ່ບໍ່ໄດ້ລຳໄລບອກສອນນໍາການຮຽນຫຼາຍ ພຽງແຕ່ໃຫ້ຄວາມອົບອຸ່ນຊຸກຍູ້ ແລະເປັນກຳລັງໃຈໃຫ້ເທົ່ານັ້ນ.
ການອ່ານ ການຂຽນ ແລະການແຕ່ງກາບກອນ ແມ່ນຫລັກສູດການຮຽນດ້ານ ສິນລະປະ ແລະມະນຸດຊາດ ຫຼື Arts and Humanities ທີ່ສຳຄັນໃນລະບົບການສຶກສາຂອງສະຫະລັດ. ບັນດານັກຮຽນຫຼາຍໆຄົນຜູ້ມີພອນສະຫວັນໃນດ້ານການຂີດຂຽນມີໂອກາດສະແດງຄວາມສາມາດຂອງເຂົາເຈົ້າຜ່ານໜັງສືພິມຂອງໂຮງຮຽນ ທີ່ໄດ້ຊຸກຍູ້ໃຫ້ ນາງມາຍລາ ກ້າວເຂົ້າມາເປັນນັກປະພັນນະວະນິຍາຍ ແລະບັນນາທິການໜັງສືພິມຂອງໂຮງຮຽນ.
ປື້ມຂອງນາງມາຍລາ ຫົວທຳອິດນີ້ຊື່ວ່າ ອັນນາລິສ (Annalise) ຊຶ່ງແມ່ນຊື່ເດັກນ້ອຍແມ່ຍິງຄົນນຶ່ງ ເປັນໝູ່ຂອງທ້າວຄລາຍ (Clide) ອາຍຸ 8 ປີ ທີ່ເຄີຍໄດ້ໃຊ້ຊິວິດເດັກນ້ອນຫຼິ້ນນຳກັນ. ຕໍ່ມາທ້າວຄລາຍໄດ້ຍ້າຍໜີໄປຢູ່ແຫ່ງອື່ນກັບຄອບຄົວຂອງລາວເປັນເວລາ 20 ປີ ແລະທ້າວ ຄລາຍໄດ້ກັບຄືນມາຊອກຫາ ນາງອັນນາລິສ ນີ້ຍາຍເລື້ອງນີ້ເຕັມໄປດ້ວຍຄວາມລີ້ລັບ ແລະຜະຈົນໄພ ທີ່ເຮັດໃຫ້ຜູ້ອ່ານໄດ້ຮັບຄວາມມ່ວນຊື່ນ.
“Annalise” ກຳລັງວາງຈຳໜ່າຍຢູ່ອິນເຕີແນັດ Amazone ແລະຢູ່ຕາມຮ້ານສັບພະສິນຄ້າ Waltmart ຢູ່ທົ່ວສະຫະລັດອາເມຣິກາ ຊຶ່ງນາງມາຍລາ ໄດ້ ກ່າວເຖິງຄວາມເປັນມາເບື້ອງຕົ້ນສູ່ ວີໂອເອ ຟັງດັ່ງນີ້ :
“ນັບຕັ້ງແຕ່ຍັງເປັນເດັກນ້ອຍຢູ່ນັ້ນ ຂ້ານ້ອຍມັກຂຽນວາລະສານ ເວລາໃດມີເຈັ້ຍກັບສໍແລ້ວ ຂ້ານ້ອຍມັກຂຽນເລື້ອງຕ່າງໆ. ເວລາໃຫຍ່ມາໜ້ອຍນຶ່ງກໍໄດ້ເລີ້ມໄປຊື້ນິຕິຍະສານຢູ່ຮ້ານລາຄາຖືກໆ 1 ໂດລາ ມາອ່ານ ແລະຕໍ່ມາກໍໄດ້ຍ້າຍຂຶ້ນມາຂຽນໃສ່ຢູ່ໃນຄອມພິວເຕີ ແລະກ່ອນທີ່ຈະມີແນວຄິດຂຽນອອກມາໄດ້ ຂ້ານ້ອຍຕ້ອງອ່ານປື້ມກ່ອນ. ເວລາຂຽນ ຂ້ານ້ອຍມັກຂຽນນະວະນິຍາຍທີ່ບໍ່ມີຄວາມຈິງ ແລະບໍ່ມັກຂຽນເລື້ອງແທ້. ຕ້ອງຄິດສ້າງເລື້ອງຂຶ້ນມາເອງ ຕ້ອງຮູ້ຈັກໂຕປະກອບ ຮູ້ຈັກວ່າເລື້ອງເກີດຂຶ້ນ່ຢ່າງໃດ ແລະຈົບລົງຢ່າງໃດ. ເພາະສະນັ້ນໃນໄລຍະເວລາທີ່ຂ້ານ້ອຍຂຽນຢູ່ນັ້ນ ຈະຕ້ອງໄດ້ເອົາໂຕປະກອບອອກ ຫຼືຕື່ມໃສ່. ໂດຍສະເພາະເລື້ອງທີ່ໄດ້ພິມເຜີຍແຜ່ອອກໄປວ່າງກີ້ນີ້ ຂ້ານ້ອຍໄດ້ເລີ້ມຂຽນໃນເດືອນສິງຫາ ແລະເສັດສິ້ນລົງໃນເດືອນທັນວາ ປີ 2019. ໃນໄລຍະການຂຽນຢູ່ນັ້ນ ຂ້ານ້ອຍໄດ້ເອົາແຕ່ລະຂັ້ນຕອນໄປໃຫ້ ຜູ້ກວດອ່ານເບິ່ງກ່ອນເພື່ອດັດແປງທຸກຢ່າງທີ່ຈຳເປັນຈົນຮອດເດືອນມັງກອນ ຂ້ານ້ອຍຈຶ່ງສາມາດເຮັດໃຫ້ເຂົ້າຮູບເຂົ້າຮອຍ.”
ຫຼັງຈາກຂຽນແລ້ວຕ້ອງມີຜູ້່ອ່ານ ແລະກວດກາ. ຜູ້ກວດມີໜ້າທີ່ອ່ານທຸກໆຢ່າງເຊັ່ນ ການໃຊ້ໄວຍະກອນ ສະກົດຊື່ ໃສ່ຈຸດ ຈ້ຳເມັດໃຫ້ຖືກບ່ອນ ແລະອື່ນໆ ໃຫ້ເປັນທີ່ລະອຽດທີ່ສຸດ. ການພິມປື້ມຂາຍບໍ່ເປັນເລື້ອງງ່າຍ ຕ້ອງໄດ້ຜ່ານຂັ້ນຕອນຫຼາຍໆຢ່າງ ໂດຍສະເພາະຜ່ານການກວດກາຮັບຮູ້ຈາກບໍລິສັດພິມເຜີຍແຜ່ ເຖິງເນື້ອເລື້ອງ ແລະຄຸນສົມບັດຂອງຜູ້ຂຽນ ກ່ອນທີ່ຈະນຳອອກຂາຍຢູ່ຕາມຫ້າງຮ້ານ ແລະທາງອິນເຕີແນັດ. ຊຶ່ງນາງມາຍລາ ກ່າວເຖິງຕອນນີ້ວ່າ :
“ໃນໄລຍະຫ້າເດືອນ ຂ້ານ້ອຍຕ້ອງໄດ້ໃຊ້ເວລາມື້ນຶ່ງ ຢ່າງໜ້ອຍສອງສາມຊົ່ວໂມງ ບາງຄັ້ງກໍໄດ້ໃຊ້ເວລາຂຽນໝົດຄືນ ໃນຂະນະທີ່ມີອາລົມຂອງຄວາມໄຝ່ຝັນຢູ່ນັ້ນ ແລະຮີບຮ້ອນຢາກໃຫ້ແລ້ວ ບາງເທື່ອກໍບໍ່ໄດ້ນອນເລີຍ. ບາງຄັ້ງເວລາຂ້ານ້ອຍໄປຫຼິ້ນນຳໝູ່ ຫຼືຢູ່ແຫ່ງໃດແຫ່ງນຶ່ງ ແນວຄິດຈະໂຜ່ອອກມາ ເວລານັ້ນຂ້ານ້ອຍຕ້ອງໄດ້ຂຽນລົງໃສ່ບ່ອນໃດບ່ອນນຶ່ງໄວ້ກ່ອນ. ນອກຈາກນັ້ນອີກແລ້ວ ເວລາໃດຂ້ານ້ອຍເບິ່ງຄົນ ບາງຄັ້ງ ຂ້ານ້ອຍເຫັນນິໃສເຂົາເຈົ້າ ທີ່ຊ່ວຍເຮັດໃຫ້ມີແນວຄິດຂຽນເປັນໂຕປະກອບຢູ່ໃນນິຍາຍ.”
ຢູ່ໃນລະບົບການສຶກສາອາເມຣິກັນ ພວກນັກຮຽນຕ້ອງໄດ້ອ່ານ ຂຽນເພື່ອເຮັດ ວຽກຄົ້ນຄວ້າກ່ຽວກັບການຮຽນຂອງເຂົາເຈົ້າ ທີ່ກາຍມາເປັນນິໄສ ແລະປະເພນີການມັກອ່ານຂອງຊາວອາເມຣິກັນ. ເພາະສະນັ້ນຢູ່ຕາມບ້ານເຮືອນ ເຮົາຈະສັງເກດເຫັນປື້ມອ່ານຕ່າງໆລ່ຽນຢູ່ເຕັມຕູ້. ບັດນີ້ປື້ມຂອງນາງມາຍລາ ໄດ້ອອກມາສູ່ສາຍຕາຜູ້ອ່ານແລ້ວ ຊຶ່ງນາງມາຍລາ ກ່າວວ່າ:
“ປັດຈຸບັນນີ້ມີຍາດຕິພີ່ນ້ອງ ໝູ່ເພື່ອນ ຄູອາຈານ ຫົວໜ້າໂຮງຮຽນ ນາຍຄູສອນພາກສາອັງກິດເປັນສ່ວນໃຫຍ່ທີ່ພາກັນອ່ານ ແລະອີກສ່ວນນຶ່ງແມ່ນຄົນທົ່ວໆໄປ. ຂ້ານ້ອຍເປັນທີ່ຮູ້ກັນດີໃນໂຮງຮຽນວ່າເປັນນັກຂຽນ ເພາະວ່ານາຍຄູໄດ້ເຜີຍແຜ່ຢູ່ໃນໜ້າແວັບໄຊທາງອິນເຕີແນັດ ອິນສະຕາກຣາມ ທວິດເຕີ ແລະເຟສບຸກທີ່ແຜ່ຂະຫຍາຍອອກໄປ. ນອກນັ້ນຂ້ານ້ອຍຍັງເປັນຫົວໜ້າກວດກາປື້ມນັກຮຽນປະຈຳປີຂອງໂຮງຮຽນຢູ່ໃນຫ້ອງຮຽນເປັນນັກຂ່າວ. ເວລາຂະນ້ອຍເລີ້ມເຂົ້າຊັ້ນມັດທະຍົມ ຂ້ານ້ອຍໄດ້ຮຽນເປັນນັກຂ່າວ ແລະໄດ້ເລື່ອນຂຶ້ນມາເປັນຫົວໜ້າບັນນາທິການ. ຂ້ານ້ອຍຕ້ອງໄດ້ບໍລິຫານຄະນະນັກຮຽນທີ່ເຮັດວຽກນຳກັນ ທີ່ຜະລິດປື້ມປະຈຳປີຂອງນັກຮຽນ. ນອກນັ້ນຂ້ານ້ອຍຍັງເປັນສະມາຊິກຢູ່ໃນການຈັດຕັ້ງອື່ນໆຂອງສະມາຄົມນັກຮຽນອີກດ້ວຍ."
ພາສາອັງກິດ ແມ່ນພາສານຶ່ງທີ່ປາກເວົ້າ ໃຊ້ເປັນພາສາລາດຊະການຢູ່ທົ່ວໂລກ ແລະຮຽນຍາກ ໂດຍສະເພາະກ່ຽວກັບເລື້ອງຫລັກການຂຽນ. ນາງມາຍລາ ຊຶ່ງເປັນຄົນອາເມຣິກັນເຊື້ອສາຍລາວໄດ້ພິສູດໃຫ້ເຫັນວ່າເປັນຜູ້ມີພອນສະຫວັນກວ່າ ຫຼາຍຄົນທີ່ເກີດໃຫຍ່ຢູ່ໃນສະຫະລັດ.
