ສະມາຊິກສະພາສູງຈາກລັດແມັສຊາຈູແຊັສ ທ່ານນາງເອລີຊາເບັດ ວໍແຣັນ ໄດ້ຍຸຕິການແຂ່ງ
ຂັນເພື່ອໃຫ້ເປັນຜູ້ຖືກແຕ່ງຕັ້ງຈາກພັກເດໂມແຄຣັດໃນການເຂົ້າແຂ່ງຂັນເປັນປະທານາທິບໍດີ ໃນວັນພະຫັດວານນີ້ ຫຼັງຈາກໄດ້ເສຍໄຊຢູ່ທົ່ວທັງ 14 ລັດ ທີ່ມີການຈັດການເລືອກຕັ້ງເອົາຜູ້ຕ່າງໜ້າພັກໃນອາທິດນີ້ຊຶ່ງຮວມທັງການເປັນຜູ້ທີສາມຢ່າງໜ້າຜິດຫວັງຢ່າງໃຫຍ່ຢູ່ໃນລັດທີ່ເປັນບ້ານຂອງທ່ານນາງເອງ.
ທ່ານນາງວໍແຣັນ ກ່າວຕໍ່ບັນດາພະນັກງານໂຄສະນາຫາສຽງຂອງທ່ານນາງວ່າ “ພວກເຮົາບໍ່ໄດ້ບັນລຸເປົ້າໝາຍຂອງພວກເຮົາ ແຕ່ວ່າສິ່ງທີ່ພວກເຮົາໄດ້ເຮັດນຳກັນ ສິ່ງທີ່ພວກທ່ານໄດ້ເຮັດນັ້ນ ໄດ້ໃຫ້ເກີດຄວາມແຕກຕ່າງທີ່ຢັ້ງຍືນ. ມັນບໍ່ແມ່ນລະດັບຂອງຄວາມແຕກຕ່າງທີ່ພວກເຮົາຕ້ອງການຢ່າກເຮັດໃຫ້ເກີດ ແຕ່ມັນສຳຄັນ ແລະການປ່ຽນແປງນັ້ນ ຈະເປັນຄື້ນຟອງໃນຫຼາຍໆປີຕໍ່ໜ້ານີ້.”
ທ່ານນາງວໍແຣັນ, ອະດີດອາຈານສອນກົດໝາຍຢູ່ມະຫາວິທະຍາໄລຮາວາດ ກ່າວຕໍ່ບັນດານັກຂ່າວຢູ່ນອກບ້ານພັກຂອງທ່ານນາງໃນເມືອງແຄມບຣີສຈ໌ ລັດແມັສຊາຈູແຊັສ ວ່າທ່ານນາງຈະບໍ່ສະເໜີໃຫ້ການຮັບຮອງໂດຍທັນທີ່ແກ່ຜູ້ນຳໜ້າໝູ່ທ່ານໃດເລີຍ ໃນການແຂ່ງຂັນ ລະຫວ່າງອະດີດຮອງປະທານາທິບໍດີສອງສະໄໝ ທ່ານໂຈ ໄບເດັນ ຫຼື ອີກຜູ້ນຶ່ງທີ່ເປັນພັນທະມິດທາງການເມືອງຂອງທ່ານນາງ ຄືສະມາຊິກສະພາສູງ ລັດເວີມັນທ໌, ທ່ານເບີນີ ແນຊເດີສ໌ ທີ່ປະກາດຕົນເອງວ່າເປັນສັງຄົມນິຍົມເດໂມແຄຣັດນັ້ນ. ທ່ານນາງໄດ້ໂອ້ລົມກັບເຂົາເຈົ້າເປັນການຕ່າງຫາກໃນວັນພຸດທີ່ຜ່ານມາ.
ທ່ານນາງກ່າວວ່າ “ພວກເຮົາຈະໃຊ້ເວລາອີກໜ້ອຍນຶ່ງເພື່ອຄິດພິຈະລະນາ” ກ່ຽວກັບການສະເໜີດັ່ງກ່າວ.
ສຳລັບສອງຄົນທີ່ເປັນຜູ້ສະໝັກເທື່ອນຶ່ງຄື ສະມາຊິກສະພາສູງຈາກລັດມິນເນໂຊຕາ ທ່ານນາງເອມີ ໂຄລບູຈາ ແລະອະດີດເຈົ້າເມືອງຊ້າວເບັນ ລັດອິນເດຍນາ, ທ່ານພີດ ບູຕິເຈຈ ໄດ້ສະເໜີການຮັບຮອງໃຫ້ທ່ານໄບເດັນ ໃນຂະນະທີ່ເຂົາເຈົ້າລາອອກຈາກການແຂ່ງຂັນ ກ່ອນວັນເລືອກຕັ້ງລົງຄະແນນສຽງ ວັນອັງຄານພິເສດ ເກືອບເປັນທີ່ແນ່ນອນວ່າ ໄດ້ຊຸກຍູ້ຄວາມໂຊກດີໃຫ້ແກ່ທ່ານໄບເດັນ ໄປສູ່ການຄວ້າເອົາໄຊຊະນະ 10 ລັດ ໃນທັງໝົດ 14 ລັດ ທີ່ຈັດການເລືອກຕັ້ງໃນອາທິດນີ້ ເມື່ອສີ່ລັດແມ່ນຕົກເປັນຂອງທ່ານແຊນເດີສ໌.
ໃນຂະນທີ່ຂ່າວຂອງທ່ານນາງວາຣັນໄດ້ສີ້ນສຸດການສະໝັກຂອງທ່ານນາງປາກົດໂຕອອກມາ ປະທານາທິບໍດີສະຫະລັດ ທ່ານດໍໂນລ ທຣຳ ສັງກັດພັກຣີພັບບລິກັນ ກ່າວວ່າ ການຕັດສິນໃຈຂອງທ່ານນາງເກີດຂຶ້ນ “ສາມມື້ຊ້າເກີນໄປ” ໂດຍກ່າວອ້າງວ່າໄດ້ເຮັດໃຫ້ໄຊຊະນະຂອງທ່ານແຊນເດີສ໌ເສຍຫາຍຢູ່ໃນຢ່າງໜ້ອຍສາມລັດຢູ່ໃນການລົງຄະແນນສຽງໃນ ວັນອັງຄານພິເສດ ແລະ “ອາດເຮັດໃຫ້ທ່ານເສຍການແຕ່ງຕັ້ງເປັນຜູ້ຕາງໜ້າພັກກໍເປັນໄດ້."