ອິນໂດເນເຊຍ ໄດ້ດໍາເນີນການຈັບກຸມອະດີດເຈົ້າເມືອງຄົນນຶ່ງທີ່ໄດ້ຫຼົບໜີ ຈາກ ຟີລິບປິນ ທີ່ຖືກກ່າວຫາວ່າ ມີການພົວພັນກັບກຸ່ມກໍ່ອາຊະຍາກຳຂອງ ຈີນ ແລະທໍາການຟອກເງິນໃນຈໍານວນຫຼາຍກວ່າ 1.8 ລ້ານໂດລາ.
ນາງ ອາລິສ ກູໂອ (Alice Guo), ຍັງເປັນທີ່ຮູ້ກັນໃນນາມສັນຊາດຈີນ ກູໂອ ຮົວ ປິງ (Guo Hua Ping), ເຊິ່ງເປັນທີ່ຕ້ອງການໂດຍສະພາສູງຟີລິບປີນສໍາລັບສິ່ງທີ່ເບິ່ງຄືວ່າ ຜູ້ກ່ຽວປະຕິເສດທີ່ຈະບໍ່ປາກົດໂຕຕໍ່ການສືບສວນສອບສວນຂອງລັດຖະສະພາ ກ່ຽວກັບການພົວພັນກັບອາຊະຍາກໍາ.
ນາງ ກູໂອ, ຜູ້ທີ່ຖືກກ່າວວ່າ ນາງເປັນພົນລະເມືອງຟີລິບປິນໂດຍກໍາເນີດ, ໄດ້ອອກມາປະຕິເສດຕໍ່ຂໍ້ກ່າວຫາ ໂດຍຮ້ອງສິ່ງນີ້ວ່າ “ເປັນການກະທໍາທີ່ປອງຮ້າຍ.”
ກະຊວງຍຸຕິທໍາຂອງຟີລິບປິນ ກ່າວຢູ່ໃນຖະແຫຼງການສະບັບນຶ່ງວ່າ “ຄູ່ຮ່ວມພາຄີດ້ານຄົນເຂົ້າເມືອງຂອງພວກເຮົາໄດ້ອອກມາຢືນຢັນວ່າ ປັດຈຸບັນ ນາງ ກູໂອ ກໍາລັງຢູ່ພາຍໃຕ້ການຄຸ້ມຄອງຂອງເຈົ້າໜ້າທີ່ຕຳຫຼວດອິນໂດເນເຊຍ.”
ກໍລະນີດັ່ງກ່າວ ມີຂຶ້ນໃນຊ່ວງເວລາທີ່ ຟີລິບປິນ ມີຄວາມສົງໄສເພີ້ມຂຶ້ນກ່ຽວກັບກິດຈະກໍາຕ່າງໆຂອງ ຈີນ, ທ່າມກາງຄວາມເຄັ່ງຕຶງທີ່ກໍາລັງເພີ້ມຂຶ້ນໃນບັນຫາຂັດແຍ້ງ ກ່ຽວກັບການອ້າງສິດຂອງທັງສອງປະເທດ ເທິງເສັ້ນທາງນໍ້າທີ່ຂະຫຍາຍໂຕຢູ່ບໍລິເວນຂົງເຂດທະເລຈີນໃຕ້.
ນາງ ກູໂອ ຖືກຈັບກຸມໃນຕອນເຊົ້າວັນພຸດມື້ນີ້ ຢູ່ບໍລິເວນເມືອງ ຕັງເກີຣັງ (Tangerang) ໃນນະຄອນຫຼວງຈາກາຕາຂອງອິນໂດເນເຊຍ, ອີງຕາມສຳນັກງານກວດຄົນເຂົ້າເມືອງຂອງນະຄອນຫຼວງມະນີລາ ແລະຄະນະກຳມະການຕ້ານອາດຊະຍາກຳ ກ່າວໃນຖະແຫຼງການແຍກກັນ.
ປະທານາທິບໍດີຟີລິບປິນ ທ່ານ ເຟີດີນານ ມາໂກສ ຈູເນ່ຍ ກ່າວເຕືອນວ່າ
ຄວາມພະຍາຍາມທີ່ຈະໜີຄວາມຍຸຕິທໍາ ພິສູດໃຫ້ເຫັນວ່າ ບໍ່ມີຜົນປະໂຫຍດ. “ມືຂອງກົດໝາຍແມ່ນມີຄວາມຍາວ ແລະມັນກໍຈະຍື້ໄປເຖິງເຈົ້າໄດ້.”
ທ່ານກ່າວຕື່ມ ຢູ່ໃນຖະແຫຼງການວ່າ “ການຮ່ວມມືກັນຢ່າງໃກ້ຊິດລະຫວ່າງສອງລັດຖະບານຂອງພວກເຮົາ ໄດ້ເຮັດໃຫ້ມີການຈັບກຸມໃນຄັ້ງນີ້ ເປັນໄປໄດ້, ພວກເຮົາກໍາລັງຢູ່ໃນຂັ້ນຕອນສຸດທ້າຍຂອງການສະຫຼຸບເພື່ອຈັດການສໍາລັບສົ່ງ ນາງ ອາລິສ ກູໂອ ກັບຄືນໃນເວລາໃດນຶ່ງຂອງມື້ນີ້.”
ຟໍຣັມສະແດງຄວາມຄິດເຫັນ