ປະຊາຊົນທີ່ອາໄສຢູ່ນະຄອນຫຼວງ ມະນິລາ ແນມເບິ່ງຖະໜົນຫົນ ທາງຖືກ “ມ້ຽນກວາດ” ໃນຂະນະທີ່ບັນດາເຈົ້າໜ້າທີ່ກະກຽມຄວາມ ປອດໄພກ່ອນກອງ ປະຊຸມສຸດຍອດຂອງບັນດາຜູ້ນຳການຮ່ວມມື ດ້ານເສດຖະກິດ ເອເຊປາຊີຟິກ ທີ່ຈະຈັດຂຶ້ນໃນສັບປະດານີ້. ທີ່ ສວນສາທາລະນະຕາມອ່າວ ມະນິລາ ແລະ ພຽງສອງສາມຊ່ວງຕຶກ ຈາກສະຖານທີ່ຈັດກອງປະຊຸມ, ທ່ານ Cesar Maglaya ບໍ່ໄດ້ຕຶກ ປາດັ່ງກັບທີ່ລາວເຄີຍຕຶກມາເປັນເວລາ 18 ປີທີ່ຜ່ານມາ. ທ່ານໄດ້ ກ່າວວ່າ ຕຳຫຼວດໄດ້ສັ່ງໃຫ້ ທຸກໆຄົນຜູ້ທີ່ຕຶກປາຢູ່ອ່າວວ່າພວກເຂົາ ເຈົ້າມີ ເວລາຮອດ 6 ໂມງແລງຂອງວັນອາທິດວານນີ້ ເພື່ອຍ້າຍ ໜີອອກຈາກ ພື້ນທີ່ດັ່ງກ່າວ.
ທ່ານ Maglaya ໄດ້ກ່າວວ່າ “ມັນເປັນການເຈັບປວດຍ້ອນວ່າມັນຈະດົນເຖິງໜຶ່ງສັບປະດາ. ລັດຖະບານຄວນເປັນຫ່ວງວ່າ ພວກຕຶກເບັດຫາເຊົ້າກິນຄໍ່າຈະບໍ່ມີວຽກເຮັດຕັ້ງໜຶ່ງສັບປະ ດາ.”
ແຕ່ທ່ານ Maglaya ກ່າວວ່າພາກສ່ວນນີ້ຂອງອ່າວແມ່ນເບິ່ງ “ງາມ ແລະ ສະອາດດີ” ໂດຍ ປາສະຈາກພວກຕຶກເບັດວົນວຽນໄປມາ. ໝູ່ຂອງລາວ, ເປັນນັກຄ້າຂາຍຕາມຖະໜົນ ເຊິ່ງເປັນ ຜູ້ທີ່ຖືກສັ່ງໃຫ້ຍ້າຍອອກເຊັ່ນກັນ ລາວໄດ້ກ່າວວ່າ ພວກເຮົາດີໃຈທີ່ຈະໄດ້ພັກຜ່ອນສອງສາມ ມື້. ຜູ້ຊາຍທັງສອງໄດ້ກ່າວວ່າ ພວກເຂົາເຈົ້າຄົງຈະບໍ່ໄດ້ຢຸດພັກ ດົນໄປກວ່າໜຶ່ງສັບປະດາ ດອກ. ໃນ 4 ວັນຂ້າງໜ້ານີ້ນະຄອນຫຼວງ ມະນິລາ ກໍຈະໄດ້ຕ້ອນຮັບບັນດາຫົວໜ້າທຸລະກິດ ຫຼາຍຮ້ອຍຄົນ ແລະ ຜູ້ນຳເສດຖະກິດ 21 ຄົນຕາມພາກພື້ນ ເອເຊຍ-ປາຊີຟິກ ລວມທັງຜູ້ນຳ ຈາກ 17 ປະເທດຈາກ ສະຫະລັດ, ຈີນ ແລະ ອອສເຕຣເລຍ ຜູ້ທີ່ຈະເຂົ້າຮ່ວມໃນກອງປະຊຸມ ສຸດຍອດ.
ຖະແຫຼງການສະບັບໜຶ່ງໄດ້ຖືກເປີດເຜີຍໃນວັນຈັນມື້ນີ້ຈາກອົງການສິ້ງຊອມ ສິດທິມະນຸດທີ່ມີ ຫ້ອງການຕັ້ງຢູ່ນະຄອນ ນິວຢອກ ໄດ້ກ່າວວ່າຄົນບໍ່ມີທີ່ຢູ່ ອາໄສໃນເຂດລົດໄຟໃຕ້ດິນຂອງ ນະຄອນຫຼວງ ມະນິລາ ແມ່ນໄດ້ຖືກລ້ອມຈັບ ແລະ ສົ່ງໄປທີ່ພັກຂອງຄົນບໍ່ມີທີ່ຢູ່ອາໄສຫຼາຍມື້ ຍ້ອນກອງປະຊຸມທີ່ຈະເກີດຂຶ້ນໃນສັບປະດານີ້. ກຸ່ມສະໜັບສະໜູນສິດທິມະນຸດສາກົນກ່າວ ວ່າເດັກນ້ອຍບໍ່ມີທີ່ຢູ່ອາໄສ 140 ຄົນໄດ້ຖືກຈັບກຸມ ແລະ ປະຊາຊົນໄດ້ຕຳໜິວ່າເປັນການປະຕິ ບັດຕໍ່ທີ່ບໍ່ດີ ແລະ ບັງຄັບໃຫ້ໜີອອກຈາກສະຖານທີ່ດັ່ງກ່າວ.
