ທີມເຕະບານ ‘ແມນເຊັສເຕີ ຢູໄນເຕັດ’ ໄດ້ເຊີນນັກເຕະເຍົາວະຊົນຈາກ ອິນເດຍ, ເນປານ ແລະສະຫະລັດ ອາຣັບເອເມີເຣສ ທັງໝົດ 6 ຄົນຈາກ ກຸ່ມທຳອິດ, ໂດຍເລີ່ມຈາກ 15,000 ຄົນ ໄປທີ່ສະໜາມ ໂອລທຣາຝອດ ໃນອາທິດແລ້ວນີ້ ອີງຕາມອົງການຂ່າວຣອຍເຕີສ.
ນັກເຕະບານເຍົາວະຊົນທັງ 6 ຄົນ ຈະໄດ້ມາຝຶກຫັດທັກຊະກັບຄູຝຶກ ຫຼື ໂຄດຈ໌ຂອງ ທີມຜີສາດແດງ ເຊິ່ງເປັນສ່ວນນຶ່ງຂອງໂຄງການທີ່ເອີ້ນວ່າ “ຢູໄນເຕັດ ວີ ເພລ” (United We Play) ເຊິ່ງມີຈຸດປະສົງສ້າງສັກກະຍະ ພາບ ໃຫ້ກັບນັກເຕະຈາກຊຸມຊົນທີ່ຍັງບໍ່ໄດ້ມີຜູ້ຫຼິ້ນໃນລະດັບໂລກຫຼາຍ.
ທ່ານ ນິກ ຄອກສ໌ ຜູ້ອຳນວຍການໂຄງການອາຄາເດມີ ເພື່ອສົ່ງເສີມທັກຊະຄົນ ລຸ້ນໃໝ່ຂອງທີມກ່າວວ່າ “ຂ້ອຍເປັນຄົນທີ່ເຊື່ອຢ່າງຍິ່ງວ່າ ໂອກາດຄືສິ່ງສຳຄັນທີ່ ສຸດຂອງການພັດທະນາຄວາມສາມາດ.” ທ່ານກ່າວອີກວ່າ “ຂ້ອຍຫວັງວ່າ ໂຄງການນີ້ ຈະຊ່ອຍເປັນແຮງບັນດານໃຈໃຫ້ກັບຄົນລຸ້ນໃໝ່. ຂ້ອຍຄຶດວ່າ ມັນສຳຄັນຫຼາຍທີ່ຄົນຮູ້ວ່າການເຮັດສິ່ງທີ່ພວກເຂົາພະຍາຍາມເຮັດຢູ່ໃຫ້ສຳເລັດ ເປັນເລື້ອງເປັນໄປໄດ້ ແລະເຮັດໄດ້ແທ້.”
ອະດີດນັກເຕະແມນແຊສເຕີ ຢູໄນເຕັດ ຫລຸຍສ໌ ຊາຮາ ໄດ້ເລີ້ມເປີດການ ເຝິກຊ້ອມຂອງໂຄງການນີ້ ໃນປີທີ 4 ເມື່ອປີກາຍນີ້ ທີ່ເມືອງ ໂຄລກາຕາ ຂອງອິນເດຍ.
ອະດີດກັບຕັນທີມ ແກຣີ ເນວີລ ຮັບໜ້າທີ່ເບິ່ງແຍງການແຂ່ງຂັນຮອບສຸດທ້າຍ ເຊິ່ງໃນທີ່ສຸດ ມີຜູ້ຖືກຄັດເລືອກເຂົ້າຮອບ 6 ຄົນ ເມື່ອເດືອນຕຸລາທີ່ຜ່ານມາ ຢູ່ເມືອງຈັນດີກາຣ ຂອງອິນເດຍເຊັ່ນກັນ.
ສື່ມວນຊົນຂອງໄທ “ເດີສະແຕນດາດ” ລາຍງານເມື່ອເດືອນຕຸລາ ວ່າ ນັກເຕະເຍົາວະຊົນໄທ ທ້າວ ຊີລວາ ເມັກເຊສ ລູກຊອດໄທແລະ ເວລສ໌ ຄືຜູ້ເຂົ້າຮ່ວມໂຄງການນີ້ ຈາກໄທ.
“ເດີສະແຕນດາດ” ລະບຸວ່າ ທ້າວ ເມັກເຊສ ອາຍຸ 14 ປີ ເປັນລູກຊອດໄທ ແລະເວລສ໌ ຫຼິ້ນໃນຕຳແໜ່ງກອງໜ້າ ແມ່ຂອງລາວຊື່ ທິຟຟານີ ທາຍເລີ ເປັນລູກຊອດໄທແລະອັງກິດ.
ສ່ວນພໍ່ຂອງລາວ ຄື ໂຣເບີດ ເອີນຊອລວ໌ ອະດີດກອງໜ້າທີມຊາດເວລສ໌ ໂດຍເຄີຍຕິດທີມໃນອັງກິດ ເຊັ່ນ ເວສບຣອມວິຊ ອັລບຽນ, ນ໊ອດຕິງແຮມ ຟໍເຣສ, ນໍຣິຊ ຊີຕີ້ ເປັນຕົ້ນ.
ທ້າວ ຈອນ ໂອເຊຍ ອະດີດກອງຫລັງຂອງທີຜີສາດແດງ ກ່າວວ່າ “ມັນເປັນ ໂອກາດທີ່ສຸດຍອດຫຼາຍ ສຳລັບເດັກນ້ອຍເຫຼົ່ານີ້.”
ທ້າວ ໂອເຊຍ ໄດ້ຊ່ອຍເຝິກຊ້ອມເຍົາວະຊົນເຫຼົ່ານີ້ ໃຫ້ສາມາດສະແດງຝີມື ແລະຄວາມວ່ອງໄວທ່າມກາງສາຍຝົນ ໂດຍທ້າວ ໂອເຊຍ ກ່າວວ່າ “ການທີ່ ໄດ້ເຫັນທີມຂອງພວກເຂົາເຝິກກາຍໃຕ້ຄວາມຍາກລຳບາກ ຈະຊ່ອຍສ້າງຄວາມ ແຂງແກ່ນ ແລະຄຸນນະພາບການຫຼິ້ນໃນລີກອາຊີບ.”
ນອກຈາກນັກເຕະລຸ້ນເຍົາວະຊົນແລ້ວ ໂຄດຈ໌ໃນອິນເດຍກວ່າ 100 ຄົນ ຍັງໄດ້ເຂົ້າຮ່ວມໃນໂຄງການນີ້ດ້ວຍ.
ເມື່ອ 14 ປີກ່ອນ ນັກເຕະ ສະນິລ ເຊີຕຣິ ຊາວອິດເດຍ ໄດ້ເຊັນຍາກັບທີມ ແຄນຊັສ ຊີຕີ້ ວິຊາຣ໌ຕ, ເຊິ່ງຢູ່ໃນເມເຈີລີກ ແຕ່ບໍ່ໄດ້ຫຼິ້ນໃຫ້ກັບທີມຊຸດທຳອິດ. ສ່ວນເພື່ອນຮ່ວມຊາດ ຕຳແໜ່ງຜູ້ຮັກສາປະຕູ ທ້າວ ເກີພຣີຕ ຊິງ ສານດູ ໄດ້ຮ່ວມທີມ ສຕາເບດ ຂອງນໍເວ ເປັນເວລາ 3 ປີ ກັບເມື່ອປີກາຍນີ້ ສະຫະພັນ All India Football Federation ໄດ້ເລີ້ມໂຄງການ ‘ວິຊັ້ນ 2045’ ທີ່ຕ້ອງການໃຫ້ອິນເດຍ ຕິດອັນດັບຕົ້ນໆໃນວົງການເຕະບານຂອງ ເອເຊຍ ແລະຕັ້ງເປົ້າໝາຍວ່າ ຈະສາມາດສ້າງດາວເດັ່ນລະດັບໂລກຢ່າງໜ້ອຍ ນຶ່ງຄົນ ສຳລັບການແຂ່ງຂອງທັງຊາຍແລະຍິງ ພາຍໃນປີ 2047.
ເຖິງແມ່ນວ່າ ກິລາຄຣິກເກັດ ຈະເປັນທີນິຍົມຫຼາຍກວ່າເຕະບານໃນອິນເດຍກໍຕາມ, ແຕ່ທີ່ການແຂ່ງເຕະບານປະຈຳປີໃນເມືອງ ໂຄລກາຕາ ກໍມີແຟນໆຫຼາຍ ເຖິງ 100,000 ຄົນມາຊົມການແຂ່ງຂັນລະຫວ່າງທີມ ອີສແບງກອລ ແລະ ມູຮັນ ບາກັນ ໂດຍລາຍການນີ້ມີມາຍາວນານ 100 ປີແລ້ວ.
ຟໍຣັມສະແດງຄວາມຄິດເຫັນ