ພວກທະຫານໃນປະເທດມາລີ ໄດ້ຈັບກຸມນັກການເມືອງທີ່ມີຊື່ສຽງຢ່າງ ໜ້ອຍເຈັດຄົນ ຊຶ່ງກໍ່ໃຫ້ເກີດຄວາມສົງໄສຂື້ນມາ ກ່ຽວຄໍາໝັ້ນສັນຍາຂອງ ພວກຜູ້ນໍາລັດຖະປະຫານ ທີ່ວ່າຈະໂອນອໍານາດຄືນໃຫ້ຝ່າຍພົນລະເຮືອນນັ້ນ. ພວກເຫັນເຫດການ ແລະພວກຜູ້ຊ່ວຍນັກການເມືອງກ່າວວ່າ ການຈັບກຸມດັ່ງກ່າວແມ່ນເກີດຂື້ນຢູ່ໃນເມືອງຫລວງ Bamako ໃນຕອນແລງຂອງມື້ວັນຈັນ ແລະຕອນເຊົ້າຂອງວັນອັງຄານວານນີ້.
ງຂ່າວທີ່ໃກ້ຊິດກັບບັນດານັກການເມືອງທີ່ຖືກຈັບ ບອກວີໂອເອວ່າ ອະດີດນາຍົກລັດຖະມົນຕີ Soumaila Cisse ກໍເປັນຜູ້ນຶ່ງລວມຢູ່ໃນພວກຖືກຈັບນັ້ນ. ທ່ານ Cisse ເປັນຜູ້ມີຄະແນນນໍາໜ້າໃນການຢັ່ງສຽງເລືອກຕັ້ງປະທານາທິບໍດີ ທີ່ໄດ້ກໍານົດໃສ່ວັນທີ່ 29 ເດືອນເມສານີ້ກ່ອນ ຝ່າຍທະຫານຍຶດເອົາອໍານາດ.
ອີກຕາມແຫລ່ງຂ່າວແລ້ວ ພວກທີ່ຖືກຈັບຄົນອື່ນໆອີກກໍມີໂຮມທັງອະດີດນາຍົກລັດຖະມົນຕີ Modibo Sidibe ອະດີດລັດຖະມົນຕີກະຊວງພາຍ ໃນ Kone Kafougouna ແລະ ອະດີດລັດຖະມົນຕີກະຊວງປ້ອງກັນ ປະເທດ Sadio Gassama.
ບໍ່ມີການຖະແຫຼງໃດໆຈາກພວກຜູ້ນໍາຝ່າຍທະຫານ ກ່ຽວກັບເຫດຜົນຂອງການຈັບກຸມຄັ້ງນີ້.
ພວກຜູ້ນໍາລັດຖະປະຫານໄດ້ຕົກລົງ ເມື່ອຕົ້ນເດືອນນີ້ ພາຍໃຕ້ຄວາມກົດດັນຂອງນາໆຊາດ ທີ່ຈະນໍາເອົາການປົກຄອງຂອງພົນລະເຮືອນກັບຄືນມາ ແລະອະນຸຍາດໃຫ້ ລັດຖະບານໄລຍະຂ້າມຜ່ານ ເປັນຜູ້ຈັດການເລືອກຕັ້ງຄັ້ງໃໝ່.
ສື່ມວນຊົນຂອງທາງການມາລີ ໄດ້ປະກາດເມື່ອວັນອັງຄານວານນີ້ວ່າທ່ານ Cheik Modibo Diarra ໄດ້ຖືກແຕ່ງຕັ້ງ ໃຫ້ເປັນນາຍົກລັດຖະມົນຕີຊົ່ວ ຄາວ. ທ່ານ Diarra ນັກວິສະວະກອນອະວະກາດແລະເຄຶ່ອງຈັກກົນທີ່ສໍາເລັດການສຶກສາຈາກສະຫະລັດ ໄດ້ສະມັກເຂົ້າແຂ່ງຂັນໃນການເລືອກຕັ້ງປະທານາທິບໍດີ ໃນວັນທີ 29 ເດືອນເມສານີ້.
