ລິ້ງ ສຳຫລັບເຂົ້າຫາ

ຝຣັ່ງສືບຕໍ່ໂຈມຕີ ກຸ່ມຫົວຮຸນແຮງອີສລາມ ໃນປະເທດມາລີ


ນັກບິນເຮືອບິນລົບຝຣັ່ງ ກຽມຂຶ້ນບິນ ຈາກຄ້າຍທະຫານ ຢູ່ນະຄອນຫລວງ N'Djamena ຂອງປະເທດ Chad ເພື່ອໄປທໍາການໂຈມຕີ ທາງອາກາດ ຕໍ່ຕ້ານພວກມຸສລິມ ຫົວຮຸນແຮງ ທີ່ປະເທດມາລີ, ວັນທີ 11 ມັງກອນ 2013.
​ຄາດ​ວ່າ ກໍາລັງ​ທະຫານ​ຈາກ​ປະ​ເທດເພື່ອນ​ບ້ານ​ຂອງ​ປະ​ເທດ​ມາລີ ​ຈະ​ໄປ ເຖິງ​ມາລີ​ໃນ​ວັນ​ອາທິດ​ມື້​ນີ້ ​ເພື່ອ​ຊ່ວ​ຍຝຣັ່ງສູ້​ລົບ​ກັບ​ພວກ​ຫົວ​ຮຸນ​ແຮງ​ອີສລາມ​ເປັນ​ມື້​ທີ່​ສາມ ​ເພື່ອ​ຕ້ານ​ຢັນ​ພວກ​ຫົວ​ຮຸນ​ແຮງ​ອີສລາມ​ໃຫ້​ລ່າ​ຖອຍ​ໄປ ​ຢູ່​ໃນ​ພາກ​ເໜືອ​ຂອງ​ມາລີ.

ປະ​ເທດ Niger, Burkina Faso ​ແລະ Senegal ຕ່າງ​ກໍ​ຮັບ​ປາກເມື່ອ ວັນ​ເສົາ​ວານ​ນີ້​ວ່າ​ ຈະ​ສົ່ງ​ທະຫານ​ໄປ​ຊ່ວຍ ມື້​ນຶ່ງຫຼັງຈາກ​ຝຣັ່ງ​ເລີ່​ມທໍາ​ການ ​ໂຈມ​ຕີ​ທາງ​ອາກາດ​ຕໍ່ຕ້ານ​ພວກ​ຫົວ​ຮຸນ​ແຮງ.

ທາງ​ການ​ຝຣັ່ງ​ເວົ້າເມື່ອ​ວັນ​ເສົາ​ວານ​ນີ້​ວ່າ ກໍາລັງ​ທະຫານ​ຂອງຝຣັ່ງ ​ໄດ້​ຜັກ​ດັນ​ກຸ່ມ​ກະບົດ​ຈາກ​ເມືອງ Konna ດ້ວຍ​ການ​ໂຈມ​ຕີ​ທາງ​ອາກາດ ​ແລະ​ກໍາລັງ​ພາກ​ພື້ນ​ດິນ. ພວກ​ກຸ່ມ​ຫົວ​ຮຸນ​ແຮງ​ໄດ້ເຂົ້າຍຶດເອົາເມືອງ Bamako ທາງ​ກໍ້າຕາ​ເວັນ​ອອກສຽງ​ເໜືອ​ຂອງ​ເມືອງ ຫຼວງ​ ​ເມື່ອ​ບໍ່​ດົນ​ມານີ້ ຊຶ່ງ​ເຮັດ​ໃຫ້​ພວກ​ເຂົາ​ຢູ່​ໃນ​ທ່າ ທີ່ສາມາດຍຶດ​ເອົາ​ເມືອງ Mopti ທີ່ຢູ່ໃກ້​ກັນ​ນັ້ນ​ໄດ້ ຊຶ່ງ​ເປັນ​ເຂດ​ເມືອງ​ເໜືອ​ສຸດ ທີ່​ຍັງ​ຢູ່ພາຍ​ໃຕ້​ການ​ຄວບ​ຄຸມ​ຂອງ​ລັດຖະບານ.

ນັກ​ຂ່າວ​ຄົນ​ນຶ່ງ​ຢູ່​ປະ​ເທດ​ມາລີ ບອກ​ວີ​ໂອ​ເອ ຜະ​ແນ​ກພາສາ​ຝຣັ່ງໄປ​ຍັງ ອາ​ຟຣິກາ ວ່າ ພວກ​ນັກ​ຕໍ່ສູ້​ຊາວ​ອີ​ສລາມຫຼາຍສິບ​ຄົນ​ຖືກຂ້າ​ຕາຍ​ໃນ​ການ​ປະຕິບັດ​ການ​ສູ້​ລົບ​ທີ່​ເມືອງ Konna. ນັກ​ຂ່າວ​ຍັງ​ເວົ້າ​ອີກ​ວ່າ​ກອງທັບ ມາລີ ຍຶດ​ເມືອງ​ນັ້ນ​ຄືນ​ໄດ້​ເມື່ອຕອນ​ແລງ​ວັນ​ເສົາ​ວານ​ນີ້ ​ໃນ​ຂະນະ​ທີ່​ ພວກ​ນັກ​ຕໍ່ສູ້​ອິສລາມ ​ໄດ້​ລ່າ​ຖອຍ​ໜີໄປ​ຕັ້ງ​ຫລັກຢູ່​ໃນ​ເມືອງ Bore’ ​ແລະ​ເມືອງ Douentza.

ທ່ານ Jean-Yves Le Drian ລັດຖະມົນຕີ​ປ້ອງ​ກັນ​ປະ​ເທດ​ຝຣັ່ງ ​ເວົ້າ ​ເມື່ອ​ວັນ​ເສົາ​ວານ​ນີ້​ວ່າ ​ເຮືອບິນ​ເຮ​ລິ​ຄອບ​ເຕີ​ຝຣັ່ງລໍາ​ນຶ່ງຖືກ​ຍິງ​ຕົກ ​ແລະ​ນັກ​ບິນ​ເສຍ​ຊີວິດ ​ໃນ​ລະ​ຫວ່າງ​ການ​ໂຈມ​ຕີ​ທາງ​ອາກາດ​ທີ່​ເມືອງ Konna ທີ່​ເລີ່​ມຂຶ້ນ​ເມື່ອ​ວັນ​ສຸກ​ຜ່ານ​ມາ.

ກຸ່ມ​ຫົວ​ຮຸນ​ແຮງ Ansar Dine ທີ່​ເຊື່ອມໂຍງ​ກັບ​ກຸ່ມ​ອາລຄາ​ອີ​ດາ ​ໄດ້​ທໍາ ການ​ຕອບ​ໂຕ້​ການ​ໂຈມ​ຕີ​ທາງ​ອາກາດ​ດ້ວຍ​ການ​ຂູ່​ຈະ​ແກ້​ແຄ້ນປະ​ເທດ​ຝຣັ່ງ ທີ່​ຍັງ​ຜົນ​ໃຫ້​ປະທານາທິ ບໍດີ​ຝຣັ່ງ ທ່ານ Francois Hollande ສັ່ງ​ໃຫ້​ເຂັ້ມ​ງວດ​ການ​ຮັກສາ​ຄວາມ​ປອດ​ໄພ​ເພີ່ມ​ຂຶ້ນອີກ​ທົ່ວ​ປະ​ເທດ​ຝຣັ່ງ. ເຈົ້າໜ້າ​ທີ່​ຝຣັ່ງຍັງ​ໄດ້​ແນະ​ນໍາ​ໃຫ້​ຊາວ​ຝຣັ່ງຢູ່​ໃນ​ປະ​ເທດ​ມາລີ ​ຈົ່ງ​ພາກັນ​ໜີ​ອອກ ປະເທດ​ໄປ ເປັນ​ການ​ຊົ່ວຄາວ​ກ່ອນ.
XS
SM
MD
LG