ມາລີ ຈະປ່ອນບັດ ເລືອກຕັ້ງ ປະທານາທິບໍດີ ຮອບຊີ້ຂາດ ໃນວັນທີ 11 ສິງຫານີ້ (ວີດີໂອ)

ມາລີ ຈະຈັດການເລືອກຕັ້ງປະທານາທິບໍດີຮອບສອງໃນວັນທີ 11
ສິງຫານີ້ຫຼັງຈາກບໍ່ມີຜູ້ສະໝັກຄົນໃດໄດ້ຮັບຄະແນນສຽງກາຍ 50
ເປີເຊັນ ໃນການປ່ອນບັດ ໃນມື້ວັນອາທິດຜ່ານມາ.

ຜົນການນັບຄະແນນສຽງທີ່ນຳອອກເຜີຍແຜ່ໂດຍລັດຖະບານໃນ
ວັນສຸກມື້ນີ້ ສະແດງໃຫ້ເຫັນວ່າ ອະດີດນາຍົກລັດຖະມົນຕີ Ibra-
him Boubacar Keita ມີຄະແນນນຳໜ້າ ບັນດາຜູ້ສະໝັກທັງ
ໝົດ ໂດຍໄດ້ຮັບຄະແນນສຽງ 39.2 ເປີເຊັນ. ສ່ວນທ່ານ Sou-
maila Cisse ຄູ່ແຂ່ງຄົນສຳຄັນຂອງທ່ານ ແມ່ນຕິດອັນດັບສອງ
ໂດຍໄດ້ຮັບຄະແນນ 19.4 ເປີເຊັນ ຕິດຕາມດ້ວຍທ່ານ Drama-
ne Dembele ໄດ້ຮັບຄະແນນ 9.6 ເປີເຊັນ.

ຜົນການນັບບັດຄະແນນສຽງດັ່ງກ່າວ ແມ່ນຂັດກັບທີ່ລັດຖະມົນຕີຄຸ້ມຄອງດິນແດນພັນເອກ Moussa Sinko Coulibaly ທີ່ກ່າວ ໃນສັບປະດານີ້ວ່າ ທ່ານ Keita ອາດໄດ້ຮັບໄຊຊະນະ ໃນການເລືອກຕັ້ງຮອບທຳອິດເລີຍ.

ເປັນທີ່ຄາດກັນວ່າ ການເລືອກຕັ້ງຮອບສອງ ຈະດຳເນີນໄປຢ່າງດຸເດືອດໃນຂະນະທີ່ບັນດາ
ຜູ້ສະໝັກ ທີ່ໄດ້ຮັບຄະແນນສຽງຫຼາຍໆຄົນ ໃນການເລືອກຕັ້ງຮອບທຳອິດ ອາດຈະໃຫ້ການ ສະໜັບສະໜຸນຕໍ່ທ່ານ Cisse.

ການປ່ອນບັດເລືອກຕັ້ງປະທານາທິບໍດີ ແມ່ນໝາຍຄວາມວ່າຈະອຳນວຍໃຫ້ມີການເລີ້ມຕົ້ນ ໃໝ່ສຳລັບມາລີທີ່ຕັ້ງຢູ່ໃນເຂດອາຟຣິກາຕາເວັນຕົກຊຶ່ງໃນປີກາຍນີ້ໄດ້ປະເຊີນກັບການກໍ່ກະ ບົດຂອງຊົນເຜົ່າ Tuareg ການກໍ່ລັດຖະປະຫານຂອງພວກທະຫານແລະການເຂົ້າຄວບຄຸມ ພາກເໜືອຂອງປະເທດ ໂດຍພວກມຸສລິມຫົວຮຸນແຮງ.