ສະພາຄວາມໝັ້ນຄົງສະຫະປະຊາຊາດຈັດກອງປະຊຸມສຸກເສິນຂຶ້ນກ່ຽວກັບມາລີໃນວັນອັງຄານມື້ນີ້ ຂະນະທີ່ພວກຜູ້ນໍາທະຫານທີ່ກໍ່ລັດຖະຫານຂຶ້ນຍັງຄອງອໍານາດຢູ່ ແລະພວກປະເທດໃນທະວີບອາຟຣິກາຕາເວັນຕົກໄດ້ທໍາການລົງໂທດດ້ານການທູດແລະການເງິນຕໍ່ປະເທດດັ່ງກ່າວ.
ບັນດາຜູ້ນໍາຈາກປະຊາຄົມເສດຖະກິດຂອງບັນດາລັດອາຟຣິກາຕາເວັນຕົກ ຫຼື ECOWAS ໄດ້ຕັດສິນໃຈໃນວັນຈັນວານນີ້ ອັດຊາຍແດນທັງໝົດລະຫວ່າງມາລີແລະພວກປະເທດສະມາຊິກຂອງກຸ່ມ ແລະຕັດການສົ່ງເງິນຕາໄປຍັງມາລີ ທີ່ອາໄສທະນາຄານກາງຂອງພາກພື້ນນັ້ນ.
ອະດີດປະທານາທິບໍດີໄນຈີເຣຍ ທ່ານ Olusegun Obasanjo ກ່າວ ຕໍ່ວີໂອເອວ່າ ທ່ານມີຄວາມໝັ້ນໃຈວ່າ ກຸ່ມ ECOWAS ສາມາດແກ້ໄຂວິກິດການນີ້ໄດ້ ຊຶ່ງທ່ານກ່າວວ່າ ກຸ່ມດັ່ງກ່າວຄວນຈະຊັກຊວນໃຫ້ພວກທະຫານກັບຄືນເຂົ້າຄ້າຍຂອງພວກເຂົາເຈົ້າ ຫຼັງຈາກນັ້ນຫັນປ່ຽນໄປສູ່ການເລືອກຕັ້ງ ແລະກັບຄືນສູ່ລະບອບປະຊາທິປະໄຕ.
ພວກທະຫານໄດ້ຍຶດອໍານາດຈາກປະທານາທິບໍດີ Amadou Touma-ni Toure ໃນວັນທີ 22 ມີນາຜ່ານມານີ້ ໂດຍກ່າວຫາທ່ານ Toure ວ່າບໍ່ອໍານວຍຊັບພະຍາກອນພຽງພໍໃຫ້ກອງທັບເພື່ອຍັບຍັ້ງພວກກະບົດ Tuareg ນັ້ນ.
ພວກກະບົດທີ່ປະກອບອາວຸດຢ່າງໜັກ ຍົກຍ້າຍເຂົ້າໄປໃນພາກເໜືອຂອງມາລີ ຫຼັງຈາກລີເບຍ ຊຶ່ງເປັນປະເທດເພື່ອນບ້ານໄດ້ແຕກໄປ ແລະໄດ້ເລີ້ມທໍາການກໍ່ການກະບົດຂຶ້ນໃນກາງເດືອນມັງກອນຕົ້ນປີນີ້. ພວກກະບົດແບ່ງແຍກດິນແດນ Tuareg ໄດ້ທໍາຄວາມພະຍາຍາມເພື່ອຊອກຫາຊ່ອງທາງຢາກປົກຄອງຕົນເອງມາໄດ້ຫຼາຍທົດສະວັດແລ້ວ.