ກຸ່ມປະຊາຄົມເສດຖະກິດຂອງບັນດາລັດອາຟຣິກາຕາເວັນຕົກຫຼື ECO- WAS ກໍາລັງຂູ່ທີ່ຈະລົງໂທດ ແລະຕອບໂຕ້ດ້ວຍກໍາລັງທະຫານທີ່ອາດເປັນໄປໄດ້ ຕໍ່ການກໍ່ລັດຖະປະຫານຂອງພວກທະຫານທໍລະຍົດເມື່ອອາ ທິດຜ່ານມາ ທີ່ປະເທດມາລີນັ້ນ.
ກຸ່ມ ECOWAS ກ່າວເມື່ອວັນອັງຄານວານນີ້ວ່າ ຕົນຈະສົ່ງຜູ້ຕາງໜ້າຄະນະນຶ່ງຂອງຕົນ
ທີ່ ປະກອບດ້ວຍປະມຸກຂອງຢ່າງໜ້ອຍ 5 ປະເທດ ໄປຍັງມາລີ ພາຍໃນ 48 ຊົ່ວໂມງນີ້
ເພື່ອພະຍາຍາມເຈລະຈາຕໍ່ຮອງ ໃຫ້ປະເທດດັ່ງກ່າວກັບຄືນໄປສູ່ການປົກຄອງຕາມລັດຖະ
ທໍາມະນູນ ແລະຄະນະນຳພາຂອງປະເທດທີ່ໄດ້ຮັບການເລືອກຕັ້ງມານັ້ນ. ບັນດາປະເທດ
ສະມາຊິກຂອງກຸ່ມກ່າວວ່າ ພວກເຂົາເຈົ້າຈະພິຈາລະນາເບິ່ງທາງເລືອກໝົດທຸກຢ່າງເພື່ອ
ຍຸຕິວິກິດການ ແລະເວົ້າອີກວ່າ ກໍາລັງຮັກສາສັນຕິພາບແມ່ນຢູ່ໃນທ່າຕຽມພ້ອມ ທີ່ຈະຖືກ
ສົ່ງໄປປະຕິບັດການໃນ
ປະເທດດັ່ງກ່າວ.
ທ່ານ Sonny Ugoh ໂຄສົກຂອງກຸ່ມ ECOWAS ບອກວີໂອເອວ່າ ບັນດາຜູ້ນໍາຂົງເຂດຢາກຈະເຕືອນວ່າ ການກໍ່ລັດຖະປະຫານນັ້ນຈະບໍ່ມີການຜ່ອນຜັນເດັດຂາດ. ໂຄສົກກ່າວອີກວ່າ ກຸ່ມປະເທດໃນຂົງເຂດເຊື່ອວ່າ ຝ່າຍກໍ່ລັດຖະປະຫານຈະຍິນຍອມພາຍໃຕ້ຄວາມກົດດັນ.
ຜູ້ນໍາລັດຖະປະຫານ ປະກາດໃຊ້ລັດຖະທໍາມະນູນສະບັບໃໝ່ ເມື່ອວັນອັງ ຄານວານນີ້. ເອກະສານດັ່ງກ່າວ ທີ່ອ່ານໃຫ້ປະຊາຊົນຊາບ ຜ່ານໂທລະ ພາບແຫ່ງຊາດ ແມ່ນໂຮມທັງພວກກົດໝາຍທີ່ພິທັກປົກປ້ອງເສລີພາບໃນການປາກເວົ້າ ແລະກ່າວວ່າ ພວກທະຫານຈະບໍ່ມີສິດເຂົ້າສະໝັກໃນການເລືອກຕັ້ງ.
ທ່ານ Peter Henry Balerin ຮອງເອກອັກຄະລັດຖະທູດ ຂອງສະຫະລັດ ບອກວີໂອເອວ່າ ທ່ານໄດ້ໂອ້ລົມກັບຮ້ອຍເອກ Amadou Sanogo ຜູ້ນໍາລັດຖະປະຫານ ໂດຍໄດ້ຮຽກຮ້ອງໃຫ້ທ່ານຈົ່ງໂອນອໍານາດໃນທັນທີຄືນໃຫ້ແກ່ບັນດາຜູ້ນໍາທີ່ຖືກເລືອກຕັ້ງຂອງມາລີ ແລະອະນຸຍາດໃຫ້ທໍາການເລືອກຕັ້ງໄວທີ່ສຸດເທົ່າທີ່ຈະໄວໄດ້.