ປະທານາທິບໍດີ Mohamed Nasheed ແຫ່ງ Maldives ໄດ້ລາອອກຈາກຕໍາແໜ່ງ
ຫລັງຈາກປະເຊີນກັບການປະທ້ວງຂອງພວກຝ່າຍຄ້ານມາເປັນເວລາຫລາຍສັບປະດາ
ກ່ຽວກັບການຕັດສິນໃຈຂອງທ່ານ ທີ່ເປັນບັນຫາໂຕ້ແຍ້ງກັນ ເພື່ອຈັບກຸມຜູ້ພິພາກສາ
ຂັ້ນອາວຸໂສທ່ານນຶ່ງນັ້ນ.
ການລາອອກຈາກຕໍາແໜ່ງຂອງທ່ານ Nasheed ໃນວັນອັງຄານມື້ນີ້ມີຂຶ້ນຫລັງຈາກ
ພວກຕໍາຫລວດກະບົດຈຸນຶ່ງ ຍຶດເອົາສໍານັກງານໃຫຍ່ຂອງສະຖານີໂທລະພາບແຫ່ງລັດ
ໃນນະຄອນຫລວງ Male ແລະປະກາດຂ່າວອອກທາງໂທລະພາບ ຮຽກຮ້ອງໃຫ້ທ່ານ
ລາອອກຈາກ ຕໍາແໜ່ງນັ້ນ. ກ່ອນໜ້ານີ້ພວກຕໍາຫລວດຈຸນີ້ ໄດ້ເຂົ້າຮ່ວມໃນການປະ
ທ້ວງຂອງພວກຝ່າຍຄ້ານ ແລະທໍາການໂຈມຕີພວກປະທ້ວງອີກຈຸນຶ່ງ ທີ່ທໍາການປະທ້ວງ
ຢູ່ໃກ້ໆກັນ ພາຍໃຕ້ການນໍາພາຂອງພວກສະມາຊິກຂອງພັກລັດຖະບານທີ່ປົກຄອງປະ
ເທດໃນປັດຈຸບັນ ຊຶ່ງໄດ້ກະຕຸ້ນໃຫ້ພວກທະຫານໃຊ້ແກັສນໍ້າຕາໃສ່ພວກປະທ້ວງນັ້ນ.
ໃນລະຫວ່າງການກ່າວປາໄສທີ່ຖ່າຍທອດທາງໂທລະພາບນັ້ນ ທ່ານ Nasheed ກ່າວຕໍ່ປະເທດຊາດວ່າ ທ່ານບໍ່ມີເຈດຕະນາທີ່ຈະໃຊ້ກໍາລັງເພື່ອຮັກສາໄວ້ແຫ່ງການປົກຄອງປະເທດຂອງທ່ານຕໍ່ໄປ.
ຄາດກັນວ່າ ທ່ານຈະມອບອໍານາດໃຫ້ຮອງປະທານາທິບໍດີ Mohammed Waheed Hassan.
ລັດຖະບານໄດ້ປະເຊີນກັບການປະທ້ວງທີ່ເພີ່ມຂຶ້ນເລື້ອຍໆມາເປັນເວລາ 3 ສັບປະດາ ຫລັງຈາກທ່ານ Nasheed ສັ່ງໃຫ້ຈັບກຸມຜູ້ພິພາກສາຂັ້ນ ອາວຸໂສທ່ານນຶ່ງ ໃນຂໍ້ກ່າວຫາ ຖານປະພຶດໃນທາງຜິດແລະສະໜັບສະໜຸນພວກບຸກຄົນສໍາຄັນຂອງຝ່າຍຄ້ານນັ້ນ.
