ລັດຖະມົນຕີຂົນສົ່ງຂອງ ມາເລເຊຍ ກ່າວໃນວັນອາທິດມື້ນີ້ວ່າ ຊິ້ນສ່ວນຂອງປີກເຮືອບິນທີ່ໄດ້ຖືກພົບເຫັນໃນສັບປະດາທີ່ຜ່ານມາຢູ່ເທິງເກາະໃນມະຫາສະໝຸດອິນເດຍ ໄດ້ຖືກລະບຸວ່າມາຈາກເຮືອບິນຊະນິດດຽວກັນກັບເຮືອບິນຂອງສາຍການບິນ Malaysian Airlines ທີ່ໄດ້ຫາຍສາບສູນໄປໃນປີກາຍນີ້.
ລັດຖະມົນຕີ Liow Tiong Lai ໄດ້ກ່າວວ່າ ເຈົ້າໜ້າທີ່ຂອງ ຝຣັ່ງ ແລະ ບໍລິສັດຜະລິດເຮືອບິນ ໂບອິງ ແມ່ນຢູ່ໃນໝູ່ຄະນະຂອງຜູ້ທີ່ໄດ້ໃຫ້ຄຳຢືນຢັນວ່າປີກພືພັບຂອງເຮືອບິນແມ່ນມາຈາກເຮືອບິນ 777.
ທ່ານຍັງໄດ້ກ່າວວ່າ ມາເລເຊຍ ແມ່ນກຳລັງເດີນທາງໄປເຂດແດນໃກ້ກັບເກາະ Reunion, ເຊິ່ງຢູ່ພາກຕາເວັນອອກຂອງ ມາດາກາສກາ ເພື່ອຊ່ວຍລະບຸວ່າມີວັດຖຸອື່ນບໍ່ ທີ່ອາດຖືກ ພັດຂຶ້ນຝັ່ງໃນພື້ນດ່ັງກ່າວ ທີ່ວ່າອາດ ເປັນຊິ້ນສ່ວນ ຂອງເຮືອບິນທີ່ຫາຍສາບສູນໄປນັ້ນ.
ບັນດາເຈົ້າໜ້າທີ່ແມ່ນກຳລັງກວດສອບອີກຢ່າງໜ້ອຍເສດເຫຼັກທີ່ຫັກພັງອີກຊິ້ນສ່ວນໜຶ່ງ ທີ່ໄດ້ຖືກຄົ້ນພົບຢູ່ເກາະ Reunion, ໃກ້ກັບເມືອງ Saint Denis, ປະມານ 25 ກິໂລແມັດ ຈາກບ່ອນທີ່ຄົ້ນພົບປີກພືພັບ ຂອງເຮືອບິນ. ການຄົ້ນພົບຄັ້ງໃໝ່ນີ້ ອາດຈະແມ່ນຊິ້ນສ່ວນ ຂອງ ປະຕູເຮືອບິນກໍເປັນໄດ້.
