ສະພາຕ່ຳຂອງມາເລເຊຍ ໄດ້ຮັບຜ່ານມາດຕະການ ທີ່ອະນຸມັດ
ຄືນໃໝ່ ໃຫ້ມີການຈັບກຸມຄຸມຂັງ ໂດຍບໍ່ຕ້ອງຕັ້ງຂໍ້ຫາ ຕໍ່ພວກຜູ້
ຕ້ອງສົງໄສເປັນ ຜູ້ກໍ່ການຮ້າຍ ຊຶ່ງເປັນການເຄື່ອນໄຫວ ທີ່ພວກ
ເຈົ້າໜ້າທີ່ສິດທິມະນຸດ ປະນາມວ່າ ເປັນບາດກ້າວທີ່ຖອຍຫລັງ.
ບັນດາຜູ້ແທນສະພາ ກ່າວວ່າລັດຖະບານຕ້ອງການກົດໝາຍ
ວ່າດ້ວຍ ການປ້ອງກັນຕໍ່ການກໍ່ການຮ້າຍ ທີ່ໄດ້ຖືກຮັບຮອງເອົາ
ໃນວັນອັງຄານມື້ນີ້ ເພື່ອຮັບມືກັບການຂົ່ມຂູ່ ໂດຍພວກຫົວຮຸນແຮງ
ອິສລາມ ຢູ່ໃນມາເລເຊຍ.
ກຸ່ມປົກປ້ອງສິດທິມະນຸດ Human Rights Watch ຫຼື HRW
ເອີ້ນກົດໝາຍໃໝ່ດັ່ງກ່າວວ່າ “ແມ່ນບາດກ້າວຖອຍຫລັງຢ່າງໃຫຍ່ຫລວງ ສຳຫລັບສິດທິມະນຸດ ໃນມາເລເຊຍ” ແລະ ໄດ້ເຕືອນວ່າ ມັນເປັນການຟື້ນຟູ ກົດໝາຍວ່າດ້ວຍ ຄວາມໝັ້ນຄົງພາຍໃນ ທີ່ໄດ້ຖືກລົບລ້າງໄປ ໃນປີ 2012.
ທ່ານ Phil Robertson ຮອງອຳນວຍການຝ່າຍເອເຊຍຂອງກຸ່ມປົກ ປ້ອງສິດທິມະນຸດ HRW ກ່າວຢູ່ໃນຖະແຫລງການສະບັບນຶ່ງວ່າ “ໂດຍການຟື້ນຟູການຄຸມຂັງ ແບບບໍ່ມີກຳນົດ ທີ່ປາດສະຈາກການດຳເນີນຄະດີນັ້ນ ມາເລເຊຍ ໄດ້ເປີດຄືນອີກ ຫີບຂອງບັນຫາຕ່າງໆ ຫຼື Pandora’s Box ໃນການລ່ວງລະເມີດຂອງລັດ ທີ່ມີຈຸດປະສົງ
ທາງການເມືອງ ຊຶ່ງຫຼາຍໆຄົນຄິດວ່າ ມັນໄດ້ປິດໄປແລ້ວ ໃນເວລາກົດໝາຍວ່າ
ດ້ວຍຄວາມໝັ້ນຄົງພາຍໃນ ທີ່ລະເມີດສິດນັ້ນ ໄດ້ຖືກຍົກ ເລີກໄປໃນປີ 2012.”
ສ່ວນສະພາສູງ ແລະ ກະສັດຂອງມາເລເຊຍ ແມ່ນຄາດກັນວ່າ ຈະ ສະໜັບສະໜຸນຕໍ່
ມາດຕະການດັ່ງກ່າວ ໂດຍຈະອະນຸຍາດໃຫ້ມັນກາຍມາເປັນກົດໝາຍ.
ການຮັບຜ່ານກົດໝາຍດັ່ງກ່າວ ມີຂຶ້ນ ສອງມື້ຫຼັງຈາກທີ່ ກອງກຳລັງຮັກສາຄວາມປອດໄພ
ໄດ້ຈັບກຸມ 17 ຄົນ ຜູ້ທີ່ຖືກສົງໄສວ່າ ວາງແຜນການໂຈມຕີ ຕໍ່ ທະນາຄານ ປ້ອມຕຳຫລວດ
ແລະ ຄ້າຍທະຫານ ຕ່າງໆ ເພື່ອຈະໄດ້ອາວຸດຕ່າງໆນັ້ນ.
ການຈັບກຸມທີ່ສຳຄັນທີ່ສຸດ 2 ຄັ້ງ ໃນວັນອາທິດຜ່ານມານັ້ນ ແມ່ນພວກຜູ້ຊາຍ ຜູ້ທີ່ໄດ້ຮັບ
ການເຝິກແອບມາ ໂດຍພວກຫົວຮຸນແຮງ ຢູ່ໃນຊີເຣຍ.
