ລິ້ງ ສຳຫລັບເຂົ້າຫາ

ສານແຫ່ງນຶ່ງຂອງມາເລເຊຍ ໄດ້ຕັດສິນໂທດສອງອ້າຍນ້ອງ ໃຫ້ຈຳຄຸກເປັນເວລາ 5 ປີ ຍ້ອນໄດ້ແກວ່ງລະເບີດໄຟ ໃສ່ໂບດແຫ່ງນຶ່ງ ຂອງສາສະໜາຄຣິສຕ໌ ໃນລະຫວ່າງ ທີ່ເກີດການຂັດແຍ້ງຢ່າງຮຸນແຮງ ກ່ຽວກັບການໃຊ້ຄຳວ່າ “ພະອາຫຼ່າ” ໂດຍພວກທີ່ບໍ່ໄດ້ນັບຖື ສາສະໜາອິສລາມ.

ທ້າວ Raja Muhammad Faizal Ibrahim ແລະ ນ້ອງຊາຍ ທ້າວ Raja Muhammad Idzham Ibrahim ໄດ້ຖືກຕັດສິນໂທດ ໃນວັນສຸກມື້ນີ້ ໃນການ ໂຈມຕີໂບດ Metro Tabernacle ຢູ່ໃນເຂດຊານເມືອງ ຂອງນະຄອນຫຼວງ ກົວລາລຳເປີ ໃນເດືອນມັງກອນປີນີ້.

ການໂຈມຕີ ທີ່ໄດ້ພາໃຫ້ເກີດໄຟໄໝ້ ຊັ້ນລຸ່ມຂອງໂບດນັ້ນ ແມ່ນເປັນການໂຈມຕີເທື່ອທຳ ອິດ ໃນຈຳນວນຫຼາຍໆຄັ້ງ ຕໍ່ໂບດສິບກວ່າແຫ່ງ ແລະບ່ອນສວດມົນພາວະນາອື່ນໆ ຫຼັງຈາກສານຊັ້ນສູງ ຂອງມາເລເຊຍ ໄດ້ຕ່າວປີ້ນກົດໝາຍ ໃນເດືອນທັນວາ ປີກາຍ ທີ່ໄດ້ຫ້າມບໍ່ໃຫ້ ພວກທີ່ບໍ່ນັບຖືສາສະໜາອິສລາມ ໃຊ້ຄຳວ່າ “ພະອາຫຼ່າ” ໃນການ ອ້າງອີງ ເຖິງພະເຈົ້າ.

ການຕັດສິນທີ່ວ່ານີ້ ໄດ້ສ້າງຄວາມໂກດແຄ້ນ ໃຫ້ແກ່ປະຊາຄົມມຸສລິມ ຊຶ່ງປະກອບເປັນ 60% ຂອງປະຊາກອນທັງໝົດ 27 ລ້ານຄົນຂອງມາເລເຊຍ. ສາສະໜາກຸ່ມນ້ອຍ ທີ່ ສຳຄັນໆອື່ນໆ ໃນມາເລເຊຍ ກໍມີຮວມທັງ ສາສະໜາພຸດ ສາສະໜາຄຣິສຕ໌ ແລະ ສາສະໜາຮິນດູ.

XS
SM
MD
LG