ຊາວມາເລເຊຍຫລາຍຮ້ອຍຄົນພາກັນຫລັ່ງໄຫລລົງສູ່ຖະໜົນຫົນທາງເມື່ອວັນອັງຄານມື້ນີ້
ເພື່ອປະທ້ວງຕໍ່ຂໍ້ສະເໜີຫ້າມບໍ່ໃຫ້ໂຮມຊຸມນຸມກັນຢູ່ຕາມຖະນົນຫົນທາງ.
ພວກປະທ້ວງໄດ້ພາກັນເດີນຂະບວນໄປຍັງຕຶກສະພາແຫ່ງຊາດ ທີ່ນະຄອນຫລວງກົວລາ
ລໍາເປີ ລ່ວງໜ້າການລົງຄະແນນສຽງກ່ຽວກັບຮ່າງຍັດຕິທີ່ເອີ້ນວ່າ ກົດໝາຍການໂຮມຊຸມ
ນຸມກັນຢ່າງສັນຕິ ໂດຍກ່າວວ່າມາດຕະການດັ່ງກ່າວນີ້ ແມ່ນເປັນການໂຈມຕີເສລີພາບ
ໃນການປາກເວົ້າ.
ຍັດຕິດັ່ງກ່າວນີ້ ຈະອະນຸຍາດປະຊາຊົນໂຮມຊຸມນຸມກັນໄດ້ໃນສະຖານທີ່ຕ່າງໆທີ່ກໍານົດໄວ້
ເຊັ່ນ ສະໜາມກິລາແຫ່ງຊາດເປັນຕົ້ນ ແຕ່ໄດ້ຫ້າມ ບໍ່ໃຫ້ການເດີນຂະບວນຂອງປະຊາຊົນ
ໂດຍບໍ່ໄດ້ຮັບອະນຸຍາດລ່ວງໜ້າ. ພວກຈັດປະທ້ວງຈະຕ້ອງແຈ້ງໃຫ້ເຈົ້າໜ້າທີ່ຊາບລ່ວງໜ້າ
10 ມື້ກ່ອນການໂຮມຊຸມນຸມມີຂຶ້ນ.
ພັກລັດຖະບານປະສົມທີ່ປົກຄອງປະເທດຂອງ ທ່ານ Najib Razak ນາຍົກລັດຖະມົນຕີ
ມາເລເຊຍ ໄດ້ນໍາສະເໜີຍັດຕິດັ່ງກ່າວນີ້ ເມື່ອອາທິດຜ່ານມາ. ບັນດາທະນາຍຄວາມກ່າວ
ວ່າ ຍັດຕິສະບັບນີ້ໄດ້ນຳສະເໜີຢ່າງຮີບຮ້ອນໄວວາ ແລະຈະເປັນການເອື້ອອໍານວຍໃຫ້ພວກ
ຕໍາຫລວດມີອໍານາດເກີນໄປ. ຕໍາຫລວດຈະເປັນຜູ້ກຳໜົດວ່າ ວັນເວລາແລະສະຖານທີ່ ທີ່
ໄດ້ສະເໜີວ່າ ຈະໃຊ້ສໍາລັບການເດີນຂະບວນປະທ້ວງນັ້ນ ເປັນທີ່ຮັບເອົາໄດ້ຫຼືບໍ.
ອົງການນິລະໂທດກໍາສາກົນເອີ້ນ ກົດໝາຍໂຮມຊຸມນຸມກັນຢ່າງສັນຕິນີ້ວ່າ ເປັນກົດໝາຍທີ່
ບັ່ນທອນຕໍ່ສິດທິໃນການປະທ້ວງຢ່າງສັນຕິຂອງຊາວມາເລເຊຍ.
