ເຈົ້າໜ້າທີ່ມາເລເຊຍຖະແຫລງວ່າ ມີ 26 ຄົນເສຍຊີວິດ ໃນວັນຈັນມື້ນີ້ ເວລາລົດເມທີ່ບັນທຸກນັກທ່ອງທ່ຽວຊາວໄທ ພິກຂວໍ້າເທິງຖະໜົນໃຫຍ່ ໄຮເວສາຍນຶ່ງໃນມາເລເຊຍ.
ພວກເຈົ້າໜ້າທີ່ກ່າວວ່າ ພວກນັກທ່ອງທ່ຽວເຫລົ່ານັ້ນກໍາລັງເດີນທາງໄປຍັງ ນະຄອນຫລວງ Kuala Lumpur ເພື່ອຈະໄປຂຶ້ນເຮືອບິນກັບປະເທດ ຫຼັງຈາກໄປຢ້ຽມຊົມເຂດພູພຽງ Cameron ຊຶ່ງເປັນສະຖານທີ່ທ່ອງທ່ຽວຕາກອາກາດທີ່ຂຶ້ນຊື່ ຂອງມາເລເຊຍ. ທາງການເວົ້າວ່າ ລົດເມເກີດເສຍຫຼັກແລະໄປຕໍາເອົາຮາວກັ້ນກາງຖະຫນົນ ສົ່ງຜົນໃຫ້ລົດເມສອງຊັ້ນນັ້ນ ພິກຂວໍ້າ.
ຕໍາຫລວດກ່າວວ່າ 22 ຄົນຕາຍຄາທີ່ ແລະອີກ 4 ຄົນ ເສຍຊີວິດໃນລະຫວ່າງທີ່ເຄື່ອນຍ້າຍສົ່ງໂຮງພະຍາບານ.
ຜູ້ເສຍຊີວິດມີຮວມທັງຄົນຂັບຊາວມາເລເຊຍແລະພະນັກ ງານນໍາທ່ຽວຊາວມາເລເຊຍອີກ 2 ຄົນ ແລະມີອີກສິບ ກ່ວາຄົນໄດ້ຮັບການບາດເຈັບ.
ອຸບປະຕິເຫດທາງລົດເມນັ້ນແມ່ນເປັນເລື່ອງປົກກະຕິໄປແລ້ວໃນມາເລເຊຍ ຊຶ່ງມີສະຖິຕິຄົນເສຍຊີວິດໃນທ້ອງຖະໜົນ ທີ່ສູງທີ່ສຸດໃນພາກພື້ນເອເຊຍອາຄະເນ ອິງຕາມການສຶກສາຄົ້ນຄ້ວາຂອງອົງການອະນາໄມໂລກ.
