ລັດຖະມົນຕີການຕ່າງປະເທດສະຫະລັດ ທ່ານ John Kerry ພ້ອມກັບຫົວໜ້ານັກການ ທູດຂອງຢູໂຣບແລະອາຣັບພວມປະຊຸມກັນຢູ່ນະຄອນປາຣີ ໃນວັນສຸກມື້ນີ້ໂດຍຫວັງວ່າ ຈະພົບເຫັນຊ່ອງທາງຮ່ວມກັນເພື່ອຟື້ນຟູການເຈລະຈາສັນຕິພາບລະຫວ່າງອິສຣາແອລ ແລະປາແລສໄຕນ໌ ທີ່ຕົກຢູ່ໃນສະພາບບໍ່ໄປບໍ່ມານັ້ນ.
ປະທານາທິບໍດີຝຣັ່ງ ທ່ານ Francois Hollande ຮຽກຮ້ອງໃຫ້ອິສຣາແອລແລະປາແລສ ໄຕນ໌ ສະແດງຄວາມກ້າຫານໃນການເລືອກເອົາສັນຕິພາບ ໃນຂະນະທີ່ທ່ານກ່າວຄຳປາ ໄສເປີດກອງປະຊຸມສັນຕິພາບດັ່ງກ່າວ.
ການຫາລືກັນກ່ຽວກັບເງື່ອນໄຂຕ່າງໆ ກ່ຽວກັບຂໍ້ຕົກລົງ ໃນການມີສັນຕິພາບອັນຖາວອນ ລະຫວ່າງອິສຣາແອລແລະປາແລສໄຕນ໌ນັ້ນ ແມ່ນຕ້ອງໄດ້ພິຈາລະນາ ເຖິງຄວາມສຳຄັນ ຂອງໝົດທັງຂົງເຂດ ນັ້ນຄືຄຳເວົ້າຂອງທ່ານ Hollande.
ທ່ານ Hollande ກ່າວຕື່ມວ່າ ມະຫາອຳນາດລະຫວ່າງປະເທດຄວນເອົາບົດບາດທີ່ສຳຄັນ ໃນການອຳນວຍຄວາມສະດວກໃຫ້ແກ່ຂັ້ນຕອນສັນຕິພາບ ແຕ່ໃນທີ່ສຸດແລ້ວ ມັນຂຶ້ນກັບ ທັງສອງຝ່າຍທີ່ຈະຕ້ອງໄດ້ເຮັດວຽກຮ່ວມກັນ ແກ້ໄຂການຂັດແຍ້ງ.
ທ່ານເວົ້າວ່າ ການຂົ່ມຂູ່ແລະບູລິມະສິດໄດ້ມີການປ່ຽນແປງ. ການປ່ຽນແປງເຫຼົ່ານີ້ເຮັດໃຫ້ ມີຄວາມຮີບດ່ວນຫລາຍຂຶ້ນທີ່ຈະຕ້ອງໄດ້ຊອກຫາຊ່ອງທາງແກ້ໄຂຕໍ່ບັນຫາຂັດແຍ້ງແລະ ຄວາມວຸ້ນວາຍຢູ່ໃນຂົງເຂດໄດ້ສ້າງພັນທະໃໝ່ເພື່ອໃຫ້ມີສັນຕິພາບ.
ການສະໜອງຕອບຂອງວໍຊິງຕັນຕໍ່ຄວາມພະຍາຍາມຂອງຝຣັ່ງໄດ້ມີຂຶ້ນແບບບໍ່ກະຕືລືລົ້ນ ປານໃດ ໂດຍທີ່ລັດຖະມົນຕີການຕ່າງປະເທດ Kerry ໄດ້ຕົກລົງທີ່ ຈະເຂົ້າຮ່ວມ ພຽງແຕ່ ເພື່ອຮັບຟັງຄວາມຄິດຄວາມເຫັນທີ່ໄດ້ສະເໜີໂດຍຝຣັ່ງແລະປະເທດອື່ນໆ. ແຕ່ແນວໃດກໍ ຕາມ ເຈົ້າໜ້າທີ່ອະວຸໂສຂອງສະຫະລັດກ່າວຢ້ຳເຖິງຄວາມຈຳເປັນອັນຮີບດ່ວນທີ່ຈະຕ້ອງ ໄດ້ດຳເນີນງານເພື່ອສ້າງຄວາມກ້າວໜ້າໃຫ້ແກ່ເປົ້າໝາຍໃນການເຈລະຈາຕົກລົງແບບມີ ສອງລັດສອງປະເທດ.
ເຈົ້າໜ້າທີ່ອະວຸໂສ ຂອງກະຊວງການຕ່າງປະເທດສະຫະລັດ ກ່າວວ່າ ພວກເຮົາມາທີ່ນີ້ ເພື່ອທຳການສະເໜີຫົວຂໍ້ໃດໆ. ໃນຂະນະທີ່ສະຫະລັດ ມີຈິດໃຈເປີດກວ້າງ ຕໍ່ແນວຄິດຕ່າງໆແຕ່ພວກເຮົາຍັງບໍ່ໄດ້ຕັດສິນໃຈໃດໆເທື່ອກ່ຽວກັບວ່າແມ່ນຫຍັງແທ້ຖ້າຫາກມີບົດ ບາດຂອງພວກເຮົາຢູ່ໃນຂໍ້ລິເລີ້ມທີ່ຈະມີການດຳເນີນໄປຂ້າງໜ້າ.
