ບັນດານັກກູ້ໄພໄດ້ເຮັດວຽກ ໃນວັນພະຫັດມື້ນີ້ ເພື່ອຊ່ວຍເຫຼືອປະຊາຊົນຫຼາຍສິບຄົນທີ່ຍັງຄົງຕິດຄ້າງຢູ່ໃນຊາກຫັກພັງ ລຸນຫຼັງເຫດແຜ່ນດິນໄຫວທີ່ໃຫຍ່ທີ່ສຸດເກີດຂຶ້ນໃນ ໄຕ້ຫວັນ ໃນຮອບ 25 ປີ.
ຍອດຜູ້ເສຍຊີວິດ ແລະບາດເຈັບສູງສຸດຈາກການສັ່ນສະເທືອນດ້ວຍຄວາມແຮງ 7.2 ເມື່ອຕອນເຊົ້າຂອງວັນພຸດວານນີ້ ແມ່ນເສຍຊີວິດຢ່າງໜ້ອຍ 9 ຄົນ ແລະ ບາດເຈັບ 1,011 ຄົນ, ອີງຕາມການກ່າວຂອງບັນດາເຈົ້າໜ້າທີ່. ເມືອງ ຮວາລຽນ ທີ່ຕັ້ງຢູ່ເທິງພູຂອງ ໄຕ້ຫວັນ ແມ່ນຖືກກະທົບດ້ວຍຄວາມເສຍຫາຍ ແລະ ມີຜູ້ບາດເຈັບ ແລະ ເສຍຊີວິດຫຼາຍທີ່ສຸດ.
ນຶ່ງໃນຜູ້ທີ່ໄດ້ເສຍຊີວິດນັ້ນ ແມ່ນນາຍຄູສອນໂຮງຮຽນມັດທະຍົມ ອາຍຸ 33 ປີທີ່ມີນາມສະກຸນວ່າ ຄັງ, ຜູ້ທີ່ຖືກພົບເຫັນຢູ່ກ້ອງຕຶກທີ່ໄດ້ພັງລົງ. ອີງຕາມລາຍງານຂອງສື່ມວນຊົນໃນທ້ອງຖິ່ນນັ້ນ, ທ່ານນາງ ຄັງ ໄດ້ກັບຄືນໄປໃນຕຶກດັ່ງກ່າວທີ່ກຳລັງງ່ຽງ 45 ອົງສາຢູ່ ຫຼັງຈາກເຫດແຜ່ນດິນໄຫວໃນຕອນທຳອິດ ເພື່ອຊ່ວຍແມວຂອງລາວ.
ເວລາທີ່ນັກກູ້ໄພພົບເຫັນລາວ, ລາວແມ່ນບໍ່ມີສັນຍານຂອງການມີຊີວິດແລ້ວ. ຜູ້ເຫັນເຫດການໄດ້ກ່າວຕໍ່ອົງການຂ່າວ SET ຂອງໄຕ້ຫວັນວ່າ ຕຶກດັ່ງກ່າວໄດ້ພັງລົງທັງໝົດພຽງບໍ່ເທົ່າໃດວິນາທີ ຫຼັງຈາກທ່ານນາງ ຄັງ ໄດ້ເຂົ້າໄປເອົາສັດລ້ຽງຂອງລາວຢູ່ໃນຕຶກ.
ແຜ່ນດິນໄຫວນັ້ນ ຍັງໄດ້ທຳລາຍເສັ້ນທາງການສັນຈອນຫຼັກຫຼາຍສາຍໃນເມືອງ ຮວາລຽນ. ຖະໜົນເສັ້ນນຶ່ງທີ່ນຳທາງໄປສູ່ອຸໂມງລະຫວ່າງເມືອງ ຮວາລຽນ ແລະ ພາກເໜືອຂອງໄຕ້ຫວັນ ແມ່ນຖືກທຳລາຍຢ່າງຊິ້ນເຊີງ. ບັນດາເຈົ້າໜ້າທີ່ໄດ້ຢຸດການປະຕິບັດການທາງລົດໄຟສາຍເໜືອເປັນການຊົ່ວຄາວ, ເຊິ່ງຫຼາຍສ່ວນແມ່ນໄດ້ຮັບຄວາມເສຍຫາຍຢ່າງຮຸນແຮງ.
ແຜ່ນດິນໄຫວໄດ້ເກີດຂຶ້ນນຶ່ງວັນກ່ອນວັນພັກ 4 ວັນ, ເຮັດໃຫ້ນັກທ່ອງທ່ຽວຈຳນວນຫຼາຍ ຄາຢູ່ໃນເມືອງ ຮວາລຽນ ຫຼື ບໍ່ມີທາງເລືອກອື່ນ ພຽງແຕ່ໃຊ້ເສັ້ນທາງທີ່ຍາວກວ່າເພື່ອໄປຫາພາກຕ່າງໆຂອງ ໄຕ້ຫວັນ.
ອ່ານຂ່າວນີ້ຕື່ມເປັນພາສາອັງກິດ
ຟໍຣັມສະແດງຄວາມຄິດເຫັນ