ແຜ່ນດິນໄຫວຄວາມແຮງ 7.2 ໄດ້ສັ່ນສະເທືອນ ໄຕ້ຫວັນ ໃນຕອນເຊົ້າວັນພຸດມື້ນີ້, ເຮັດໃຫ້ເກີດໄຟຟ້າມອດຢ່າງກວ້າງຂວາງ ແລະ ມີການຫັກພັງສ່ວນນຶ່ງຂອງຕຶກຫຼາຍຫຼັງໃນພາກຕາເວັນອອກຂອງ ໄຕ້ຫວັນ. ມີຢ່າງໜ້ອຍ 7 ຄົນ ໄດ້ເສຍຊີວິດ ແລະ ຫຼາຍກວ່າ 700 ຄົນໄດ້ຮັບບາດເຈັບ.
ຈຸດສູນກາງຂອງແຜ່ນດິນໄຫວແມ່ນຕັ້ງຢູ່ 25 ກິໂລແມັດນອກຊາຍຝັ່ງກ້ຳຕາເວັນອອກຂອງເກາະດັ່ງກ່າວ, ດ້ວຍຄວາມເລິກ 15.5 ກິໂລແມັດ. ສະຖາບັນສະພາບອາກາດສູນກາງຂອງ ໄຕ້ຫວັນ ໄດ້ກ່າວວ່າແຜ່ນດິນໄຫວໄດ້ກໍ່ໃຫ້ເກີດການປ່ຽນແປງໃນລະດັບນ້ຳຢູ່ນອກຊາຍຝັ່ງກ້ຳຕາເວັນອອກ ແລະ ໄດ້ປະກາດຄຳເຕືອນຂອງຄື້ນຊຸນາມິ. ຄຳເຕືອນນັ້ນ ໄດ້ຖືກຍົກເລີກປະມານ 11 ໂມງເຊົ້າຕາມເວລາໃນທ້ອງຖິ່ນ.
ນັບຕັ້ງແຕ່ເກີດແຜ່ນດິນໄຫວໃນຕອນທຳອິດ, ເຊິ່ງໄດ້ເກີດຂຶ້ນຕອນເຊົ້າ 7 ໂມງ 58 ນາທີ, ໄດ້ມີການກວດພົບແຜ່ນດິນໄຫວຂະໜາດນ້ອຍເກີດຂຶ້ນຕາມມາ ຫຼາຍກວ່າ 100 ຄັ້ງ. ມັນແມ່ນເຫດແຜ່ນດິນໄຫວທີ່ຮຸນແຮງທີ່ສຸດທີ່ໄດ້ເກີດຂຶ້ນໃນ ໄຕ້ຫວັນ ໃນຮອບ 25 ປີ. ມີຕຶກຢ່າງໜ້ອຍ 26 ຫຼັງ ໄດ້ພັງລົງທັງໝົດ ຫຼືບໍ່ ກໍສ່ວນນຶ່ງໃນທົ່ວໄຕ້ຫວັນ.
ແຜ່ນດິນໄຫວດັ່ງກ່າວໄດ້ສ້າງຄວາມເສຍຫາຍຢູ່ທົ່ວເກາະ, ດ້ວຍກໍລະນີທີ່ຮ້າຍແຮງທີ່ສຸດ ແມ່ນຢູ່ໃນເມືອງ ຮວາລຽນ ທາງພາກຕາເວັນອອກ. ຕຶກອາຄານຫຼາຍກວ່າສິບຫຼັງຢູ່ທົ່ວເມືອງນັ້ນ ໄດ້ພັງລົງສ່ວນນຶ່ງ. ໃນຂະນະທີ່ປະຊາຊົນຫຼາຍກວ່າສິບຄົນແມ່ນໄດ້ຖືກຊ່ວຍເຫຼືອອອກມາຈາກຕຶກທີ່ພັງລົງສ່ວນນຶ່ງ ໃນເມືອງ ຮວາລຽນ ນັ້ນ, ແລະ ຢ່າງໜ້ອຍນຶ່ງຄົນແມ່ນຍັງຕິດຄ້າງຢູ່ໃນຕຶກ.
ຮູບພາບທີ່ໜ້າຕົກໃຈທີ່ໝຸນວຽນໃນສື່ສັງຄົມໄດ້ສະແດງໃຫ້ເຫັນຊັ້ນທີນຶ່ງຂອງຕຶກຫຼັງນຶ່ງໃນເມືອງ ຮວາລຽນ ໄດ້ພັງລົງທັງໝົດ ແລະ ສ່ວນທີ່ເຫຼືອຂອງຕຶກງ່ຽງ 45 ອົງສາ.
ຟໍຣັມສະແດງຄວາມຄິດເຫັນ