ປະທານາທິບໍດີ ຝຣັ່ງ ທ່ານເອມມານູແອລ ມາກຣົງ ໄດ້ເດີນທາງໄປຢ້ຽມຢາມ ອິສຣາແອລ ໃນວັນອັງຄານມື້ນີ້ ໂດຍກາຍເປັນຜູ້ນຳຂອງໂລກຄົນຫຼ້າສຸດ ທີ່ຈະ ນຳເອົາທັງຂໍ້ຄວາມສະແດງຄວາມເປັນນ້ຳນຶ່ງໃຈດຽວກັບ ອິສຣາແອລ ພາຍຫຼັງ ຈາກການໂຈມຕີທີ່ຮ້າຍແຮງຂອງກຸ່ມຮາມາສ ແລະຈະຊຸກຍູ້ໃຫ້ປົກປ້ອງພົນລະ ເຮືອນທັງຫຼາຍໃນເຂດກາຊາ.
ທ່ານມາກຣົງ ໄດ້ກ່າວຕໍ່ປະທານາທິບໍດີ ອິສຣາແອລ ທ່ານ ໄອແຊັກ ເຮີຊອກ ວ່າ ສິ່ງທີ່ໄດ້ເກີດຂຶ້ນຈະ “ບໍ່ມີວັນຖືກລືມໄດ້ເລີຍ” ແລະວ່າບູລິມະສິດສູງສຸດ ຄວນເປັນເລື້ອງການປ່ອຍໂຕກັນທັງຫຼາຍ ທີ່ຖືກຈັບກຸ່ມໂດຍກຸ່ມຮາມາສ.
ທ່ານມາກຣົງເວົ້າວ່າ “ຂ້າພະເຈົ້າຢາກໃຫ້ທ່ານໝັ້ນໃຈວ່າ ທ່ານຈະບໍ່ຖືກປະຖິ້ມ ພຽງລຳພັງໃນສົງຄາມຕໍ່ຕ້ານການກໍ່ການຮ້າຍນີ້.”
ກອງທັບຂອງອິສຣາແອລ ໄດ້ກ່າວໃນວັນອັງມື້ນີ້ວ່າ ຕົນໄດ້ສືບຕໍ່ດຳເນີນການ ໂຈມຕີທາງອາກາດຢູ່ໃນກາຊາ ລວມທັງແນເປົ້າໃສ່ສູນປະຕິບັດການຕ່າງໆຂອງ ກຸ່ມຮາມາສ ແລະໄດ້ສັງຫານຮອງຜູ້ບັນຊາການຂອງກຸ່ມຮາມາສຫຼາຍຄົນ.
ການໂຈມຕີຫຼາຍບັ້ນຂອງອິສຣາແອລ ໃນອາທິດນີ້ ຍັງໄດ້ຖະຫຼົ່ມຖານທີ່ໝັ້ນ ຂອງກຸ່ມຫົວຮຸນແຮງເຮສໂບລາຂອງເລບານອນ ແລະທ່ານເຮີຊອກ ໄດ້ກ່າວ ເຕືອນໃນວັນອັງຄານນີ້ວ່າ ຖ້າກຸ່ມເຮສໂບລາ ຂະຫຍາຍບັນຫາຂັດແຍ້ງອອກ ແລ້ວ “ເລບານອນຈະຕ້ອງໄດ້ຮັບຜົນທີ່ຕິດຕາມມາ.”
“ຂ້າພະເຈົ້າຢາກໃຫ້ຮູ້ຢ່າງແຈ່ມແຈ້ງວ່າ ພວກເຮົາບໍ່ຢາກຈະປະເຊີນໜ້າກັນ ຢູ່ເຂດຊາຍແດນທາງພາກເໜືອ ຫຼື ກັບຄົນອື່ນໆ” ທ່ານເຮີຊອກ ໄດ້ກ່າວ. ທ່ານກ່າວຕໍ່ໄປວ່າ “ພວກເຮົາເພັ່ງເລັງໃສ່ການທຳລາຍພື້ນຖານໂຄງລ່າງຂອງ ກຸ່ມຮາມາສ ແລະນຳເອົາພົນລະເມືອງທັງຫຼາຍຂອງພວກເຮົາກັບຄືນບ້ານ.”
ທຳນຽບຂາວ ໄດ້ກ່າວວ່າປະທານາທິບໍດີ ສະຫະລັດ ໂຈ ໄບເດັນ ແລະນາຍົກ ລັດຖະມົນຕີ ອິສຣາແອລ ທ່ານເບັນຈາມິນ ເນທັນຢາຮູ ໄດ້ປຶກສາຫາລືກັນ “ຄວາມພະຍາຍາມຕ່າງໆກ່ຽວກັບການສະກັດກັ້ນຢູ່ໃນຂົງເຂດຢ່າງຕໍ່ເນື່ອງ, ທີ່ລວມມີການສົ່ງທະຫານຊຸດໃໝ່ຂອງສະຫະລັດໄປຈຳການ” ໃນການລົມໂທລະ ສັບກັນເມື່ອວັນຈັນວານນີ້.
ບັນດາເຈົ້າໜ້າທີ່ ສະຫະລັດ ເມື່ອບໍ່ເທົ່າໃດວັນທີ່ຜ່ານມາໄດ້ສະແດງຄວາມເປັນຫ່ວງວ່າ ສົງຄາມລະຫວ່າງ ອິສຣາແອລ ແລະ ກຸ່ມຮາມາສ ອາດກໍ່ໃຫ້ເກີດຄວາມຂັດແຍ້ງທີ່ກວ້າງຂວາງໃນເຂດຕາເວັນອອກກາງ.
