ປະທານາທິບໍດີຝຣັ່ງ ທ່ານເອັມມານູເອລ ມາກຣົງ ໄດ້ໂອ້ລົມກັບປະທານາທິບໍດີຂອງໄນເຈີ ທ່ານໂມຮໍາເມັດ ບາຊູມ ໃນຕອນເຊົ້າວັນສຸກມື້ນີ້, ລັດຖະມົນຕີການຕ່າງ ປະເທດຂອງຝຣັ່ງ ທ່ານນາງແຄັດເທີຣີນ ໂຄໂລນນາ ກ່າວຕໍ່ອົງການຂ່າວ AFP. ອີງຕາມທ່ານນາງໂຄໂລນນາແລ້ວ ທ່ານມາກຣົງກ່າວວ່າ ສາມາດ “ຕິດຕໍ່” ກັບທ່ານບາຊູມ (Bazoum) ໄດ້ຢູ່ ແລະທ່ານກໍ “ມີສຸຂະພາບດີ.”
ພວກຜູ້ນໍາກອງທັບຂອງໄນເຈີ ໄດ້ປະກາດການສະໜັບສະໜຸນ ຂອງພວກເຂົາ ເພື່ອປົດທ່ານບາຊູມ ອອກຈາກຕໍາແໜ່ງໃນວັນພຸດຜ່ານມານີ້, ໂດຍບໍ່ຍອມຮັບຟັງຫາງສຽງຮຽກຮ້ອງຈາກທົ່ວໂລກ ທີ່ໄດ້ປະນາມຕໍ່ການຢຶດອຳນາດແລະການເຄົາລົບຕໍ່ການປົກຄອງດ້ວຍຕົວບົດກົດໝາຍ ແລະລະບຽບດ້ານປະຊາທິປະໄຕຂອງປະເທດ.
ທ່ານອັບແດລ ຟາໂຕ ມູຊາ (Abdel Fatau Musah), ກໍາມາທິການ ກິດຈະ ການດ້ານການເມືອງ ແລະດ້ານຄວາມໝັ້ນຄົງຂອງປະຊາຄົມເສດຖະກິດບັນດາປະເທດໃນເຂດອາຟຣິກາຕາເວັນຕົກ ຫຼື ECOWAS ບອກກັບທ່ານເຈມສ໌ ບຸດ ຕີ (James Butty) ຈາກ VOA ວ່າ “ທ່ານບາຊູມ ຍັງຄົງຢູ່ໃນໜ້າທີ່ ແລະ ເປັນປະທານາທິບໍດີຢ່າງຖືກຕ້ອງຕາມກົດໝາຍ ແລະຕ້ອງໄດ້ມີການມອບຄືນຕຳແໜ່ງໃຫ້ແກ່ທ່ານ ໂດຍໄວທີ່ສຸດ.”
ທ່ານມູຊາ ກ່າວວ່າ “ປະມຸກຂອງປະເທດຢູ່ໃນພູມິພາກ ຈະຈັດກອງປະຊຸມສຸດຍອດພິເສດຂຶ້ນ, ເຊິ່ງເປັນກອງປະຊຸມສຸດຍອດແບບສຸກເສີນ ກ່ຽວກັບສະຖານະການທີ່ເກີດຂຶ້ນ ໃນທ້າຍອາທິດແລ້ວນີ້ ເພື່ອກໍານົດໃນສິ່ງທີ່ເປັນເຄື່ອງວັດແທກ ເພື່ອໃຫ້ໝັ້ນໃຈວ່າ ຈະມີການມອບຄືນຕຳແໜ່ງນັ້ນ.”