ຢູ່ທົ່ວປະເທດຈີນ ປະຊາຊົນຫລາຍລ້ານຄົນ ໄດ້ພາກັນອອກ
ເດີນທາງ ຊຶ່ງສໍາລັບບາງຄົນກໍໃຊ້ເວລາເປັນຫລາຍໆມື້ ກັບ
ຕ່າວຄືນສູ່ບ້ານເກີດຂອງພວກເຂົາເຈົ້າ ເພື່ອສະຫລອງປີໃໝ່ ຫລືກຸດຈີນ.
ໂຮງການ ໂຮງຈັກ ໂຮງງານສ່ວນຫລາຍ ໄດ້ປິດລົງເປັນ
ເວລາຫລາຍໆມື້ ເລີ້ມຕັ້ງແຕ່ວັນເສົາຜ່ານມານີ້ ແລະ
ພວກຄົນງານຈາກເຂດຊົນນະບົດ ທີ່ພາກັນເຂົ້າໄປເຮັດ
ວຽກຢູ່ໃນຫົວເມືອງໃຫຍ່ໆ ແມ່ນໄດ້ໄປອັ່ງອໍກັນຢູ່ເທິງ
ລົດໄຟແລະລົດເມ ເພື່ອເດີນທາງກັບເມືອບ້ານ. ສໍາລັບ
ບາງຄົນແລ້ວ ນີ້ແມ່ນໂອກາດດຽວຂອງພວກເຂົາເຈົ້າ
ທີ່ຈະໄດ້ກັບໄປພົບພໍ້ຢ້ຽມຢາມພວກພີ່ນ້ອງຂອງເຂົາເຈົ້າ
ໃນແຕ່ລະປີ. ກະຊວງລົດໄຟຂອງຈີນທໍານາຍວ່າ ຈະມີ
ຜູ້ໂດຍສານເດີນທາງໄປມາ ໃນລະດູນີ້ ຈໍານວນ 230
ລ້ານຄົນ ຊຶ່ງເພີ່ມຂື້ນ 12.5 ເປີເຊັນຈາກສະຖິຕິປີຜ່ານມາ.
ບາງຄົນກໍເດີນທາງໄປສະຫລອງກັນທີ່ເກາະຮ່ອງກົງ ບ່ອນທີ່ອົງການທ່ອງທ່ຽວຂອງເກາະ
ໄດ້ໃຊ້ຈ່າຍເງິນປະມານສອງລ້ານໂດລາ ເພື່ອດຶງດູດເອົາພວກນັກທ່ອງທ່ຽວຈາກຈີນແຜ່ນ
ດິນໃຫຍ່ ໃຫ້ໄປເບິ່ງໄປຊົມການສວນສະໜາມ ແລະຂະບວນແຫ່ວັນປີໃໝ່ປະຈໍາປີຢູ່ທີ່ນັ້ນ.
ພວກທີ່ອາໃສຢູ່ເກາະຮ່ອງກົງແລະໃຕ້ຫວັນ ກໍພາກັນເດີນທາງໄປທ່ຽວໃນລະຫວ່າງເທດ
ສະການປີໃໝ່ນີ້ເຊ່ນກັນ ໂດຍໄດ້ຈອງຕົ໋ວເຄຶ່ອງບິນໄວ້ລ່ວງໜ້າຫລາຍໆເດືອນເພື່ອສວາຍ
ໂອກາດໃນວັນພັກສາມມື້ນັ້ນ.
ຕາມປະຕິທິນທາງດາລາສາດຂອງຈີນນັ້ນ ປີໃໝ່ທີ່ເລີ້ມຂຶ້ນໃນວັນທີ 3 ເດືອນກຸມພານີ້
ແມ່ນປີເຖາະ ຫລືປີກະຕ່າຍ ຊຶ່ງພວກຊ່ຽວຊານຕໍາລາຫວງຈຸ້ຍຂອງຈີນກ່າວວ່າ ເປັນປີທີ່
ຈະມີຂີດໝາຍທີ່ປະກອບດ້ວຍສະພາບການຂື້ນໆລົງໆ ແລະຂໍ້ຂັດແຍ້ງກັນນາໆປະການ.
ຕໍາລາຫວງຈຸ້ຍ ແມ່ນເປັນລະບົບຄວາມເຊື່ອຖືທີ່ນິຍົມກັນຢ່າງແຜ່ຫລາຍອັນນຶ່ງຂອງຈີນ
ຊຶ່ງເປັນລະບົບທີ່ຖືເອົາຄວາມສອດຄ້ອງກັນໃນລະຫວ່າງຫ້າທາດຫລັກຂອງທໍາມະຊາດ
ອັນມີ ນໍ້າ ໄມ້ ດິນ ໄຟ ແລະເຫລັກ ນັ້ນ.
ທະນາຄານການລົງທຶນ CLSA Asia Pacific Markets ພິມເຜີຍແຜ່ລາຍງານປະຈໍາ
ປີວ່າດ້ວຍຫວງຈຸ້ຍ ກ່ຽວກັບຕະຫລາດຫຸ້ນ. ສໍາລັບປີນີ້ ລາຍງານບອກໃຫ້ພວກນັກລົງ
ທຶນທັງຫລາຍ ຈົ່ງຊື້ຫຸ້ນທີ່ກ່ຽວກັບເຫລັກ ການເດີນເຮືອ ສາຍການບິນ ການເງິນ ແລະ
ການພະນັນ ເພື່ອສວາຍປະໂຫຍດຈາກທາດເຫລັກແລະທາດນໍ້າທີ່ເຂັ້ມແຂງ ໃນລະຫວ່າງ ປີເຖາະນີ້.
ທ່ານ Phillip Chow ນັກວິເຄາະທີ່ທະນາຄານລົງທຶນ CLSA ທີ່ຮ່ອງກົງ ກ່າວວ່າ ຫຸ້ນທັງຫລາຍທີ່ກ່ຽວກັບທາດດິນນັ້ນ ແມ່ນຈະບໍ່ກ້າວໜ້າ. ທ່ານ Chow ກ່າວວ່າ:
“ການມີໜ້າຂອງທາດໄມ້ແມ່ນບໍ່ດີ ສໍາລັບທາດດິນ ໃນຕໍາລາຫວງຈຸ້ຍຂອງຈີນ ແລະພາກສ່ວນຕ່າງໆທີ່ບໍ່ຄ່ອຍຄຶກຄັກປານໃດນັ້ນ ກໍຈະແມ່ນ ທຸລະກິດຊື້-ຂາຍ
ດິນແລະບ້ານ ທຸລະກິດກໍ່ສ້າງ ແລະວັດຖຸກໍ່ສ້າງ.”
ໃຕ້ຫວັນ ສິງຄະໂປ ເກົາຫລີໃຕ້ ແລະຫວຽດນາມ ກໍຈະທໍາການສະເຫລີມສະຫລອງປີໃໝ່ນີ້
ເຊັ່ນກັນ. ທີ່ປະເທດໄທນັ້ນ ເຖິງແມ່ນວ່າຊາວໄທສ່ວນໃຫຍ່ຈະສະຫລອງປີໃໝ່ໃນຍາມສົງ
ການກໍຕາມ ແຕ່ຢູ່ໃນບາງກອກນັ້ນ ບັນດາຮ້ານສັບພະສິນຄ້າໃຫຍ່ໆກໍພາກັນເອ້ຍ້ອງດ້ວຍ
ຮູບກະຕ່າຍ ແລະບໍລິການອາຫານຈີນຕ່າງໆ.
ແຕ່ວ່າລາຄາອາຫານທີ່ຖີບຕົວສູງຂື້ນກວ່າເກົ່ານັ້ນ ເຮັດໃຫ້ບັນຍາກາດການສະເຫລີມສະ
ຫລອງຊົບເຊົາລົງ. ໃນຫວຽດນາມ ພວກອຸບປະໂພກບໍລິໂພກພາກັນຈົ່ມວ່າກ່ຽວກັບນໍ້າ
ມັນຄົວກິນທີ່ແພງຫລາຍ ຈໍາພວກໝາກໄມ້ ແລະດອກໄມ້ທີ່ໃຊ້ເອ້ຫລືປະດັບຕາມປະເພນີ
ນັ້ນ ກໍແພງຂື້ນເຊັ່ນດຽວກັນ ກໍຄືລາຄາເຄຶ່ອງອຸບປະໂພກບໍລິໂພກໄດ້ຖີບຕົວສູງຂື້ນຫລາຍ
ກວ່າ 12 ເປີເຊັນ ໃນເດືອນມັງກອນນັ້ນ.
ທີ່ໄທເປ ລັດຖະບານກ່າວວ່າ ລາຄາອາຫານທີ່ນິຍົມກັນບໍລິໂພກໃນວັນສະຫລອງປີໃໝ່ນັ້ນ
ໄດ້ຖີບຕົວສູງຂື້ນສູງເຖິງ 13 ເປີເຊັນຈາກລາຄາຂອງປີຜ່ານມາ. ສະພາວະເງິນເຟີ້ໃນຈີນ
ແຜ່ນດິນໃຫຍ່ ກໍສູງຂື້ນເຖິງ 4.6 ເປີເຊັນ ໃນເດືອນທັນວາປີກາຍນີ້.