ໃນວັນພຸດມື້ນີ້ ຫົວໜ້າສະພາປົກຄອງໄລຍະຂ້າມຜ່ານແຫ່ງຊາດລີເບຍ ຫລື NTC ໄດ້ພົບ ປະກັນກັບ ເຈົ້າໜ້າທີ່ລະດັບສູງສຸດຂອງສະຫະລັດທີ່ໄປຢ້ຽມຢາມປະເທດດັ່ງກ່າວນັບຕັ້ງແຕ່ ກໍາລັງຂອງ ລັດຖະບານຊົ່ວຄາວລີເບຍໄດ້ຂັບໄລ່ ມວມມາ ກາດດາຟີ ອອກຈາກອໍານາດ.
ທ່ານ Mustafa Abdel Jalil ປະທານສະພາ NTC ມີກໍານົດທີ່ຈະເຈລະຈາໃນນະຄອນ
ຫລວງທຣິໂປລີກັບທ່ານ Jeffrey Feltman ລັດຖະມົນຕີຊ່ວຍວ່າການຕ່າງປະເທດສະຫະ
ລັດ ຮັບຜິດຊອບກິດຈະການເຂດຕາເວັນອອກໄກ້.
ກອງປະຊຸມດັ່ງກ່າວມີຂຶ້ນນຶ່ງມື້ ຫລັງຈາກທະນາຄານໂລກ ໄດ້ປະກາດຮັບຮູ້ລັດຖະບານຊົ່ວ ຄາວລີເບຍ ແລະກ່າວວ່າ ຕົນຈະປະຕິບັດງານເພື່ອຊ່ວຍເຫລືອໃນໄລຍະຂ້າມຜ່ານຂອງ ປະເທດນັ້ນ.
ທະນາຄານໂລກກ່າວໃນຖະແຫລງການສະບັບນຶ່ງເມື່ອວັນອັງຄານວານນີ້ ວ່າການຕັດສິນ ໃຈຮັບຮູ້ຂອງຕົນນັ້ນ ແມ່ນອີງໃສ່ເຫດການຕ່າງໆໃນລີເບຍ ແລະຈາກທັດສະນະຂອງພວກ ປະເທດສະມາຊິກຂອງຕົນ ນອກນີ້ແລ້ວ ທະນາຄານໂລກຍັງໄດ້ເວົ້າວ່າ ຕົນໄດ້ຖືກຂໍຮ້ອງ ໃຫ້ກວດສອບເບິ່ງ ຄວາມຈໍາເປັນສໍາລັບການສ້ອມແປງລະບົບນໍ້າປະປາ ພະລັງງານ ແລະ ພາກສ່ວນການຂົນສົ່ງຕ່າງໆຂອງລີເບຍແລະຊ່ວຍເຫລືອພາກສ່ວນທະນາ ຄານຂອງປະເທດ ໃນການຮ່ວມກັນກັບອົງການກອງທຶນສາກົນ IMF.
ກະຊວງຕ່າງປະເທດສະຫະລັດກ່າວໃນວັນອັງຄານວານນີ້ວ່າ ນາຍ Saadi ລູກຊາຍຂອງ ທ່ານກາດດາຟີ ກໍາລັງຖືກກັກຕົວໄວ້ຢູ່ໃນບ້ານພັກ ຮັບຮອງແຂກຫລັງນຶ່ງຂອງປະເທດ Niger ຫລັງຈາກຜູ້ກ່ຽວໄດ້ຂ້າມເຂົ້າ ໄປໃນປະເທດດັ່ງກ່າວ ເມື່ອຕົ້ນອາທິດນີ້. ໂຄສົກຍິງ ຄົນນຶ່ງຂອງກະຊວງຕ່າງປະເທດສະຫະລັດກ່າວວ່າ ມັນເໝາະສົມແລ້ວສໍາລັບ Niger ແລະ ສະພາປົກຄອງໄລຍະຂ້າມຜ່ານແຫ່ງຊາດລີເບຍ ຈະດຳເນີນງານຮ່ວມກັນກ່ຽວກັບບັນຫານີ້ ແລະກໍຂຶ້ນຢູ່ ກັບສະພາ NTC ທີ່ຈະເປັນຜູ້ຕັດສິນໃຈວ່າຈະດໍາເນີນການຢ່າງໃດ.
ພວກເຈົ້າໜ້າທີ່ໃນປະເທດ ໄນເຈີ ກ່າວວ່າ ພວກຄົນໄກ້ຊິດຂອງກາດດາຟີ 32 ຄົນ ໄດ້ຫລົບໜີໄປຍັງປະເທດດັ່ງກ່າວ ນັບຕັ້ງແຕ່ ວັນທີ່ 2 ເດືອນກັນຍານີ້.
ຂະນະດຽວກັນ ພວກຊາວເມືອງຈາກທີ່ໝັ້ນຍັງຫລົງເຫລືອແຫ່ງນຶ່ງຂອງກາດດາຟີ ໄດ້ພາກັນຫລົບໜີເມື່ອວັນອັງຄານວານນີ້ ໃນຂະນະທີ່ອົງການເນໂຕ້ ແລະພວກນັກລົບຂອງສະພາ NTC ຍັງສືບຕໍ່ໂຈມຕີກໍາລັງຂອງກາດດາຟີຕໍ່ໄປນັ້ນ. ພວກເຫັນເຫດການກ່າວວ່າ ມີລົດຫລາຍສິບຄັນແລ່ນອອກໄປຈາກເມືອງ Bani Walid ໃນຂະນະທີ່ຍົນຂອງເນໂຕ້ບິນວົນຢູ່ເໜືອຫົວ.
