ຜູ້ນຳຂອງລີເບຍທ່ານ Moammar Gadhafi ໄດ້ສົ່ງ
ຜູ້ແທນຄະນະນຶ່ງໄປຮ່ວມກອງປະຊຸມສັນນິບາດອາຣັບ
ທີ່ມີກຳນົດຈະປຶກສາຫາລືກ່ຽວກັບວິກິດການໃນລີເບຍ.
ຄະນະຜູ້ແທນຂອງລີເບຍ ໄດ້ເດີນທາງໄປເຖິງນະຄອນ
ຫຼວງໄຄໂຣ ໃນວັນສຸກມື້ນີ້ນຶ່ງມື້ກ່ອນກອງປະຊຸມຈະໄຂ
ຂຶ້ນ. ສັນນິບາດອາຣັບໄດ້ໂຈະການເປັນສະມາຊິກຂອງ
ລີເບຍ ເພື່ອເປັນການປະທ້ວງຕໍ່ການໂຈມຕີຂອງລັດຖະ
ບານຕໍ່ພວກພົນລະເຮືອນ ທີ່ຮຽກຮ້ອງໃຫ້ຂັບໄລ່ຜູ້ນຳ
ຂອງລີເບຍອອກຈາກອຳນາດນັ້ນ.
ຍັງບໍ່ທັນເປັນທີ່ຈະແຈ້ງເທື່ອວ່າ ສັນນິບາດອາຣັບຈະອະນຸ
ຍາດໃຫ້ຄະນະຜູ້ແທນຂອງລີເບຍພາຍໃຕ້ການນຳພາຂອງ
ລັດຖະມົນຕີໄຟຟ້າທ່ານ Umran Abu-Kra’a ເຂົ້າຮ່ວມ
ການປະຊຸມຫຼືບໍ່.
ໃນວັນພະຫັດວານນີ້ ທຳນຽບຂາວກ່າວວ່າ ສະຫະລັດ
ພວມຈັດສົ່ງຄະນະບັນເທົາທຸກໄປຍັງເຂດທີ່ຢູ່ພາຍໃຕ້ການຄວບຄຸມຂອງກຸ່ມຝ່າຍຄ້ານຫຼື
ພວກຕໍ່ຕ້ານລັດຖະບານຢູ່ໃນພາກຕາເວັນອອກປະເທດລີເບຍຊຶ່ງເປັນບາດກ້າວລ່າສຸດ
ໃນການເຄື່ອນໄຫວຫຼາຍໆຢ່າງທີ່ນຳເອົາບັນດາປະເທດຕາເວັນຕົກໃກ້ເຂົ້າໄປຫຼາຍຂຶ້ນຕໍ່
ການຮັບຮູ້ພວກຕໍ່ຕ້ານລັດຖະບານໃນລີເບຍຢ່າງເປັນທາງການນັ້ນ.
ກ່ອນໜ້ານີ້ ລັດຖະມົນຕີການຕ່າງປະເທດສະຫະລັດທ່ານນາງ Hillary Clinton ກ່າວໃນ
ວັນພະຫັດມື້ວານນີ້ວ່າສະຫະລັດກຳລັງເພັ່ງເລັງໃສ່ການເສີມສ້າງຄວາມສຳພັນກັບກຸ່ມ
ຝ່າຍຄ້ານໃນລີເບຍ. ທ່ານນາງໃຫ້ຄຳໝັ້ນສັນຍາ ທີ່ຈະພົບປະກັບບັນດາຜູ້ຕາງໜ້າຂອງ
ພວກຝ່າຍຄ້ານຢູ່ໃນສະຫະລັດແລະໃນລະຫວ່າງທີ່ທ່ານ ນາງເດີນທາງໄປຢ້ຽມຢາມປະເທດ
ອີຈິບ ແລະຕູນີເຊຍໃນສັບປະດາໜ້າ.
