ປະທານາທິບໍດີບາຣັກໂອບາມາແຫ່ງສະຫະລັດກ່າວວ່າ ທາງເລືອກຕ່າງໆໃນຂອບເຂດ
ກວ້າງຂວາງ ຮວມທັງການປະຕິບັດງານທາງທະຫານກໍາລັງຢູ່ໃນການພິຈາລະນາ ເພື່ອ
ຮັບມືກັບອັນທີ່ທ່ານເອີ້ນວ່າ ຄວາມຮຸນແຮງທີ່ຮັບເອົາບໍ່ໄດ້ ທີ່ພວກກໍາລັງນິຍົມກາດດາ
ຟີພວມກະທຳໄປໃນລີເບຍນັ້ນ.
ໃນການຖະແຫລງທີ່ທໍານຽບຂາວໃນວັນຈັນວານນີ້ ປະທານາທິບໍດີໂອບາມາ ຍັງໄດ້
ເຕືອນພວກທີ່ສືບຕໍ່ໃຫ້ການສະໜັບສະໜຸນຕໍ່ຜູ້ນໍາລີເບຍວ່າ ພວກເຂົາຈະເປັນຜູ້ຮັບຜິດ
ຊອບໃນຄວາມຮຸນແຮງໃດໆກໍຕາມທີ່ຍັງ ດຳເນີນຢູ່ຕໍ່ມາໃນລີເບຍນັ້ນ.
ໃນຕອນແລງວັນຈັນວານນີ້ ໂຄສົກປະຈໍາທໍານຽບຂາວກ່າວວ່າ ທາງເລືອກຕ່າງໆທີ່ກໍາ
ລັງພິຈາລະນາຢູ່ນີ້ ແມ່ນຮວມທັງການຕັ້ງເຂດຫ້າມການບິນຂຶ້ນແລະຈັດຕັ້ງປະຕິບັດການ
ຫ້າມສົ່ງອາວຸດຂອງສະຫະປະຊາຊາດນັ້ນ. ໂຄສົກທ່ານນີ້ຍັງກ່າວເຊ່ນກັນວ່າການໃຫ້ອາ
ວຸດແກ່ກໍາລັງຝ່າຍກະບົດແມ່ນນຶ່ງໃນບັນດາທາງເລືອກຕ່າງໆທີ່ເປັນໄປໄດ້ ແຕ່ຢ່າງໃດກໍ
ດີ ທ່ານເອີ້ນການເອົາບາດກ້າວດັ່ງກ່າວນີ້ວ່າ ເປັນການບາດກ້າວທີ່ຍັງໄວເກີນໄປ.
ທ່ານໂອບາມາໄດ້ເພ່ງເລັງໃສ່ການເອົາບົດບາດຂອງກຸ່ມເນໂຕ ເພື່ອຮັບມືກັບຄວາມຮຸນແຮງໃນລີເບຍ ແຕ່ເຈົ້າໜ້າທີ່ຂັ້ນສູງຂອງກຸ່ມເນໂຕ ກ່າວວ່າ ທາງກຸ່ມພັນທະມິດບໍ່ມີຄວາມຕັ້ງໃຈທີ່ຈະເຂົ້າແຊກແຊງໃນການລຸກຮືຂຶ້ນຕໍ່ຕ້ານລັດຖະບານຂອງລີເບຍໃນເວລານີ້.
