ສັນນິບາດຊາດອາຣັບ ກ່າວວ່າ ຕົນສະໜັບສະໜຸນການຈັດຕັ້ງເຂດຫ້າມບິນເໜືອ ລີເບຍນັ້ນ.
ບັນດາລັດຖະມົນຕີຕ່າງປະເທດຂອງກຸ່ມສັນນິບາດຊາດອາຣັບ ທີ່ມີສະມຊິກ 22 ປະເທດນັ້ນ ໄດ້ປະກາດການຕັດສິນໃຈຂອງພວກຕົນໃຫ້ຮູ້ໃນວັນເສົາວານນີ້ ຫລັງຈາກການພົບປະຫາລືກັນທີ່ກຸງໄຄໂຣ ນະຄອນຫລວງຂອງອີຈິບ. ກຸ່ມດັ່ງກ່າວເວົ້າວ່າ ພວກຕົນຈະຮຽກຮອງໃຫ້ສະພາຄວາມໝັ້ນຄົງສະຫະປະຊາຊາດວາງຂໍ້ຫ້າມດັ່ງກ່າວ.
ພວກລັດຖະມົນຕີເຫລົ່ານີ້ ກ່າວວ່າ ຜູ້ນໍາລັດຖະບານລີເບຍ ທ່ານ Moammar Gadhafi ສູນເສຍຄວາມຖືກຕ້ອງຊອບທໍາຕາມກົດໝາຍຂອງຕົນແລ້ວ. ນອກນັ້ນສັນນິບາດຊາດອາຣັບຍັງປະກາດໃຫ້ຮູ້ອີກວ່າ ຕົນຈະເປີດການໂອ້ລົມສົນທະນາກັບກຸ່ມສະພາແຫ່ງຊາດຂອງລີເບຍ ອັນເປັນກຸ່ມຝ່າຍຄ້ານຢູ່ໃນເມືອງ Benghazi ທາງພາກຕາເວັນອອກຂອງປະເທດນັ້ນ.
ທໍານຽບຂາວກ່າວວ່າ ຕົນຍິນດີນໍາທ່າທີດັ່ງກ່າວຂອງສັນນິບາດຊາດອາຣັບ ໂດຍກ່າວວ່າ ປະຊາຄົມນາໆຊາດເປັນເອກະພາບກັນໃນການສົ່ງສານທີ່ຈະແຈ້ງ ບອກວ່າ ຄວາມຮຸນແຮງໃນລີເບຍຈະຕ້ອງຢຸດຕິລົງ.
ທ່ານ Mustafa Abdel-Jalil ຜູ້ນໍາກຸ່ມຝ່າຍຄ້ານ ສະພາແຫ່ງຊາດລີເບຍນັ້ນ ໄດ້ສະແດງຄວາມເຫັນດີນໍາການຈັດຕັ້ງເຂດການຫ້າມບິນດັ່ງກ່າວ ໃນການໃຫ້ສໍາພາດກັບພວກອົງການຂ່າວຝ່າຍຕາເວັນຕົກໃນເຊົ້າວັນເສົາວານນີ້.
