ປະທານາທິບໍດີບາຣັກ ໂອບາມາ ໄດ້ອອກມາຮຽກຮ້ອງໃຫ້ຜູ້ນໍາລີເບຍ ທ່ານມວມມາ ກາດ
ດາຟີ ສະລະອໍານາດດຽວນີ້ຊະ ໂດຍກ່າວວ່າພະລັງເຄື່ອນໄຫວທີ່ຕໍ່ຕ້ານທ່ານນັ້ນ ໄດ້ມາເຖິງ
ຈຸດທີ່ຈະເຮັດໃຫ້ທ່ານລົ້ມລົງແລ້ວ.
ໃນຖະແຫລງການສະບັບນຶ່ງທີ່ອອກໃນແລງວັນອາທິດວານນີ້ ຫລັງຈາກພວກກະບົດໄດ້ທໍາ
ຄວາມຄືບໜ້າເຂົ້າໄປໃນນະຄອນຫລວງຕຣີໂປລີແລ້ວນັ້ນ ທ່ານ ໂອບາມາກ່າວວ່າ ທ່ານ
ກາດດາຟີຈະຕ້ອງຍອມຮັບຮູ້ວ່າ ທ່ານບໍ່ໄດ້ຄວບຄຸມປະເທດຕໍ່ໄປອີກແລ້ວ.
ທ່ານໂອບາມາຍັງກ່າວອີກວ່າ ສະຫະລັດຈະສືບຕໍ່ດໍາເນີນງານກັບປະຊາຄົມນາໆຊາດ ເພື່ອ
ສະໜັບສະໜຸນການຫັນປ່ຽນຢ່າງສັນຕິໄປສູ່ລະບອບປະຊາທິປະໄຕໃນລີເບຍນັ້ນ ແລະຮຽກ
ຮ້ອງສະພາປົກຄອງຊາດລະຍະຂ້າມຜ່ານຂອງຝ່າຍຄ້ານ ໃຫ້ຮວມເອົາຜົນປະໂຫຍດຕ່າງໆ
ຂອງປະຊາຊົນລີເບຍທັງໝົດ.
ໃນເຊົ້າວັນອາທິດວານນີ້ ທ່ານ Anders Fogh Rasmussen ເລຂາທິການໃຫຍ່ອົງ
ການເນໂຕ້ກ່າວວ່າ ຍິ່ງທ່ານກາດດາຟີຮູ້ສຶກສໍານຶກວ່າ ຕົນບໍ່ສາມາດເອົາຊະນະການຕໍ່ສູ້
ໄດ້ໄວເທົ່າໃດ ກໍຍິ່ງເປັນການດີເທົ່ານັ້ນ.
