ພວກປະທ້ວງຕໍ່ຕ້ານລັດຖະບານລີເບຍໃນເມືອງ Zawiya ໃນພາກຕາເວັນຕົກຂອງປະເທດ ກໍາລັງກຽມຕົວພາກັນລໍຖ້າການໂຈມຕີໂຕ້ຕອບຄືນ ໂດຍພວກກໍາລັງທີ່ຈົງຮັກພັກດີຕໍ່ທ່ານ Moammar Gadhafi ຜູ້ນໍາລີເບຍໃນວັນຈັນມື້ນີ້ ໃນຂະນະທີ່ພວກກະບົດໃນພາກຕາເວັນອອກຂອງປະເທດ ປະກາດຈັດຕັ້ງຄະນະລັດຖະບານຊົ່ວຄາວຂຶ້ນແລະອະນຸຍາດໃຫ້ຮື້ຟືນການສົ່ງນໍ້າມັນອອກຂາຍຕ່າງປະເທດ ຈາກເຂດແດນທີ່ຢູ່ພາຍໃຕ້ການຄວບຄຸມຂອງພວກຕົນ.
ພວກຊາວເມືອງ Zawiya ຊຶ່ງຕັ້ງຢູ່ຫ່າງຈາກນະຄອນ
ຫລວງ Tripoli ໄປທາງກໍ້າຕາເວັນຕົກ ປະມານ 50
ຫລັກກິໂລແມັດ ກ່າວໃນຕອນແລງວັນອາທິດວານນີ້ວ່າ ພວກທະຫານນິຍົມທ່ານກາດດາຟີ
ປະມານ 2 ພັນຄົນໄດ້ອ້ອມເມືອງດັ່ງກ່າວໄວ້.
ບັນດານັກຂ່າວຝ່າຍຕາເວັນຕົກໃນເມືອງ Zawiya ໄດ້ພົບເຫັນວ່າ ເມືອງ Zawiya ຢູ່ໃນກໍາມືຢ່າງຮັດແໜ້ນຂອງພວກກະບົດ ຊຶ່ງພວກນາຍທະຫານທີ່ໂຕນໜີຈາກລັດຖະບານ ໄດ້ພາກັນສະແດງພວກລົດຖັງຂອງກອງທັບ ແລະຫ້າງປືນຕໍ່ຕ້ານອາກາດສະຍານຂອງເຂົາເຈົ້າໃສ່ລົດກະບະ ຕຽມພ້ອມສໍາລັບການໂຈມຕີທີ່ຄາດວ່າຈະມີຂຶ້ນນັ້ນ. ພວກນັກຂ່າວແຈ້ງໃຫ້ຊາບວ່າ ໄດ້ເຫັນປະຊາຊົນຫລາຍຮ້ອຍຄົນໂຮມຊຸມນຸມແລະຮ້ອງໂຮຄໍາຂວັນຕໍ່ຕ້ານທ່ານກາດດາຟີຕ່າງໆ ຕະຫລອດທັງຄວາມເສັຍຫາຍຢ່າງຫລວງລຫາຍ ຈາກການສູ້ລົບກັນໃນຫວ່າງໄວໆມານີ້. ເມືອງ Zawiya ຊຶ່ງເປັນເມືອງອຸດສາຫະກໍາທີ່ສໍາຄັນທີ່ຕັ້ງຢູ່ໃກ້ໆກັບທ່າເຮືອແຫ່ງນຶ່ງແລະໂຮງກັ່ນນໍ້າມັນຫລາຍແຫ່ງ ເປັນສູນກາງສໍາລັບທໍ່ລໍາລຽງນໍ້າມັນແລະແກສ ທີ່ໃຫຍ່ທີ່ສຸດຂອງລີເບຍ.
ໃນຂະນະດຽວກັນ ເຈົ້າໜ້າທີ່ີລີເບຍທ່ານນຶ່ງທີ່ເປັນຕົວແທນຂອງບໍລີສັດນໍ້າມັນອ່າວອາເຣບຽນ ອັນເປັນຜູ້ຜະລິດນໍ້າມັນລາຍໃຫຍ່ທີ່ສຸດຂອງປະເທດແລະເປັນແຫ່ງດຽວເທົ່ານັ້ນທີ່ຕົກຢູ່ໃນຄວາມຄອບຄອງຂອງຝ່າຍຄ້ານໃນພາກຕາເວັນອອກຂອງປະເທດ ກ່າວວ່າ ທາງບໍລິສັດໄດ້ເລີ້ມສົ່ງນໍ້າມັນອອກຄືນໃນວັນອາທິດວານນີ້ ໂດຍໄດ້ຂົນນໍ້າມັນໃສ່ກໍາປັ່ນບັນທຸກນໍ້າມັນ 2 ລໍາໃນທ່າເຮືອ Tobruk ນັ້ນ.
ທ່ານ Hassan Bulifa ຊຶ່ງເປັນສະມາຊິກຄົນນຶ່ງໃນຄະນະກໍາມະການບໍລິຫານງານຂອງບໍລິສັດນໍ້າມັນໃນອ່າວອາເຣບຽນ ກ່າວວ່າ ທ່ານຄາດວ່າ ກໍາປັ່ນບັນທຸກນໍ້າມັນລໍານຶ່ງໃນຈໍານວນກໍາປັ່ນສອງລໍານີ້ຈະແລ່ນອອກຈາກທ່າເຮືອ Tobruk ໃນຕອນແລງວັນອາທິດວານນີ້ ຊຶ່ງບັນຈຸນໍ້າມັນ 7 ແສນຖັງ ແລະກ່າວຕື່ມວ່າ ພວກກໍາປັ່ນບັນທຸກນໍ້າມັນເຫລົ່ານີ້ມຸ້ງໜ້າໄປສູ່ Austria ແລະຈີນ ຊຶ່ງເປັນການສົ່ງນໍ້າມັນອອກຖ້ຽວທໍາອິດຂອງບໍລິສັດນັບແຕ່ວັນທີ 10 ກຸມພາເປັນຕົ້ນມາ.
ໜັງສືພິມ New York Times ອ້າງຄໍາເວົ້າຂອງທ່ານ Bulifa ວ່າ ເວລານີ້ພວກກະບົດ ໄດ້ຄວບຄຸມຊັບສິນນໍ້າມັນຂອງປະເທດຢ່າງນ້ອຍ 80 ສ່ວນຮ້ອຍ ແລະວ່າ ບໍລິສັດຂອງທ່ານທີ່ຕັ້ງຢູ່ໃນເມືອງ Benghazi ທີ່ຢູ່ພາຍໃຕ້ການຄອບຄອງຂອງຝ່າຍຄ້ານ ກໍາລັງໃຫ້ການຮ່ວມໄມ້ຮ່ວມມືກັບພວກເຂົາເຈົ້າ.
