ອະດີດລັດຖະມຸນຕີຍຸຕິທໍາຂອງລີເບຍກ່າວວ່າ ທ່ານໄດ້ປະກອບຄະນະລັດຖະບານໄລຍະຂ້າມຜ່ານຂຶ້ນໃນພາກຕາເວັນອອກຂອງປະເທດ ອັນເປັນຈຸດລວມຂອງການລຸກຮືຂຶ້ນຕໍ່ຕ້ານທ່ານ Moammar Gadhafi ຜູ້ນໍາລີເບຍນັ້ນ.
ທ່ານ Mustafa Abdel Jalil ປະກາດຂ່າວນີ້ໃຫ້ຮູ້ໃນການໃຫ້ສໍາພາດກັບຕາໜ່າງໂທລະພາບ Al-Jazeera ທີ່ຕັ້ງຢູ່ໃນປະເທດ Quatar ໃນຄືນວັນເສົາວານນີ້.
ທ່ານ Abdel Jalil ກ່າວ່າຄະນະລັດຖະບານໄລຍະຂ້າມຜ່ານດັ່ງກ່າວແມ່ນຕັ້ງຢູ່ໃນເມືອງ Benghazi ເມືອງໃຫຍ່ອັນດັບສອງຂອງລີເບຍ ແລະປະກອບດ້ວຍບຸກຄົນສໍາຄັນໃນກອງທັບແລະພົນລະເຮືອນ. ທ່ານກ່າວຕໍ່ໄປວ່າ ມັນຈະໃຊ້ເວລາບໍ່ເກີນ 3 ເດືອນເພື່ອກະກຽມໃຫ້ມີການເລືອກຕັ້ງທີ່ຍຸຕິທໍາ ຊຶ່ງຈະເອື້ອອໍານວຍໃຫ້ປະຊາຊົນລີເບຍເລືອກເອົາຜູ້ນໍາຂອງຕົນເອງໄດ້ນັ້ນ.
ທ່ານ Abdel Jalil ໄດ້ລາອອກຈາກຕໍາແໜ່ງລັດຖະມຸນຕີກະຊວງຍຸຕິທໍາໃນສັບປະດາແລ້ວນີ້ ແລະເຂົ້າຮ່ວມໃນການປະຕິວັດທີ່ໄດ້ເລີ້ມຕົ້ນຂຶ້ນໃນຕົ້ນເດືອນນີ້ ຕໍ່ຕ້ານການປົກຄອງປະເທດມາເປັນເວລາ 42 ປີຂອງຜູ້ນໍາລີເບຍນັ້ນ.
ຍັງບໍ່ເປັນທີ່ຈະແຈ້ງເທື່ອວ່າ ລັດຖະບານຊົ່ວຄາວຂອງທ່ານ Jalil ໄດ້ຮັບການສະໜັບສະໜຸນໜ້ອຍຫລາຍສໍ່າໃດໃນພວກປະຊາຄົມຕ່າງໆ ທີ່ມີການຄັດຄ້ານຜູ້ນໍາລີເບຍນັ້ນ. ພວກປະທ້ວງຕໍ່ຕ້ານລັດຖະບານທີ່ໄດ້ຮັບການໜຸນຫລັງຈາກພວກໜ່ວຍທະຫານທີ່ຫລົບໜີຈາກກອງທັບລັດຖະບານ ໄດ້ເຂົ້າຄວບຄຸມໃນພາກຕາເວັນອອກຂອງລີເບຍແລະຫລາຍໆເຂດໃນພາກຕາເວັນຕົກ ຫລັງຈາກທໍາການຕໍ່ສູ້ກັບກໍາລັງທີ່ຈົງຮັກພັກດີຕໍ່ທ່ານ Moammar Gadhafi ນັ້ນແລ້ວ.
ທ່ານ Ali Aujali ເອກອັກຄະລັດຖະທູດລີເບຍປະຈໍາສະຫະລັດ ກ່າວໃນວັນເສົາວານນີ້ວ່າ ທ່ານສະໜັບສະໜຸນລັດຖະບານຊົ່ວຄາວທີ່ທ່ານ Abdel Jalil ຈັດຕັ້ງຂຶ້ນນັ້ນ. ທ່ານ Aujali ເປັນນຶ່ງໃນບັນດານັກການທູດລີເບຍຫລາຍຄົນໃນທົ່ວໂລກທີ່ໄດ້ຕັດສາຍພົວພັນຂອງຕົນກັບທ່ານ Gadhafi ນັບແຕ່ການລຸກຮືຂຶ້ນໄດ້ເລີ້ມຂຶ້ນມາ.
ກະຊວງການຕ່າງປະເທດສະຫະລັດບໍ່ໄດ້ສະແດງຄວາມຄິດເຫັນໃດໆກ່ຽວກັບການເຄື່ອນໄຫວຂອງທ່ານ Abdel Jalil ນີ້.
ທ່ານ Gadhafi ຍັງຄວບຄຸມຢູ່ໃນນະຄອນຫລວງ Tripoli ໃນພາກຕາເວັນຕົກສຽງເໜືອ ຂອງລີເບຍຢູ່. ພວກກໍາລັງປະກອບອາວຸດທີ່ຈົງຮັກພັກດີຕໍ່ທ່ານກັດດາຟີ ພາກັນທໍາການລາດຕາເວນໃນຕົວເມືອງ ໂດຍໃຊ້ຍານພາຫະນະທີ່ ແລ່ນໄດ້ໃນທຸກພື້ນທີ່ໃນວັນເສົາວານນີ້ ນຶ່ງມື້ຫລັງຈາກທ່ານໃຫ້ຄໍາໜັ້ນສັນຍາທີ່ສົ່ງອາວຸດຍຸດໂທ ປະກອນໃຫ້ແກ່ພວກສະໜັບສະໜຸນທ່ານເພື່ອປ້ອງກັນການນໍາພາຂອງທ່ານນັ້ນ.
