ທ່ານ Moammar Gadhafi ຜູ້ນໍາລີເບຍໄດ້ຮັດແໜ້ນອໍານາດຂອງຕົນໃນນະຄອນຫລວງ Tripoli ໃນຂະນະທີ່ກໍາລັງຕໍ່ຕ້ານລັດຖະບານໄດ້ເຂົ້າຄວບຄຸມເກືອບວ່າໝົດທຸກບ່ອນໃນເຄິ່ງນຶ່ງຂອງພາກຕາເວັນອອກຂອງປະເທດ.
ໃນເຊົ້າວັນພຸດມື້ນີ້ ການປາບປາມຢ່າງຮຸນແຮງໄດ້ຂັບໄລ່ພວກປະທ້ວງອອກໄປຈາກຖະໜົນຫົນທາງສາຍຕ່າງໆໃນກຸງ Tripoli ບ່ອນທີ່ພວກຊາວເມືອງບັນລະຍາຍວ່າ ໄດ້ມີການຍິງກັນຢ່າງປ່າເຖື່ອນແລະມີຊາກສົບຄົນຕາຍຢາຍຢູ່ຕາມຖະໜົນຫົນທາງສາຍຕ່າງໆນັ້ນ. ຫລັງຈາກການກ່າວປາສໄທາງທໂລະພາບໃນວັນອັງຄານມື້ວານນີ້ແລ້ວ ພັນເອກ Gadhafi ພ້ອມດ້ວຍພວກສະໜັບສະໜຸນຫລາຍພັນຄົນພາກັນໄປໂຮມຊຸມນຸມກັນທີ່ຈະຕຸລັດ Green ໃນໃຈກາງເມືອງ ໃສ່ເສື້ອລາຍສີຂຽວແລະແກ່ວງພ້າອີ່ໂຕ້ຂອງເຂົາເຈົ້າ. ພວກຊາວເມືອງກ່າວວ່າ ບໍ່ມີພວກປະທ້ວງຕໍ່ຕ້ານລັດຖະບານຄົນໃດກ້າອອກໄປນອກເຮືອນຂອງເຂົາເຈົ້າຫລັງຈາກຄໍ່າມືດແລ້ວ.
ພວກຊາວເມືອງໃນກຸງ Tripoli ບັນລະຍາຍການກະທໍາແບບປ່ວງບ້າຂອງພວກທະຫານບ້ານນິຍົມທ່ານ Gadhafi ຊຶ່ງເປັນກໍາລັງປະສົມລະຫວ່າງຊາວລີເບຍກັບພວກກໍາລັງຮັບຈ້າງຈາກຕ່າງປະເທດ ທີ່ພາກັນຍິງຜູ້ຄົນໃດກໍຕາມທີ່ເຫັນຢູ່ຕາມຖະໜົນຫົນທາງນັ້ນ ໂດຍຍິງປືນກົນສາດໃສ່ພວກຝູງຊົນຈາກຍວດຍານພາຫະນະທີ່ພວກເຂົາຂັບໄປໄວໆນັ້ນ.
ອົງການປົກປ້ອງສິດທິມະນຸດ Human Rights Watch ກ່າວວ່າ ຕົນໄດ້ຮັບລາຍງານຫລາຍສະບັບທີ່ວ່າມີປະຊາຊົນຢ່າງນ້ອຍ 62 ຄົນເສຍຊີວິດໄປໃນກຸງ Tripoli ນັບແຕ່ວັນອາທິດຜ່ານມາ ນອກຈາກພວກທີ່ເສຍຊີວິດໄປແລ້ວ 233 ຄົນນັ້ນ ຊຶ່ງສ່ວນຫລາຍແມ່ນຢູ່ໃນແຂວງຕ່າງໆໃນພາກຕາເອອກຂອງປະເທດ. ບັນດາກຸ່ມຝ່າຍຄ້ານກ່າວວ່າ ຈໍານວນຜູ້ເສຍຊີວິດແມ່ນຫລາຍກວ່ານັ້ນ.
