ທ່ານ Moammar Gadhafi ຜູ້ນໍາລີເບຍກໍາລັງສູນເສຍ
ການສະໜັບ ສະໜຸນຈາກບຸກຄົນສໍາຄັນໆໃນວົງການລັດ
ຖະບານຂອງທ່ານໃນຂະນະທີ່ພວກເຈົ້າໜ້າທີ່ລີເບຍ ຢູ່
ພາຍໃນປະເທດແລະຕ່າງປະເທດ ພາກັນລາອອກ ຫລື
ບໍ ກໍໂຕນໜີໃນການຕອບໂຕ້ຕໍ່ການປາບປາມຢ່າງນອງ
ເລືອດຕໍ່ພວກປະທ້ວງໃນທົ່ວປະເທດ ທີ່ທວງໃຫ້ທ່ານລາ
ອອກກຈາກຕໍາແໜ່ງນັ້ນ.
ໂທລະພາບຂອງລີເບຍໄດ້ຖ່າຍທອດພາບຂອງທ່ານ Gadhafi ເປັນເວລາສັ້ນໆໃນວັນຈັນວານນີ້ ໃນຂະນະທີ່ທ່ານປ່ອນຫົວອອກມາຈາກບ່ອນນັ່ງທາງໜ້າຂອງລົດຕູ້ ແລະຖືຄັນຮົ່ມໃຫຍ່ຄັນນຶ່ງ ພ້ອມກັບກ່າວວ່າ ທ່ານຍັງຢູ່ໃນນະຄອນຫລວງຂອງລີເບຍແລະບໍ່ແມ່ນຢູ່ໃນປະເທດ Venezuela ຕາມທີ່ມີຂ່າວນັ້ນ ຊຶ່ງນັບວ່າເປັນການຖະແຫລງຕໍ່ສາທາລະນະຊົນຄັ້ງທໍາອິດຂອງທ່ານ ນັບແຕ່ການເດີນຂະບວນປະທ້ວງໄດ້ເລີ້ມຂຶ້ນໃນພາກຕາເວັນອອກຂອງລີເບຍໃນວັນຈັນສັບປະ ດາແລ້ວນີ້ ແລະຕໍ່ມາໄດ້ລາມໄປຮອດກຸງ Tripoli ນັ້ນ. ການປະທ້ວງຄັ້ງນີ້ ແມ່ນ ເປັນການທ້າທາຍຄັ້ງໃຫຍ່ທີ່ສຸດຕໍ່ການຄອງອໍານາດຂອງທ່ານກາດດາຟີມາເປັນເວລາ 42 ປີ.
ບັນດານັກການທູດລີເບຍໃນຫລາຍປະເທດພາກັນປະກາດອອກມາວ່າ ພວກຕົນໄດ້ຕັດສາຍພົວພັນກັບທ່ານ Gadhafi ແລ້ວ ເພື່ອປະທ້ວງຕໍ່ການໂຈມຕີຂອງກໍາລັງຂອງທ່ານຕໍ່ພວກປະທ້ວງຕໍ່ຕ້ານລັດຖະບານນັ້ນ.
ເອກອັກຄະລັດຖະທູດລີເບຍປະຈໍາສະຫະປະຊາຊາດ ທ່ານ Ali Aujali ກ່າວຕໍ່ອົງການຂ່າວ AP ວ່າ ທ່ານເຊື່ອວ່າ ທ່ານ Gadhafi ຄວນຈະລາອອກຈາກຕໍາແໜ່ງ. ພວກສະຖານທູດຂອງລີເບຍໃນມາເລເຊຍແລະອອສເຕຣເລຍ ກໍກ່າວວ່າ ພວກເຂົາເຈົ້າບໍ່ໄດ້ຕາງໜ້າທ່ານ Gadhafi ອີກແລ້ວ.
ທ່ານ Ali al-Essawi ເອກອັກຄະລັດຖະທູດລີເບຍປະຈໍາອິນເດຍໄດ້ ລາອອກຈກຕໍາແໜ່ງໃນວັນຈັນວານນີ້ເພື່ອຕອບໂຕ້ຕໍ່ອັນທີ່ທ່ານເອີ້ນວ່າ ຄວາມຮຸນແຮງທີ່ຮັບເອົາບໍ່ໄດ້ ທີ່ຮວມທັງການຖິ້ມລະເບີດທາງອາກາດໃສ່ພວກພົນລະເຮຶອນນັ້ນນໍາ. ນັກການທູດລີເບຍຂັ້ນອາວຸໂສທ່ານນຶ່ງທີ່ນະຄອນຫລວງປັກກິງຂອງຈີນ ກ່າວວ່າ ທ່ານກໍໄດ້ລາອອກຈາກຕໍາແໜ່ງເຊ່ນກັນ ແລະຮຽກຮ້ອງໃຫ້ພວກນັກການທູດຄົນອື່ນໆເຮັດຄືກັນ.
ພວກທີ່ເຫັນເຫດການໃນກຸງ Tripoli ກ່າວວ່າ ພວກເຮືອບິນເຮລີຄອນເຕີ ແລະຝູງເຮືອບິນລົບຂອງລີເບຍໄດ້ທໍາການໂຈມຕີໃສ່ເຂດພົນລະ ເຮືອນຫລາຍແຫ່ງ ໃນວັນຈັນວານນີ້ ໃນຂະນະທີ່ພວກກໍາລັງຮັບຈ້າງມາຈາກທະວີບອາຟຣິກາແລະພວກມືປືນທີ່ນິຍົມ Gadhafi ເປີດສາກຍິງປືນຢ່າງບໍ່ເລືອກໜ້າ ເພື່ອຂູ່ຂວັນປະຊາຊົນ. ໂທລະພາບແຫ່ງລັດ ຂອງລີເບຍກ່າວໃນວັນອັງຄານມື້ນີ້ວ່າ ລາຍງານສື່ມວນຊົນຕ່າງປະເທດທີ່ວ່າມີການຂ້າລ້າງຜານປະຊົນເປັນໝູ່ໃນປະເທດນັ້ນ ເປັນການຕົວະ ລ່າຍ ທີ່ມີວັດຖຸປະສົງເພື່ອທໍາລາຍຂວັນຂອງປະຊາຊົນ.
ກ່ອນໜ້ານີ້ ໂທລະພາບລີເບຍກ່າວວ່າ ພວກກໍາລັງຮັກສາຄວາມປອດໄພທີ່ຈົງຮັກພັກດີຕໍ່ທ່ານ Gadhafi ໄດ້ທໍາການໂຈມຕີບ່ອນລີ້ຊ່ອນຂອງພວກຈາລະກໍາ ໂດຍບໍ່ໃຫ້ລາຍລະອຽດໃດໆເພີ່ມຕື່ມ. ນອກນັ້ນ ໂທລະພາບຍັງໄດ້ອ້າງຄໍາເວົ້າຂອງທ່ານ Saif al-Islam ລູກຊາຍ ຂອງທ່ານ Gadhafi ທີ່ກ່າວວ່າ ຝູງເຮືອບິນລົບຂອງລີເບຍພຽງແຕ່ໂຈມຕີພວກສາງເກັບລູກກະສູນເທົ່ານັ້ນ.
