ລິ້ງ ສຳຫລັບເຂົ້າຫາ

ເຈົ້າໜ້າທີ່ລີເບຍ ເຊື່ອວ່າ ກາດດາຟີລີ້ຊ່ອນ ຢູ່ໃກ້ຊາຍແດນອາລຈີເຣຍ

  • ສິງ ບູຣົມມະວົງ

ທ່ານມວມມາ ກາດດາຟີ ອະດີດຜູ້ນໍາລີເບຍ. ວັນທີ 28 ກັນຍາ 2011.

ບັນດາ​ເຈົ້າ​ໜ້າ​ທີ່​ອໍານາດ​ປົກຄອງ​ຊົ່ວຄາວ​ລີ​ເບຍ​ກ່າວ​ວ່າ ທາງ​ກອ​ງທັບ​ເຊື່ອ​ວ່າ ອະດີດ
ຜູ້​ນໍາມວມມາ​ກາດ​ດາ​ຟີ​ອາດຈະ​ລີ້ຊ່ອນ​ຢູ່​ໃນ​ເມືອງ Ghadamis ​ໃນ​ພາກ​ຕາ​ເວັນ​ຕົກ​
ຂອງ​ປະ​ເທດ​ໃກ້ໆ​ກັບ​ຊາຍ​ແດນອາລຈິ​ເຣຍກໍ​ເປັນ​ໄດ້.

ບັນດາ​ເຈົ້າ​ໜ້າ​ທີ່​ກ່າວ​ໃນ​ວັນ​ພຸດ​ມື້​ນີ້​ວ່າ ​ເຂົາ​ເ​ຈົ້າ​ເຊື່ອເຊ່ນ​ກັນວ່າ ທ່ານ​ກາດ​ດາ​ຟີ​ຢູ່​ພາຍ​ໃຕ້​
ຄວາມ​ອາລັກຂາ​ຂອງ​ຊົນ​ເຜົ່າ Tuaregs. ອະດີດຜູ້​ນໍາ​ລີ​ເບຍ​ເຄີຍ​ໃຫ້ການ​ສະໜັບສະໜຸນ​ຕໍ່​
ການ​ກໍ່​ການ​ກະບົດ​ຂອງ​ຊົນເຜົ່າ Tuareg ​ໃນ​ພາກ​ເໜືອ​ຂອງ​ໄນ​ເຈີ ​ແລະ​ພວກ​ອະດີດ​ກະບົດ
ຊົນເຜົ່າ Tuareg ​ຫລາຍ​ຮ້ອຍຄົນ​ໄດ້​ທໍາ​ການ​ຕໍ່ສູ້​ໃຫ້​ທ່ານ.

ບັນດາ​ເຈົ້າ​ໜ້າ​ທີ່ສະພາ​ໄລຍະ​ຂ້າມ​ຜ່ານ​ແຫ່ງ​ຊາດ​ເຄີຍ​ກ່າວ​ມາ​ກ່ອນ​ວ່າ ທ່ານ​ກາດ​ດາ​ຟີ​ໄດ້​ລີ້
ຊ່ອນ​ຢູ່​ໃນ​ເມືອງ Bani Walid ທາງ​ກໍ້າ​ຕາ​ເວັນ​ອອກສຽງ​ໃຕ້ຂອງ​ນະ​ຄອນ​ຫລວງ​ຕຣີ​ໂປ​ລີ
ຂະ​ນະ​ທີ່ລາຍ​ງານຂ່າວ​ອື່ນໆ ກ່າວ​ວ່າ ທ່ານ​ກາດ​ດາ​ຟີ​ອາດ​ຈະ​ລີ້​ຊ່ອນ​ຢູ​ໃນ​ພາກ​ໃຕ້​ຂອງ​ປະ​
ເທດ​ກໍ​ເປັນ​ໄດ້​ນັ້ນ. ທ່ານ​ກາດ​ດາ​ຟີ​ໄດ້​ຫາຍ​ໂຕ​ໄປ​ນັບ​ຕັ້ງ​ແຕ່​ພວກ​ກໍາລັງ​ຕໍ່ ຕ້ານ​ກາດ​ດາ​ຟີ​
ໄດ້​ຍຶດ​ເອົາ​ນະຄອນຫລວງ​ຕຣີ​ໂປ​ລີ​ໃນ​ເດືອນ​ແລ້ວ​ນີ້ເປັນ​ຕົ້ນ​ມາ.

ການ​ຕໍ່ສູ້​ກັນ​ຢ່າງ​ໜັກ​ໃນ​ເມືອງ Sirte ຂອງ​ລີ​ເບຍ​ທີ່​ຖືກ​ປິດ​ລ້ອມຢູ່ນັ້ນ ໄດ້​ເຮັດ​ໃຫ້​ກໍາລັງ​
ຂອງ​ຝ່າຍ​ອໍານາດ​ປົກຄອງ​ຊົ່ວຄາວບໍ່ສາມາດ​ເຄື່ອນ​ຄືບ​ໜ້າ​ເຂົ້າໄປ​ໃນເມືອງດັ່ງກ່າວຊຶ່ງເປັນ
ທີ່​ໝັ້ນ​ແຫ່ງ​ນຶ່ງ​ໃນ​ຈໍານວນ​ທີ່​ໝັ້ນ​ບໍ່​ເທົ່າ​ໃດ​ແຫ່ງ​ທີ່​ຍັງ​ເຫລືອຢູ່ຂອງພວກສະະໜັບສະໜຸນ​
ທ່ານ​ກາດ​ດາ​ຟີ​ນັ້ນ.

ກໍາລັງ​ຂອງ​ສະພາ​ໄລຍະ​ຂ້າມ​ຜ່ານ​ແຫ່ງ​ຊາດ ຫລື NTC ​ໄດ້​ຍຶດ​ເອົາທ່າ​ກໍາ​ປັ່ນ​ຂອງເມືອງ
Sirte ໄດ້ແລ້ວ ແຕ່​ພວກ​ກໍາລັງ​ຈົງ​ຮັກ​ພັກດີ​ຕໍ່​ທ່ານ​ກາດ​ດາ​ຟີ​ຍັງ​ຄວບ​ຄຸມ​ພາກ​ພື້ນ​ສ່ວນ
ຫລາຍ​ໃນ​ເມືອງດັ່ງກ່າວ.

ກຸ່ມ​ເນ​ໂຕ້​ກ່າວ​ໃນ​ວັນ​ອັງຄານ​ວານ​ນີ້​ວ່າ ພວກ​ພົນລະ​ເຮືອນ​ປະມານ 2 ແສນ​ຄົນ ສ່ວນ​
ໃຫຍ່​ໃນ​ເມືອງ Sirte ​ແລະ​ເມືອງ Bani Walid ຍັງ​ຖືກ​ຂົ່ມຂູ່​ໂດຍ​ພວກ​ກໍາລັງ​ນິຍົມ​ກາດ
ດາ​ຟີ​ຢູ່.

XS
SM
MD
LG