ພວກຜູ້ນໍາລັດຖະບານຊົ່ວຄາວໃນລີເບຍ ໄດ້ກໍານົດເອົາວັນອາທິດມື້ນີ້ ເປັນວັນສິ້ນສຸດລົງ
ຢ່າງເປັນທາງການຂອງການລຸກຮືເພື່ອໂຄ່ນລົ້ມອະດີດຜູ້ນໍາຜະເດັດການ ມວມມາ ກາດ
ດາຟີ ນັ້ນ.
ການສິ້ນສຸດລົງຢ່າງເປັນທາງການຂອງການປະຕິວັດ ຫລັງຈາກມີການສູ້ລົບກັນຢ່າງຕໍ່
ເນຶ່ອງມາໄດ້ຫລາຍເດືອນ ຈະເປັນການແຜ້ວທາງໃຫ້ແກ່ ການເລິ່ມຕົ້ນຂັ້ນຕອນເພື່ອທໍາ
ການເລືອກຕັ້ງ ຮ່າງລັດຖະທໍາມະນູນໃໝ່ ແລະຈັດຕັ້ງລັດຖະບານຊຸດໃໝ່ ຫລັງຈາກການ
ປົກຄອງປະເທດມາໄດ້ 42 ປີ ຂອງກາດດາຟີ.
ພວກເຈົ້າໜ້າທີ່ສະພາປົກຄອງໄລຍະຂ້າມຜ່ານແຫ່ງຊາດລີເບຍ ຫລື NTC ກ່າວເມື່ອວັນ
ເສົາວານນີ້ວ່າ ພິທີໃຫຍ່ຈະມີຂຶ້ນທີ່ Benghazi ເມືອງໃຫຍ່ທາງພາກຕາເວັນອອກຂອງ
ລີເບຍ ທີ່ໄດ້ກາຍເປັນສູນກາງສໍາຄັນຂອງການເຄຶ່ອນໄຫວຕໍ່ຕ້ານລັດຖະບານ ແລະຄາດ ວ່າຈະມີການສະເຫລີມສະຫລອງກັນໃນທົ່ວປະເທດ
ພິທີດັ່ງກ່າວແມ່ນຈະມີຂຶ້ນສາມວັນ ຫລັງຈາກກາດດາຟີຖືກສັງຫານຢູ່ໃກ້ໆ ເມືອງ Sirte
ບ້ານເກີດຂອງທ່ານ. ຮູບພາບວີດີໂອທີ່ຖ່າຍໂດຍໂທລະສັບມືຖື ສະແດງໃຫ້ເຫັນກາດດາ
ຟີບາດເຈັບແຕ່ຍັງບໍ່ຕາຍ. ແຕ່ພໍໄປຮອດໂຮງໝໍທ້ອງຖິ່ນແຫ່ງນຶ່ງ ກາດດາຟີກໍໄດ້ເສຍຊີວິດ
ແລ້ວ ຊຶ່ງກໍ່ໃຫ້ເກີດຄວາມເປັນຫ່ວງກັນວ່າພວກນັກລົບຝ່າຍ NTC ອາດໄດ້ສັງຫານ ຫລື
ອາດໄດ້ ທຸບຕີຜູ້ກ່ຽວຈົນຕາຍ.
ເວລານີ້ ໄດ້ມີການຮຽກຮ້ອງຈາກນານາຊາດແລ້ວ ໃຫ້ທໍາການສືບສວນກ່ຽວກັບການຕາຍ
ຂອງກາດດາຟີ. ແລະສະພາ NTC ກໍກໍາລັງພະຍາຍາມຕັດສິນໃຈວ່າ ຈະຝັງສົບກາດດາຟີ
ຢູ່ໃສແລະເວລາໃດ ສົບຜູ້ກ່ຽວໄດ້ດອຍໄວ້ໃນຫ້ອງແຊ່ເຢັນຢູ່ຮ້ານຂາຍຊີ້ນແຫ່ງນຶ່ງໃນເມືອງ
Misrata ບ່ອນທີ່ພວກທີ່ຄັດຄ້ານທັງຫລາຍ ພາກັນລຽນແຖວເຂົ້າໄປເບິ່ງແລະຖ່າຍຮູບສົບ
ຢ່າງດີອົກດີໃຈ.
ນອກນີ້ແລ້ວ ເມື່ອວັນເສົາວານນີ້ ທ່ານ Mahmoud Jibril ນາຍົກລັດຖະມົນຕີຊົ່ວຄາວ
ກ່າວວ່າການເລືອກຕັ້ງຄັ້ງທໍາອິດຈະຈັດຂຶ້ນພາຍໃນອີກ 8 ເດືອນຕໍ່ໜ້ານີ້ ຊຶ່ງພວກປ່ອນບັດ
ຈະໄດ້ເລືອກເອົາສະມາຊິກສະພາແຫ່ງຊາດ ທີ່ຈະຮ່າງລັດຖະທໍາມະນູນສະບັບໃໝ່ຂຶ້ນມາ.
ທີ່ຜ່ານມາ ທ່ານ Jibril ເຄີຍໄດ້ເວົ້າໄວ້ວ່າ ທ່ານຈະລາອອກເມື່ອໃດທີ່ ລີເບຍຖືກປົດປ່ອຍ
ຢ່າງແທ້ຈິງແລ້ວ. ຂ່າວຣອຍເຕີ ໄດ້ອ້າງເອົາຄໍາເວົ້າຂອງທ່ານທີ່ເວົ້າວ່າ ທ່ານຈະລາອອກ
ວັນເສົາວານນີ້. ທ່ານ Jibril ໃຫ້ທັດສະນະດັ່ງກ່າວ ຢູ່ທີ່ກອງປະຊຸມຂອງສະພາເສດຖະ
ກິດໂລກທີ່ປະເທດຈໍແດນ.
ເບິ່ງວີດີໂອກ່ຽວກັບການຕາຍຂອງກາດດາຟີ:
