ເຫດລະເບີດຫຼາຍໆຄັ້ງ ໄດ້ສັ່ນສະເທືອນນະຄອນຫຼວງຕຣີໂປລີຂອງລີເບຍ ໃນຕອນເຊົ້າ
ຂອງວັນສຸກມື້ນີ້. ຍັງບໍ່ທັນເປັນທີ່ຈະແຈ້ງເທື່ອວ່າ ມີຜູ້ບາດເຈັບລົ້ມຕາຍຫຼືບໍ່.
ໃນໄລຍະຫຼາຍໆຄືນຜ່ານມານີ້ ເຮືອບິນຂອງອົງການເນໂຕ້ ໄດ້ໂຈມຕີເປົ້າໝາຍ ຫຼາຍໆ
ບ່ອນໃນນະຄອນຕຣີໂປລີ ຮວມທັງບ້ານພັກແລະກອງບັນຊາການຂອງຜູ້ນຳລີເບຍທ່ານ
Moammar Gadhafi. ທ່ານ Gadhafi ບໍ່ຄ່ອຍປາກົດໂຕ ໃນທີ່ສາທາລະນະປານໃດ
ນັບແຕ່ການໂຈມຕີທາງອາກາດຂອງອົງການເນໂຕ້ ໄດ້ສັງຫານບຸດຊາຍຄົນນຶ່ງຂອງທ່ານ
ໃນເດືອນເມສາຜ່ານມາ.
ຂະນະດຽວກັນ ແມ່ຍິງລີເບຍຄົນນຶ່ງທີ່ກ່າວອ້າງວ່າລາວໄດ້ຖືກລຽນຄິວໂດຍທະຫານທີ່ຈົງ
ຮັກພັກດີຕໍ່ທ່ານ Gadhafi ນັ້ນໄດ້ຖືກບັງຄັບໃຫ້ເນລະເທດອອກຈາກກາຕ້າ ໃນວັນພະ
ຫັດວານນີ້ໄປຍັງເມືອງ Benghazi ທີ່ໝັ້ນຂອງພວກກະບົດໃນພາກຕາເວັນອອກຂອງລີ
ເບຍ.
ເຈົ້າໜ້າທີ່ຂອງອົງການອົບພະຍົບສະຫະປະຊາຊາດກ່າວວ່າ ນາງ Imad al-Obeidi ພວມ ລໍຖ້າການໄປຕັ້ງຖິ່ນຖານໃໝ່ໃນນາມອົບພະຍົບແລະອົງການ UNHCR ພວມຢູ່ໃນຂັ້ນຕອນ ກະກຽມເອກກະສານຕ່າງໆ ໃຫ້ແກ່ນາງ ເພື່ອເດີນທາງແຕ່ກາຕ້າໄປຍັງປະເທດທີສາມ. ເຈົ້າ
ໜ້າທີ່ກ່າວວ່າ ການເນລະເທດນາງ Obeidi ແມ່ນຂັດກັບກົດໝາຍລະຫວ່າງປະເທດ.
ໂຄສົກກະຊວງການຕ່າງປະເທດສະຫະລັດທ່ານ Mark Toner ກ່າວວ່າສະຫະລັດມີຄວາມ
ວິຕົກກັງວົນກ່ຽວກັບຄວາມປອດໄພຂອງນາງ Obeidi ແລະກຳລັງດຳເນີນງານເພື່ອຄໍ້າປະ
ກັນວ່ານາງຈະໄດ້ບ່ອນລີ້ໄພທີ່ເໝາະສົມ. ທ່ານ Toner ຍັງເວົ້າວ່າ ເຈົ້າໜ້າທີ່ສະຫະລັດໄດ້
ໂອ້ລົມກັບນາງໃນໄລຍະສອງສາມມື້ຜ່ານມານີ້.
ນາງ Obeidi ໄດ້ແລ່ນເຂົ້າໄປໃນໂຮງແຮມແຫ່ງນຶ່ງທີ່ນະຄອນຫຼວງຕຣີໂປລີໃນເດືອນມີນາ
ຜ່ານມາເພື່ອບອກພວກນັກຂ່າວຕ່າງປະເທດວ່າ ນາງໄດ້ຖືກຂົ່ມຂືນ ໂດຍທະຫານລັດຖະ
ບານ ໂດຍເວົ້າວ່ານາງໄດ້ຕົກເປັນເປົ້າຍ້ອນວ່ານາງມາຈາກເມືອງ Benghazi. ການກ່າວ
ອ້າງກ່ຽວກັບການຂົ່ມຂືນນາງນັ້ນ ຍັງບໍ່ທັນໄດ້ຮັບການຢືນຢັນຢ່າງເປັນອິດສະຫຼະເທື່ອ.
ເຈົ້າໜ້າທີ່ລີເບຍພາກັນເອີ້ນນາງ Obeidi ຕ່າງໆນາໆວ່າເປັນຄົນຂີ້ເຫຼົ້າ ໂສເພນີແລະຂີ້ລັກ.
