ລັດຖະມົນຕີກະຊວງການຕ່າງປະເທດສະຫະລັດ ທ່ານນາງ Hillary Clinton ພວມຢູ່ທີ່ປະ
ເທດເຕີກກີ ເພື່ອເຂົ້າຮ່ວມການເຈລະຈາຫາລືຂອງນາໆຊາດ ກ່ຽວກັບລີເບຍ ຊຶ່ງຄາດວ່າຈະ ເສີມຂະຫຍາຍຄວາມສຳພັນຂອງວໍຊິງຕັນ ກັບກຳລັງຝ່າຍຄ້ານທີ່ພວມຕໍ່ສູ້ເພື່ອໂຄ່ນລົ້ມຜູ້ນຳ
ລີເບຍທ່ານ Moammar Gadhafi ຢູ່ນັ້ນ.
ຄະນະຜູ້ຕາງໜ້າຂອງກຸ່ມປະສານງານຕິດຕໍ່ກ່ຽວກັບລີເບຍ ຈະວາງແຜນການໃນວັນສຸກມື້ນີ້ ເພື່ອໃຫ້ຄວາມສະໜັບສະໜຸນເພີ່ມຂຶ້ນແກ່ສະພາໄລຍະຂ້າມຜ່ານແຫ່ງຊາດຂອງພວກກະບົດ
ລີເບຍ.
ເຈົ້າໜ້າທີ່ອະວຸໂສຂອງສະຫະລັດທີ່ເດີນທາງໄປນຳທ່ານນາງ Clinton ກ່າວວ່າ ວໍຊິງຕັນຈະ
ເສີມຂະຫຍາຍຄວາມສຳພັນ ກັບສະພາໄລຍະຂ້າມຜ່ານແຫ່ງຊາດ ຫຼັງຈາກສະພາດັ່ງກ່າວນຳ
ສະເໜີແຜນການເພື່ອຈັດຕັ້ງລັດຖະບານທີ່ເປັນປະຊາທິປະໄຕ ມີຄວາມໂປ່ງໃສ ແລະມີຫຼາຍ
ພັກຝ່າຍເຂົ້າຮ່ວມ ຢູ່ທີ່ກອງປະຊຸມໃນວັນສຸກມື້ນີ້.
ການເຈລະຈາຫາລືທີ່ວ່ານີ້ ມີຂຶ້ນຂະນະທີ່ພວກກະບົດພວມບຸກຄືບໜ້າເຂົ້າໄປໃກ້ທີ່ໝັ້ນຂອງ
ທ່ານ Gadhafi ໃນນະຄອນຫຼວງຕຣີໂປລີ.
ໃນວັນພະຫັດວານນີ້ ກຳລັງຂອງພວກກະບົດໄດ້ໂຈມຕີເມືອງເບຣກາຫົວເມືອງຍຸດທະສາດ
ສູນກາງນໍ້າມັນ ທີ່ລັດຖະບານຍັງຄວບຄຸມ ຢູ່ພາກຕາເວັນອອກຂອງປະເທດ.
ແຫຼ່ງຂ່າວທາງດ້ານການແພດຈາກເມືອງ Ajdabiya ທີ່ຕັ້ງຢູ່ໃກ້ຄຽງແຈ້ງໃຫ້ຊາບວ່າ ມີພວກ
ກະບົດຄົນນຶ່ງເສຍຊີວິດ ແລະອີກ 5 ຄົໄດ້ຮັບບາດເຈັບ ໃນການປະທະກັນ ຂະນະທີ່ມີລາຍ
ງານ ວ່າພວກນັກລົບຝ່າຍກະບົດໄດ້ບຸກຄືບໜ້າ ກາຍເຂດແນວໜ້າຂອງຕົນເປັນເທື່ອທຳອິດ
ໃນຮອບຫຼາຍໆອາທິດ.
