ສະຫະລັດກ່າວວ່າ ຕົນພວມກະກຽມທີ່ຈະໃຫ້ການສະໜັບສະໜຸນຕໍ່ການດຳເນີນຄວາມພະ
ຍາຍາມຂອງຣັດເຊຍເພື່ອທຳການໄກ່ເກ່ຍຢູ່ໃນປະເທດລີເບຍຂະນະທີ່ຝຣັ່ງສະແດງຄວາມ
ຜິດຫວັງນໍາການບໍ່ມີຄວາມກ້າວໜ້າໃນການບັນລຸຂໍ້ຕົກລົງທາງດ້ານການເມືອງຕໍ່ວິກິດການ
ດັ່ງກ່າວ.
ປະທານາທິບໍດີສະຫະລັດທ່ານບາຣັກໂອບາມາ ໄດ້ສະແດງຄວາມຂອບອົກຂອບໃຈຕໍ່ປະທາ
ນາທິບໍດີຣັດເຊຍ ທ່ານ Dmitri Medvedev ກ່ຽວກັບການດຳເນີນຄວາມພະຍາຍາມຂອງ
ຣັດເຊຍຢູ່ໃນລີເບຍແລະເວົ້າວ່າສະຫະລັດສະໜັບສະໜຸນການເຈລະຈາທີ່ຈະນຳພາໄປສູ່ການ
ຫັນປ່ຽນໄປສູ່ປະຊາທິປະໄຕ ແລະການສະລະອຳນາດຂອງຜູ້ນຳລີເບຍ ທ່ານ Moammar
Gadhafi ນັ້ນ.
ທ່ານ Medvedev ໄດ້ຮ່ວມສົມທົບກັບບັນດາຜູ້ນຳ ຂອງປະເທດຕາເວັນຕົກ ໃນການຮຽກ
ຮ້ອງໃຫ້ທ່ານ Gadhafi ສະລະອຳນາດ ແລະທູດພິເສດຂອງຣັດເຊຍ ໄດ້ເດີນທາງໄປຍັງລີ
ເບຍເພື່ອພົບປະກັບບັນດາຜູ້ຕາງໜ້າຂອງລັດຖະບານແລະ ພວກກະບົດທີ່ນັ້ນ.
ຣັດເຊຍບໍ່ໄດ້ອອກສຽງ ໃນການລົງຄະແນນສຽງ ກ່ຽວກັບຍັດຕິຂອງສະພາຄວາມໝັ້ນຄົງ
ອົງການສະຫະປະຊາຊາດໃນຕົ້ນປີນີ້ທີ່ອະນຸມັດໃຫ້ນາໆຊາດເຂົ້າໄປພົວພັນຢູ່ໃນປະເທດລີ
ເບຍ ແລະນັບແຕ່ນັ້ນມາກໍໄດ້ຕຳໜິຕິຕຽນກ່ຽວກັບຂອບເຂດແລະຄວາມຕັ້ງໃຈໃນການຖິ້ມ
ລະເບີດໂຈມຕີພາຍໃຕ້ການນຳຂອງອົງການເນໂຕ້.
ຂະນະດຽວກັນລັດຖະມົນຕີການຕ່າງປະເທດຝຣັ່ງທ່ານ Alain Juppe ກ່າວຕໍ່ວິທະຍຸຝຣັ່ງ
ໃນວັນອັງຄານມື້ນີ້ວ່າ ລັດຖະບານລີເບຍໄດ້ສົ່ງທູດພິເສດໄປຍັງຫຼາຍໆປະເທດເພື່ອແຈ້ງໃຫ້
ຊາບວ່າຜູ້ນຳຂອງລີເບຍພ້ອມແລ້ວທີ່ຈະສະລະອຳນາດ.
ຝຣັ່ງກ່າວວ່າ ຕົນໄດ້ສົ່ງສານໄປຍັງລັດຖະບານລີເບຍເວົ້າວ່າທ່ານ Gadhafi ຕ້ອງໄດ້ສະລະ
ອຳນາດ ອັນເປັນພາກສ່ວນນຶ່ງ ໃນການແກ້ໄຂທາງດ້ານການເມືອງ ຕໍ່ບັນຫາຂັດແຍ້ງທີ່ດຳ
ເນີນມາເປັນເວລາ 5 ເດືອນ ໂດຍທີ່ກຳລັງຂອງພວກຝ່າຍຄ້ານພວມທຳການສູ້ລົບເພື່ອໂຄ່ນ
ລົ້ມການປົກຄອງທີ່ດຳເນີນມາເປັນເວລາ 42 ປີຂອງຜູ້ກ່ຽວ.
ນອກນັ້ນ ຝຣັ່ງຍັງໄດ້ໃຫ້ການຊ່ອຍເຫຼືອໂດຍກົງ ຕໍ່ພວກກະບົດລີເບຍແລະປະກອບສ່ວນ
ເຂົ້າຮ່ວມການໂຈມຕີທາງອາກາດຂອງອົງການເນໂຕ້ຕໍ່ກຳລັງຂອງລັດຖະບານລີເບຍ. ແຕ່
ຍ້ອນມີຄວາມເປັນຫ່ວງກ່ຽວກັບຄ່າໃຊ້ຈ່າຍທີ່ເພີ່ມທະວີຂຶ້ນກ່ຽວກັບການປະຕິບັດງານທາງ
ທະຫານນັ້ນ ຝຣັ່ງຈຶ່ງຢາກໃຫ້ພວກນັກລົບຝ່າຍຄ້ານດຳເນີນການເພີ່ມຕື່ມເພື່ອຜະເດັດເສິກ ໃນບັນຫາຂັດແຂ້ງດັ່ງກ່າວ.
