ການໂຈມຕີທາງອາກາດເພີ້ມຂຶ້ນຂອງສະຫະລັດໃນລີເບຍ ອາດເປັນການເລີ້ມຕົ້ນໃນຄວາມພະຍາຍາມຂັບໄລ່ກຸ່ມກໍ່ການຮ້າຍລັດອິສລາມໃນຂະນະທີ່ກຸ່ມດັ່ງກ່າວພະຍາຍາມ ຢ່າງສຸດຂີດເພື່ອຮັກສາທີ່ໝັ້ນອັນສຳຄັນຂອງຕົນໃນເຂດອາຟຣິກາເໜືອໄວ້.
ກອງບັນຊາການກຳລັງສະຫະລັດໃນອາຟຣິກາ ໄດ້ປະກາດກ່ຽວກັບການໂຈມຕີທາງອາ ກາດຮອບໃໝ່ 8 ເທື່ອ ຕໍ່ທີ່ໝັ້ນຂອງກຸ່ມລັດອິສລາມ ຢູ່ທີ່ເມືອງ Sirte ຊຶ່ງເປັນເມືອງແຄມທະເລສຳຄັນທີ່ຖືກໃຊ້ເປັນຖານປະຕິບັດງານຂອງກຸ່ມກໍ່ການ ຮ້າຍດັ່ງກ່າວ.
ເວລານີ້ ສະຫະລັດໄດ້ທຳການໂຈມຕີທາງອາກາດຕໍ່ເປົ້າໝາຍຂອງກຸ່ມລັດອິສລາມທັງໝົດ 28 ຖ້ຽວອັນເປັນພາກສ່ວນນຶ່ງຂອງການປະຕິບັດງານ Odyssey Lightning ທີ່ເລີ້ມຂຶ້ນເມື່ອວັນທີ 1 ສິງຫາ ຫລັງຈາກລັດຖະບານສາມັກຄີຊາດຂອງລີເບຍໄດ້ຮ້ອງຂໍ.
ເຈົ້າໜ້າທີ່ສະຫະລັດ ທີ່ຂໍສະຫງວນຊື່ຄົນນຶ່ງ ກ່າວຕໍ່ວີໂອເອວ່າ ນອກນັ້ນຍັງມີກຳລັງພິເສດຂອງສະຫະລັດ ເຮັດວຽກຢູ່ໃນເຂດດັ່ງກ່າວ ເພື່ອປະສານງານໃນ ການໂຈມຕີ ແຕ່ເຈົ້າໜ້າທີ່ທ່ານນີ້ກໍບໍ່ສາມາດໃຫ້ການອະທິບາຍຫຍັງເພີ້ມຕື່ມ.
ໂຄສົກກອງບັນຊາການກຳລັງສະຫະລັດໃນເຂດອາຟຣິກາທ່ານ Robin Mack ກ່າວວ່າ ຄວາມພະຍາຍາມຂອງສະຫະລັດແມ່ນຈຳກັດແຕ່ສະເພາະການໂຈມຕີທາງອາກາດແລະແບ່ງປັນຂໍ້ມູນເພື່ອສະໜັບສະໜຸນການໂຈມຕີ ຕາມການຮ້ອງຂອງລັດຖະບານສາມັກຄີຊາດເທົ່ານັ້ນ.
ກຳລັງທີ່ຈົງຮັກພັກດີຕໍ່ລັດຖະບານສາມັກຄີຊາດລີເບຍ ໄດ້ທຳຄວາມຄືບໜ້າທີ່ສຳຄັນໃນການໂຈມຕີພວກນັກລົບກຸ່ມລັດອິສລາມ ໂດຍສາມາດຂັບໄລ່ພວກເຂົາໃຫ້ຖອຍໄປສູ່ເຂດໃຈກາງເມືອງ ກ່ອນການບຸກໂຈມຕີ ທີ່ໄດ້ຮັບການຕ້ານຢັນຢ່າງໜັກ ແລະຢຸດຊະງັກລົງ.
ແຕ່ນອກຈາກການໂຈມຕີທາງອາກາດຂອງສະຫະລັດແລ້ວ ຍັງບໍ່ທັນເປັນທີ່ຈະແຈ້ງເທື່ອວ່າລັດຖະບານ ລີເບຍ ຈະໄດ້ຮັບການຊ່ວຍເຫລືອຕື່ມອີກໜ້ອຍຫຼາຍປານໃດ.
