ມີລາຍງານວ່າ ເອກກະສານຈຳນວນນຶ່ງທີ່ຖືກພົບເຫັນໃນລີເບຍ ສະແດງໃຫ້ເຫັນວ່າ ບັນດາ
ອົງການສືບລັບຂອງປະເທດຕາເວັນຕົກແລະລັດຖະບານທ່ານ Gadhafi ມີການຮ່ວມມືກັນ
ຢ່າງໃກ້ຊິດຫຼາຍສໍ່າໃດ ໂດຍສະເພາະແລ້ວແມ່ນການມອບໂຕຜູ້ຕ້ອງສົງໄສກໍ່ການຮ້າຍ.
ພວກນັກຄົ້ນຄ້ວາ ຂອງກຸ່ມປົກປ້ອງສິດທິມະນຸດ Human Rights Watch ໄດ້ພົບເຫັນ
ເອກກະສານດັ່ງກ່າວ ໃນມື້ວັນສຸກວານນີ້ ຂະນະທີ່ໄປເບິ່ງຫ້ອງການທີ່ຖືກປະຖິ້ມແຫ່ງນຶ່ງ
ໃນນະຄອນຫຼວງຕຣີໂປລີ. ເປັນທີ່ປາກົດວ່າຫ້ອງການທີ່ວ່ານີ້ແມ່ນເປັນບ່ອນທີ່ອະດີດຫົວ
ໜ້າສອດແນມຂອງລີເບຍ ພ້ອມທັງເປັນເພື່ອນຮ່ວມງານທີ່ໃກ້ຊິດຂອງທ່ານ Gadhafi ຄື
ທ່ານ Moussa Kouassa ເຄີຍເຮັດວຽກມາກ່ອນ. ເອກກະສານເຫຼົ່ານີ້ຍັງບໍ່ທັນໄດ້ຮັບ
ການຢືນຢັນເທື່ອ.
ເອກກະສານເຫຼົ່ານີ້ແມ່ນຈົດໝາຍຕິດຕໍ່ ທີ່ເລີ່ມມາແຕ່ປີ 2002 ລະຫວ່າງພະ ແນກສືບລັບ
ຂອງລີເບຍກັບອົງການສືບລັບຊີໄອເອຂອງສະຫະລັດແລະອົງການສືບລັບ MI-6 ຂອງອັງ
ກິດ.
ເອກກະສານເຫຼົ່ານີ້ແມ່ນຮວມທັງການແບ່ງປັນຂໍ້ມູນລັບ ຂໍ້ສະເໜີໃນການສົ່ງມອບຜູ້ຕ້ອງ
ສົງໄສກໍ່ການຮ້າຍ ໝາຍກຳນົດການໃນສົ່ງມອບ ລາຍຊື່ຜູ້ຕ້ອງສົງໄສກໍ່ການຮ້າຍ ທີ່ຖືກ
ສອບປາກຄຳ ແລະຄຳ ປາໄສທີ່ປາກົດວ່າຂຽນໂດຍອົງການຊີໄອເອໃຫ້ອະດີດຜູ້ນຳລີເບຍ
ທ່ານ Moammar Gadhafi ທີ່ທ່ານໄດ້ຮຽກຮ້ອງໃຫ້ພາກຕາເວັນອອກກາງ ເປັນເຂດ ປອດອາວຸດທີ່ມີອະນຸພາບຮ້າຍແຮງນັ້ນ.
ເອກກະສານອີກສະບັບນຶ່ງ ແມ່ນເປັນຈົດໝາຍນ້ອຍ ທີ່ມີການກ່າວຫາວ່າ ເປັນຂອງທ່ານ
Stephen Kappes ຊຶ່ງເປັນຮອງ ຫຼືບຸກຄົນໝາຍເລກ 2 ຂອງອົງການຊີໄອເອໃນເວລາ
ນັ້ນ ທີ່ຂຽນຫາທ່ານ Kouassa ເພື່ອຢາກໃຫ້ອົງການຊີໄອເອ ສ້າງຕັ້ງການມີໜ້າ ຢ່າງ
ເປັນຖາວອນຂຶ້ນທີ່ປະເທດລີເບຍໃນປີ 2004.ຈົດໝາຍນ້ອຍສະບັບນີ້ເລີ່ມຕົ້ນແບບບໍ່ຄ່ອຍ
ເປັນທາງການທີ່ສະເໜີໃຫ້ມີການສ້າງຕັ້ງຄວາມສຳພັນຢ່າງໃກ້ຊິດລະຫວ່າງເຈົ້າໜ້າທີ່ສອດ
ແນມອະວຸໂສທັງ 2.
