ບັນດາເຈົ້າໜ້າທີ່ຈີນກ່າວວ່າ ພວກຊ່ອຍວຽກຜູ້ນໍາລີເບຍ ມວມມາ ກາດດາຟີ ໄດ້ພົບປະກັບພວກບໍລິສັດຜະລິດອາວຸດຈີນໃນເດືອນກໍລະກົດ ຜ່ານມາ ເພື່ອພະຍາຍາມຊອກຊື້ອາວຸດທີ່ທັນສະໄໝເພື່ອໃຊ້ຕໍ່ຕ້ານພວກກໍາລັງຂອງຝ່າຍກະບົດ ທີ່ກໍາລັງບຸກຄືບໜ້ານັ້ນ.
ທ່ານນາງ Jiang Yu ໂຄສົກປະຈໍາກະຊວງການຕ່າງປະເທດຈີນກ່າວໃນວັນຈັນມື້ນີ້ວ່າ ການພົບປະກັນດັ່ງກ່າວໄດ້ມີຂຶ້ນ ໂດຍທີ່ລັດຖະບານຈີນບໍ່ຮູ້ຈັກນໍາ ແລະວ່າ ບໍ່ໄດ້ມີການຂາຍອາວຸດໃດໆໃຫ້ລີເບຍ.
ຂ່າວການພົບປະກັນນີ້ໄດ້ຖືກເປີດເຜີຍອອກມາຄັ້ງທໍາອິດໃນສັບປະດາແລ້ວນີ້ ໂດຍໜັງສືພິມການາດາສະບັບນຶ່ງ ທີ່ຜູ້ສື່ຂ່າວຂອງໜັງສືພິມ ດັ່ງກ່າວໄດ້ພົບເຫັນເອກະສານການພົບປະກັນຕ່າງໆໃນກອງຂີ້ເຫຍື້ອຂອງລີເບຍ. ເອກະສານເຫລົ່ານີ້ສະແດງໃຫ້ເຫັນວ່າ ພວກບໍລິສັດຈີນໄດ້ສະເໜີຂາຍອາວຸດໃຫ້ລີເບຍ ໃນມູນຄ່າຢ່າງນ້ອຍ 200 ລ້ານໂດລາ ທີ່ຮວມທັງປືນຍິງຈະຫລວດ ລູກສອນໄຟຕໍ່ຕ້ານລົດຖັງ ແລະລູກສອນໄຟຕໍ່ຕ້ານເຮືອບິນ ແບບຖືໄປມາໄດ້.
ພວກບໍລິສັດຈີນໄດ້ສະເໜີແນະວ່າ ພວກອາວຸດເຫລົ່ານີ້ສາມາດສົ່ງຜ່ານປະເທດອາລຈີເຣຍ
ຫລືອາຟຣິໃຕ້ ຊຶ່ງເປັນສອງປະເທດທີ່ເຄື່ອນໄຫວຊ້າຄືກັນກັບຈີນໃນການຍຸດຕິການສະໜັບ
ສະໜຸນແກ່ຜູ້ນໍາລີເບຍທີ່ປົກຄອງປະເທດມາເປັນເວລາດົນນານນັ້ນ.