ທ່ານ Moammar Gadhafi ຜູ້ນໍາລີເບຍກ່າວວ່າ ທ່ານ
ຈະທໍາການຕໍ່ສູ້ກັບພວກປະເທດຝ່າຍຕາເວັນຕົກ ຖ້າຫາກ
ປະເທດເຫລົ່ານີ້ທໍາການເຄື່ອນໄຫວຈັດຕັ້ງເຂດຫ້າມການ
ບິນເໜືອນ່ານຟ້າຂອງລີເບຍນັ້ນ.
ໃນການໃຫ້ສໍາພາດແກ່ໂທລະພາບແຫ່ງຊາດ TRT ຂອງ
ເທີກກີທີ່ອອກອາກາດໃນວັນພຸດມື້ນີ້ ທ່ານກາດດາຟີ ກ່າວ
ວ່າ ການເຄື່ອນໄຫວເຊ່ນນີ້ຈະພາໃຫ້ປະຊາຊົນລີເບຍເຫັນວ່າ ເຈດຕະນາອັນແທ້ຈິງຂອງພວກປະເທດຕາເວັນຕົກ ແມ່ນຍຶດເອົານໍ້າມັນຂອງລີເບຍນັ້ນ.
ນອກນັ້ນ ໃນວັນພຸດມື້ນີ້ ໃນການຖະແຫລງທີ່ອອກໃນໂທລະພາບແຫ່ງຊາດຂອງລີເບຍ ທ່ານກາດດາຟີ ໄດ້ກ່າວອ້າງຊໍ້າແລ້ວຊໍ້າອີກວ່າ ພວກໜ່ວຍສືບລັບຂອງຕ່າງປະເທດແມ່ນເປັນຜູ້ຮັບຜິດຊອບໃນການລຸກຮືຂຶ້ນຂອງປະຊາຊົນ ຕໍ່ຕ້ານລັດຖະບານຂອງທ່ານ.
ໃນການກ່າວຕໍ່ປະຊາຊົນກຸ່ມນຶ່ງຈາກເມືອງ Zentan ທ່ານກາດດາຟີໄດ້ຖິ້ມໂທດໃສ່ພວກກໍາລັງພາຍນອກທີ່ມາຈາກ ອັຟການີສຖານ ອາລຈີເຣຍ ອິຈິບແລະດິນແດນປາເລສໄຕນ໌ ສໍາລັບການກໍ່ການກະບົດຂຶ້ນນີ້.
ພວກທະຫານທີ່ຈົງຮັກພັກດີຕໍ່ທ່ານກາດດາຟີ ໄດ້ທໍາການໂຈມຕີເມືອງ Zawiya ທີ່ຢູ່ພາຍໃຕ້ການຄວບຄຸມຂອງຝ່າຍກະບົດເປັນມື້ທີ 5 ລຽນຕິດມາຮອດວັນອັງຄານວານນີ້ ອັນເປັນພາກສ່ວນນຶ່ງໃນການຕີໂຕ້ຕອບຄືນທີ່ມີວັດຖຸປະສົງເພື່ອຍຶດເອົາດິນແດນທີ່ໄດ້ເສຍໃຫ້ພວກກະບົດໄປນັ້ນຄືນ. ພວກທີ່ເຫັນເຫດການກ່າວວ່າ ເມືອງ Zawiya ຊຶ່ງຕັ້ງຢູ່ຫ່າງຈາກນະ
ຄອນຫລວງຕຣີໂປລີໄປທາງກໍ້າຕາເວັນຕົກ 50 ຫລັກກິໂລແມັດ ໄດ້ຖືກຍິງປືນຄົກໃສ່ຢ່າງໜັກ.
ຢູ່ທາງພາກຕາເວັນອອກ ຊຶ່ງສ່ວນໃຫຍ່ແມ່ນຢູ່ພາຍໃຕ້ການຄຸ້ມຄອງຂອງຝ່າຍຄ້ານ ຝູງ
ເຮືອບິນລົບຂອງລີເບຍໄດ້ທໍາການໂຈມຕີທາງອາກາດຫລາຍບັ້ນໃສ່ທີ່ໝັ້ນແຫ່ງຕ່າງໆ
ຂອງຝ່າຍຕໍ່ຕ້ານລັດຖະບານໃນເຂດອ້ອມແອ້ມເມືອງ Ras Lanuf ທ່າສົ່ງອອກນໍ້າມັນ
ທີ່ສໍາຄັນນັ້ນ.
ເມືອງດັ່ງກ່າວໄດ້ຖືກຖະລົ່ມດ້ວຍລະເບີດຢ່າງໜັກໃນຂະນະທີ່ພວກກໍາລັງນິຍົມທ່ານກາດ
ດາຟີແນເປົ້າໝາຍໃສ່ອ່າງເກັບນໍ້າຂອງເມືອງດັ່ງກ່າວໃນບັນດາສະຖານທີ່ສຳຄັນຕ່າງໆນັ້ນ
ມາຈົນຮອດແລງວັນອັງຄານວານນີ້ ບັນດາເຈົ້າໜ້າທີ່ຝ່າຍກະບົດກ່າວວ່າ ພວກຕົນຍັງຄວບຄຸມເຂດດັ່ງກ່າວນີ້ຢູ່.
