ຂະບວນລົດຈໍານວນນຶ່ງທີ່ບັນທຸກພວກກໍາລັງທີ່ຈົງຮັກພັກດີຕໍ່ທານມວມ ມາກາດດາຟີ ໄດ້ຂ້າມຊາຍແດນເຂົ້າໄປໃນປະເທດເພື່ອນບ້ານ Niger ໃນຂະນະທີ່ພວກນັກລົບຕໍ່ຕ້ານທ່ານກາດດາຟີ ສືບຕໍ່ໂຮມຊຸມນຸມກໍາລັງຢູ່ນອກທີ່ໝັ້ນແຫ່ງສຸດທ້າຍ ຂອງທ່ານກາດດາຟີ ທີ່ໄດ້ຖືກໂຄ່ນລົ້ມໄປ ນັ້ນ.
ບັນດາເຈົ້າໜ້າທີ່ກ່າວວ່າ ລົດທະຫານຫລາຍກວ່າ 10 ຄັນໄດ້ຂ້າມເຂົ້າ ໄປໃນປະເທດ Niger ໃນແລງວັນຈັນວານນີ້ ແລະແລ່ນໄປຮອດເມືອງ Agadez ແລ້ວ. ກ່ອນໜ້ານີ້ ທ່ານ Mansour Dhao ຫົວໜ້າກອງພົນນ້ອຍ ຮັກສາຄວາມປອດໄພຂອງກາດດາຟີ
ໄດ້ຂ້າມຊາຍແດນເຂົ້າໄປໃນປະເທດ Niger ກັບພວກຊາວລີເບຍອີກຈຳນວນນຶ່ງ.
ເວລານີ້ ຍັງບໍ່ຮູ້ວ່າທ່ານກາດດາຟີຢູ່ໃສນັ້ນ ແລະກໍບໍ່ເປັນທີ່ຈະແຈ້ງເທື່ອວ່າ ມີພວກຍາດຕິພີ່ນ້ອງຫລືເຈົ້າໜ້າທີ່ຈາກລັດຖະບານຂອງທ່ານກາດດາຟີຮວມຢູ່ໃນພວກທີ່ເຂົ້າໄປໃນ Niger ນັ້ນຫລືບໍ ຫລືວ່າພວກນີ້ຈະຕິດຕາມໄປນໍາຫລັງ.
ໃນຂະນະດຽວກັນ ພວກກໍາລັງກອງໜຸນຕໍ່ຕ້ານກາດດາຟີໄດ້ເຂົ້າຮ່ວມ ກັບພວກນັກລົບຫລາຍພັນຄົນຢູ່ນອກເມືອງ Bani Walid ຂອງລີເບຍ ກ່ອນວັນເສ້ນຕາຍໃນວັນເສົາຈະມານີ້ ສໍາລັບພວກກໍາລັງທີ່ຈົງຮັກພັກດີຕໍ່ທ່ານກາດດາຟີທັງໝົດຕ້ອງຍອມຈໍານົນນັ້ນ.
ພວກນັກເຈລະຈາອໍານາດປົກຄອງຊົ່ວຄາວໄດ້ທໍາການພົບປະເຈລະຈາກັບພວກອາວຸໂສຊົນເຜົ່າແລະພວກກໍາລັງນິຍົມກາດດາຟີຈາກເມືອງ Bani Walid ຊຶ່ງເປັນທີ່ໜັ້ນແຫ່ງນຶ່ງໃນຈໍານວນທີ່ໝັ້ນ 3 ແຫ່ງທີ່ຍັງເຫລືອຂອງພວກນິຍົມກາດດາຟີນັ້ນ.
ເບິ່ງວີໂອ - ພວກຄົນເຂົ້າເມືອງຜິວດຳ ໃນລີເບຍ
ເບິ່ງວີດີໂອ - ພວກກະບົດປິດລ້ອມ ທີ່ໝັ້ນແຫ່ງສຸດທ້າຍ ຂອງກາດດາຟີ
