ລັດຖະມົນຕີປ້ອງກັນປະເທດສະຫະລັດ ລີອອນ ພະແນັດຕາ ກ່າວວ່າ ພາລະກິດຂອງເນໂຕ້ຢູ່ໃນລີເບຍ ແມ່ນເປັນໂຕຢ່າງອັນນຶ່ງຂອງຄວາມສໍາຄັນຂອງກຸ່ມພັນທະມິດດັ່ງກ່າວແລະສະແດງໃຫ້ເຫັນວ່າ ເນໂຕ້ສາມາດປະຕິບັດການຢ່າງໄດ້ຜົນ ໂດຍມີຢູໂຣບເອົາບົດບາດເປັນຜູ້ນໍາ.
ທ່ານພະແນັດຕາໄດ້ສະແດງຄວາມເຫັນດັ່ງກ່າວຢູ່ນະຄອນຫລວງ Brussels ບ່ອນທີ່ບັນດາລັດຖະມົນຕີປ້ອງກັນປະເທດຂອງເນໂຕ້ກໍາລັງປະຊຸມກັນກ່ຽວກັບເລື່ອງລີເບຍ ແລະການປະຕິບັດງານອື່ນໆຂອງເນໂຕ້.
ກ່ອນໜ້ານີ້ ທ່ານ Panetta ກ່າວຢູ່ທີ່ກຸງໄຄໂຣວ່າ ການປະຕິບັດງານທາງອາກາດຂອງກຸ່ມ
ເນໂຕ້ຕໍ່ລີເບຍນັ້ນ ຈະຢຸດເຊົາບໍ່ໄດ້ ແລະການດໍາເນີນຂັ້ນຕອນທາງດ້ານການເມືອງ ກໍບໍ່
ສາມາດເລີ້ມຂຶ້ນໄດ້ ຈົນກວ່າເມືອງ Sirte ແລະຂົງເຂດອື່ນໆຖືກຍຶດໄດ້ເສຍກ່ອນ ແລະ
ທ່ານກ່າວຕໍ່ໄປວ່າ ການທີ່ບໍ່ຮູ້ຈັກວ່າທ່ານກາດດາຟີຢູ່ໃສນັ້ນ ກໍເຮັດໃຫ້ຫຍຸ້ງຍາກເຊ່ນກັນ
ສໍາລັບພວກພັນທະມິດທີ່ຈະຕັດສິນໃຈວ່າ ເວລາໃດຈະຢຸດເຊົາການໂຈມຕີທາງອາກາດ
ແລະອໍານວຍໃຫ້ລັດຖະບານຊົ່ວຄາວຂອງລີເບຍ ຫັນໄປຈັດການກັບບັນຫາອື່ນໆ.
ປະຊາຊົນລີເບຍພາກັນຫລັ່ງໄຫລໜີອອກຈາກເມືອງ Sirte ໃນວັນອັງ ຄານວານນີ້ ຫລັງ
ຈາກການລະດົມຍິງປືນໃຫຍ່ໃສ່ ແລະຍິງປືນສູ້ລົບກັນຢ່າງດຸເດືອດມາເປັນເວລາ 3 ສັບປະ
ດາໄດ້ບັງຄັບໃຫ້ພວກຊາວເມືອງຕ້ອງຫລົບໜີອອກໄປໃນທີ່ສຸດຜ່ານດ່ານກວດກາແຫ່ງ
ຕ່າງໆຂອງລັດຖະບານຊົ່ວຄາວລີເບຍ ທີ່ເປັນຝ່າຍສັດຕູນັ້ນ.
ພວກພາຫະນະ ທີ່ບັນທຸກວັດຖຸສິ່ງຂອງແລະບັນທຸກພວກຄອບຄົວທີ່ມີຄວາມຢ້ານກົວ
ແລະອຶດຫິວ ຄ່ອຍໆຄືບຄານອອກໄປຈາກເມືອງຍຸດທະສາດແຄມຝ່ັງທະເລດັ່ງກ່າວ ໂດຍ
ຜ່ານການກວດກາວັດຖຸສິ່ງຂອງທີ່ຕິດໂຕມານໍາ ພ້ອມທັງກວດເບິ່ງຊື່ ໂດຍພວກກໍາລັງ
ຂອງສະພາໄລຍະຂ້າມຜ່ານແຫ່ງຊາດຫລື NTC ທີ່ມີຄວາມສົງໄສກ່ຽວກັບພວກເຂົາເຈົ້າ
ນັ້ນ. ພວກນັກຕໍ່ສູ້ຂອງອໍານາດປົກຄອງຊົ່ວຄາວໄດ້ລົດຜ່ອນການລະດົມຍິງໃສ່ເມືອງ
Sirte ຂອງພວກເຂົາເຈົ້າລົງໃນວັນອັງຄານວານນີ້ ເພື່ອປ່ອຍໃຫ້ພວກຊາວເມືອງອົບ
ພະຍົບໜີ.
