ພວກນັກຕໍ່ສູ້ຂອງອໍານາດປົກຄອງຊົ່ວຄາວລີເບຍໄດ້ເປີດສາກໃນອັນທີ່ເຂົາເຈົ້າເອີ້ນວ່າ
ການບຸກໂຈມຕີບັ້ນສຸດທ້າຍຕໍ່ເມືອງ Sirte ທີ່ໝັ້ນຂອງພວກກໍາລັງຈົງຮັກພັກດີຕໍ່ທ່ານ
ກາດດາຟີຂະນະທີ່ບັນດາເຈົ້າໜ້າທີ່ໃຫ້ຄໍາໝັ້ນສັນຍາວ່າ ຈະແຕ່ງຕັ້ງຄະນະລັດຖະບານ
ໄລຍະຂ້າມຜ່ານແຫ່ງຊາດໃໝ່ຂຶ້ນໃນໄວໆນີ້ ຫລັງຈາກຍຶດເອົາເມືອງຍຸດທະສາດແຄມ
ທະເລແຫ່ງນີ້ໄດ້.
ກໍາລັງຂອງອໍານາດປົກຄອງຊົ່ວຄາວໄດ້ຍຶດເອົາດິນແດນແຫ່ງໃໝ່ຢູ່ໃນແລະໃນເຂດອ້ອມ
ແອ້ມເມືອງ Sirte ໃນວັນຈັນວານນີ້. ດິນແດນໃໝ່ທີ່ຍຶດໄດ້ນີ້ແມ່ນຮວມທັງເມືອງນ້ອຍໆ
Qasr Abu Hadi ບ່ອນທີ່ລາຍງານເວົ້າວ່າ ອະດີດຜູ້ນໍາມວມມາກາດດາຟີ ເກີດຢູ່ໃນຕູບ
ຂອງກຸ່ມຊົນເຜົ່າພະເນຈອນລ້ຽງສັດ ໃນປີ 1942 ນັ້ນ.
ການປະທະກັນໃນວັນຈັນວານນີ້ ໄດ້ສັງຫານພວກກໍາລັງຕໍ່ຕ້ານກາດດາຟີ 4 ຄົນແລະ
ໄດ້ຮັບບາດເຈັບຕື່ມອີກ 39 ຄົນ.
ລົດຂະບວນນຶ່ງຂອງສະພາກາແດງໄດ້ລຳລຽງບັ້ງ oxygen ແລະສະບຽງຢຸກຢາການ
ແພດສຸກເສິນຕ່າງໆທີ່ຕ້ອງການທີ່ສຸດໄປຍັງໂຮງໝໍ Ibn Sina ໃນເມືອງ Sirte ຫລັງ
ຈາກບໍ່ປະສົບຜົນສໍາເລັດໃນຄວາມພະຍາຍາມຄັ້ງກ່ອນ ເນື່ອງຈາກການສູ້ລົບກັນຢ່າງ
ໜັກນັ້ນ.
ພວກແພດໝໍທີ່ຫລົບໜີອອກມາກ່າວວ່າ ພວກຄົນເຈັບພາກັນຕາຍຢູ່ເທິງໂຕະຜ່າຕັດທີ່
ໂຮງໝໍເພາະວ່າບໍ່ມີ oxygen ແລະບໍ່ມີນໍ້າມັນເຊື້ອໄຟສໍາລັບໃສ່ພວກເຄື່ອງຈັກແລ່ນໄຟ
ຟ້າໃນໂຮງໝໍນັ້ນ.
ທີ່ກຸງຕຣິໂປລີ ບັນດາຜູ້ນໍາອໍານາດປົກຄອງຊົ່ວຄາວລີເບຍໃຫ້ຄໍາໜັ້ນສັນຍາວ່າ ຈະລົງ
ຈາກໜ້າທີ່ຫລັງຈາກເຂົ້າຍຶດເອົາເມືອງ Sirte ໄດ້ ແລະມີການປະກາດປົດປ່ອຍປະເທດ
ແລ້ວ. ທ່ານ Mahmoud Jibril ນາຍົກລັດຖະມົນຕີຊົ່ວຄາວ ກ່າວວ່າທ່ານໄດ້ຮຽກຮ້ອງ
ໃຫ້ມີປະກາດການປົດປ່ອຍປະເທດ ຫລັງຈາກຍຶດເອົາເມືອງ Sirte ໄດ້ ເພາະວ່າການ
ກະທໍາເຊ່ນນີ້ຈະຮັບປະກັນວ່າ ທາງເຂົ້າປະເທດທັງໝົດໂດຍທາງນໍ້າ ທາງບົກ ແລະທາງ
ອາກາດ ໄດ້ຮັບການຄໍ້າປະກັນຄວາມປອດໄພດີແລ້ວນັ້ນ.
