ປະຊາຊົນລີເບຍຫລາຍພັນຄົນໄດ້ພາກັນສະເຫລີມສະຫລອງວັນອອກພັນສາ ຫລືການສິ້ນ
ສຸດລົງຂອງເດືອນຖືສີນ Ramadan ຂອງຊາວມຸສລິມໃນຈະຕຸລັດໃຫຍ່ໃຈກາງກຸງຕຣີໂປລີ
ໃນຂະນະທີ່ທາງການຂອງອຳນາດປົກຄອງຊາດຊົ່ວຄາວຂອງລີເບຍ ຊຸກຍູ້ໃຫ້ພວກກໍາລັງ
ທີ່ຈົງຮັກພັກດີຕໍ່ທ່ານມວມມາກາດດາຟີ ໃນເມືອງ Sirte ບ້ານເກີດເມືອງນອນຂອງທ່ານ
ໃຫ້ຍອມຈໍານົນ.
ພວກກໍາລັງຕໍ່ຕ້ານກາດດາຟີໄດ້ຈັດຕັ້ງການຮັກສາຄວາມປອດໄພໃນເຂດອ້ອມແອ້ມຈະຕຸລັດ
ໃນວັນພຸດມື້ນີ້ ຮວມທັງສົ່ງພວກມືປືນຂຶ້ນເທິງຫລັງຄາຕຶກອາຄານຕ່າງໆ ໃນຂະນະທີ່ພວກ
ປະຊາຊົນຫລາຍພັນຄົນພາກັນໄປເຕົ້າໂຮມກັນ ເພື່ອທໍາການໄຫວ້ວອນພາວະນາແລະຮ້ອງໂຮ
ດ້ວຍຄວາມເບີກບານມ່ວນຊື່ນໃນມື້ທໍາອິດຂອງບຸນ Eid al-Fitr.
ທ່ານ Mustafa Abdel Jalil ຜູ້ນໍາສະພາປົກຄອງແຫ່ງຊາດລະຍະຂ້າມຜ່ານລີເບຍ ກ່າວ
ໃນວັນອັງຄານວານນີ້ວ່າ ພວກກໍາລັງຂອງທ່ານຈະເລີ້ມທໍາການເຄື່ອນໄຫວທາງທະຫານ
ໃນເມືອງ Sirte ຖ້າພວກທະຫານນິຍົມກາດດາຟີ ບໍ່ທໍາການເຈລະຈາຢ່າງຮອບດ້ານ ແລະ
ຍອມຈໍານົນພາຍໃນວັນເສົາຈະມານີ້ 1 ມື້ ຫລັງຈາກວັນພັກບຸນ Eid al-Fitr ເປັນເວລາ 3
ມື້ເສັດສິ້ນລົງ.
ພວກນັກຕໍ່ສູ້ຕໍ່ຕ້ານທ່ານກາດດາຟີກ່າວວ່າ ພວກເຂົາເຈົ້າກໍາລັງຕຽມທໍາການສູ້ລົບບັ້ນສຸດ
ທ້າຍເພື່ອເຂົ້າຄວບຄຸມບ່ອນລີ້ຊ່ອນແຫ່ງສຸດທ້າຍຂອງກາດດາຟີໃນລີເບຍນັ້ນ. ວັນກໍານົດ
ເສ້ນຕາຍໃນວັນເສົາຈະມານີ້ ຕົ້ນຕໍແລ້ວແມ່ນພົວພັນກັບເມືອງ Sirte ແຕ່ມັນກວມລວມກັບ
ທີ່ໝັ້ນແຫ່ງຕ່າງໆຂອງພວກຈົງຮັກພັກດີຕໍ່ທ່ານກາດດາຟີ ໃນເມືອງ Bani Walid ແລະ
ເມືອງ Sabha ໃນພາກໃຕ້ນັ້ນນຳ.
ກຸ່ມເນໂຕ້ກ່າວວ່າ ຕົນໄດ້ສືບຕໍ່ທໍາການໂຈມຕີທາງອາກາດຢູ່ຕໍ່ມາໃສ່ເມືອງ Sirte ແລະ
ເມືອງ Bani Walid ໂດຍໄດ້ໂຈມຕີເປົ້າໝາຍແຫ່ງຕ່າງໆຢູ່ທັງສອງເຂດໃນວັນອັງຄານ
ວານນີ້.
ບໍ່ມີຜູ້ຄົນຜູ້ໃດໄດ້ເຫັນທ່ານກາດດາຟີ ແລະພວກລູກຊາຍທີ່ມີອິດທິພົນທີ່ສຸດຂອງທ່ານ
ນັບແຕ່ພວກນັກຕໍ່ສູ້ຕ້ານທ່ານກາດດາຟີໄດ້ເຂົ້າຄວບຄຸມໃນກຸງຕຣີໂປລີມາໃນສັບປະດາ
ແລ້ວນີ້. ມີບາງຄົນເຊື່ອວ່າ ອະດີດຜູ້ນໍາທ່ານນີ້ອາດຈະລີ້ຊ່ອນຢູ່ໃນພາກໃຕ້ຂອງປະເທດ.
ໃນຂະນະດຽວກັນ ເລຂາທິການໃຫຍ່ສະຫປະຊາຊາດ ທ່ານພັນກີມູນກ່າວວ່າ ມີຄວາມ
ຮູ້ສຶກເຫັນພ້ອມກັນຢ່າງກວ້າງຂວາງທີ່ວ່າ ປະຊາຄົມນາໆຊາດຕ້ອງຮ່ວມສາມັກຄີກັນ
ພາຍໃຕ້ແຜນການປະສານງານກັນຢ່າງດີສໍາລັບໄລຍະຂ້າມຜ່ານຫລັງຈາກຍຸກສະໄໝ
ຂອງທ່ານກາດດາຟີໃນລີເບຍ ແລະວ່າສະຫະປະຊາຊາດຄວນຈະເປັນຜູ້ນໍາພາໃນຄວາມ
ພະຍາຍາມດັ່ງກ່າວ.
