ພວກທະຫານບ້ານລີເບຍທີ່ຈັບກຸມລູກຊາຍທີ່ຫລົບໜີໂທດຂອງມື້ລາງຜູ້ຜະເດັດການປະເທດກ່າວວ່າ ຕົນຈະສືບຕໍ່ຄຸມຂັງນາຍ Seif al-Islam ກາດດາຟີ ໄວ້ທີ່ເມືອງ Zintan ໃນພາກຕາເວັນຕົກຂອງປະເທດ ຈົນຮອດເວລາໃດສາມາດຈັດແຈງເລື້ອງການດໍາເນີນຄະດີຜູ້ກ່ຽວໄດ້.
ພວກສະມາຊິກສະພາປົກຄອງເມືອງ Zintan ກ່າວໃນຕອນແລງວັນອາທິດວານນີ້ວ່າ ພວກຕົນຈະຮັບປະກັນຄວາມປອດໄພໃຫ້ແກ່ນາຍ Seif al-Islam ໃນລະຫວ່າງທີ່ລັດຖະບານຊົ່ວຄາວໃນກຸງຕຣີໂປລີ ທໍາການໂອ້ລົມສົນທະນາກັນເລື້ອງ ຊະຕາກໍາຂອງຜູ້ກ່ຽວ ກັບພວກຜູ້ຕາງໜ້າຂອງສານອາຍານາໆຊາດ. ທ່ານ Mahmoud Shamman ລັດຖະມົນຕີຖະແຫລງຂ່າວລີເບຍກ່າວຕໍ່ອົງການຂ່າວ AP ວ່າ ລັດຖະບານບໍ່ມີຄວາມຂັດຂ້ອງໃດໆຕໍ່ການກັກຂັງ ນາຍ Seif al-Islam ໄວ້ໃນເມືອງ Zintan ຈົນກວ່າຈະສາມາດຈັດແຈງກັນເລື້ອງການດໍາເນີນຄະດີຜູ້ກ່ຽວໄດ້ນັ້ນ.
ພວກສະມາຊິກກອງທະຫານບ້ານເມືອງ Zintan ໄດ້ເຜີຍແຜ່ພາບວີດີໂອຂອງນາຍ Seif al-Islam ທາງ YouTube ໃນວັນອາທິດວານນີ້ ຊຶ່ງຢູ່ໃນວີດີໂອນັ້ນ ນາຍ Seif al-Islam ທີ່ມີໜວດເຄົາດົກໜາ ແລະໃສ່ເສື້ອຄຸມສີນໍ້າຕານ ກ່າວວ່າ ຕົນກໍາລັງໄດ້ຮັບການປິ່ນປົວບາດແຜເລັກນ້ອຍທີ່ໄດ້ຮັບຈາກການໂຈມຕີທາງອາກາດຂອງກຸ່ມເນໂຕ້ຫວ່າງໄວໆມານີ້ ທີ່ເມືອງ Zintan ແລະເອີ້ນພວກທີ່ຈັບກຸມຕົນວ່າ ອ້າຍນ້ອງແລະຄອບຄົວ.
ພວກນັກລົບເມືອງ Zintan ຈັບນາຍ Seif al-Islam ໄດ້ໃນວັນເສົາຜ່ານມານີ້ ໃນເຂດທະເລຊາຍໃນພາກໃຕ້ຂອງລີເບຍ ໃນຂະນະທີ່ຜູ້ກ່ຽວກໍາລັງພະຍາຍາມຫລົບໜີຈາກປະເທດກັບເພື່ອນຮ່ວມງານຫລາຍຄົນ. ພວກເຂົາເຈົ້າໄດ້ສົ່ງໂຕນາຍ Seif al-Islam ໄປຍັງບ່ານເກີດເມືອງນອນຂອງເຂົາເຈົ້າໃນເວລາຕໍ່ມາ.
