ພວກເຫັນເຫດການແລະໂຄສົກຝ່າຍຄ້ານພາກັນກ່າວວ່າ ກໍາລັງຂອງລີ ເບຍໄດ້ເປີດສາກທໍາການໂຈມຕີບັ້ນໃໝ່ອີກ ຕໍ່ເມືອງ Misrata ທາງພາກຕາເວັນຕົກຂອງປະເທດ.
ພວກເຫັນເຫດການເວົ້າວ່າ ພວກລົດຖັງຢູ່ທາງກໍ້າຕາເວັນຕົກຂອງເມືອງທີ່ຖືກປິດລ້ອມນັ້ນ ໄດ້ລະດົມຍິງໃສ່ເມືອງດັງກ່າວອີກໃນວັນຈັນມື້ນີ້ ຫລັງຈາກທີ່ກໍາລັງຂອງລີເບຍໄດ້ໂຈມຕີເຂດທ່າເຮືອທີ່ຖືກໂຈມຕີມາຫລາຍຄັ້ງແລ້ວນັ້ນ ໃນວັນອາທິດວານນີ້ ໃນຂະນະທີ່ກໍາລັງມີການຂົນ ອາຫານແລະສໍາພາລະທາງການແພດລົງຈາກກໍາປັ່ນຊ່ວຍເຫລືອ
ຈາກເກາະ Malta ລໍານຶ່ງ ສົ່ງຜົນໃຫ້ເຮືອລໍານັ້ນຕ້ອງເຄື່ອນອອກໄປຍັງທະເລໂດຍໄວ.
ໃນມື້ວານນີ້ເຊ່ນກັນ ສະຖານທູດອັງກິດແລະອີຕາລີໃນນະຄອນຫລວງ ຕຣີໂປລີຂອງລີເບຍ ກໍໄດ້ຖືກໂຈມຕີໃນອັນທີ່ແລເຫັນໄດ້ວ່າເປັນການຕອບໂຕ້ແກ້ແຄ້ນຄືນຕໍ່ການຍິງລູກສອນໄຟໂຈມຕີຂອງກຸ່ມເນໂຕ້ ທີ່ກ່າວກັນວ່າ ໄດ້ສັງຫານລູກຊາຍຄົນນຶ່ງແລະຫລານນ້ອຍ 3 ຄົນຂອງທ່ານກາດດາຟີ ຜູ້ນໍາລີເບຍນັ້ນ. ຄວາມວຸ້ນວາຍດັ່ງກ່າວໄດ້ກະຕຸ້ນໃຫ້ສະຫະປະຊາຊາດ ຖອນພວກພະນັກງານນາໆຊາດຂອງຕົນອອກຈາກກຸງຕຣີໂປລີ.
ທ່ານ William Hague ລັດຖະມົນຕີການຕ່າງປະເທດອັງກິດ ໄດ້ ກ່າວປະນາມການໂຈມຕີພວກສະຖານທູດ ຊຶ່ງໄດ້ເຮັດໃຫ້ສະຖານທູດຂອງອັງກິດຖືກໄຟໄໝ້ຢ່າງຮ້າຍແຮງນັ້ນ. ທ່ານ Hague ກ່າວວ່າ ການໂຈມຕີສະຖານທູດ ແມ່ນລະເມີດຕໍ່ສົນທິສັນຍາ Vienna ແລະທ່ານກ່າວຕື່ມວ່າ ລັດຖະບານຂອງທ່ານໄດ້ເນລະເທດເອກອັກຄະລັດຖະທູດລີເບຍປະຈໍາອັງກິດ.
ອີຕາລີຢືນຢັນວ່າສະຖານທູດຂອງຕົນແມ່ນນຶ່ງໃນຫລາຍໆສະຖານທູດໃນກຸງຕຣີໂປລີ ທີ່ໄດ້ຮັບຄວາມເສຍຫາຍຈາກການທໍາລາຍໂຈມຕີແລະ ກ່າວຫາລັດຖະບານທ່ານກາດດາຟີວ່າ ບໍ່ໄດ້ເອົາມາດຕະການເພື່ອປົກປ້ອງພວກສະຖານທູດຕ່າງປະເທດ.
ພວກປະເທດຝ່າຍຕາເວັນຕົກສ່ວນຫລາຍໄດ້ອັດສະຖານທູດຂອງຕົນໃນກຸງຕຣີໂປລີ ແລະອົບພະຍົບພວກພະນັກງານຂອງພວກຕົນອອກໄປກ່ອນການເຂົ້າແຊກແຊງທາງທະຫານຂອງກຸ່ມເນໂຕ້ເລີ້ມຂຶ້ນ ເມື່ອຫລາຍສັບປະດາຜ່ານມາ.
