ພວກນັກຕໍ່ສູ້ຂອງລັດຖະບານຊົ່ວຄາວຂອງລີເບຍ ຫລາຍຮ້ອຍຄົນ ໄດ້ເປີດສາກທໍາ
ການໂຈມຕີຕໍ່ເມືອງ Sirte ແຄມທະເລ ນຶ່ງມື້ຫລັງຈາກທີ່ກ່າວວ່າ ພວກເຂົາເຈົ້າໄດ້
ເຂົ້າຍຶດເອົາເມືອງ Bani Walid ຊຶ່ງເປັນທີ່ໝັ້ນສຸດທ້າຍອີກແຫ່ງດຽວ ຂອງພວກທີ່
ຈົງຮັກພັກດີຕໍ່ອະດີດຜູ້ນໍາ Moammar Gadhafi.
ພວກນັກລົບທີ່ນິຍົມກາດດາຟີ ໄດ້ຖືກຕ້ອນເຂົ້າໄປຢູ່ໃນເຂດນ້ອຍໆເຂດນຶ່ງຂອງເມືອງ
Sirte ທີ່ກໍາລັງຂອງສະພາປົກຄອງໄລຍະຂ້າມຜ່ານແຫ່ງຊາດ ຫລື NTC ພະຍາຍາມ
ເຂົ້າຍຶດເອົາ ມາໄດ້ຫລາຍອາທິດແລ້ວ. ພວກເຈົ້າໜ້າທີ່ NTC ໄດ້ກ່າວວ່າ ການຍຶດ
ເອົາເມືອງບ້ານເກີດຂອງກາດດາຟີໄດ້ ແມ່ນຈະອໍານວຍໃຫ້ເຂົາເຈົ້າສາມາດປະກາດ
ໄດ້ວ່າ ພວກເຂົາເຈົ້າໄດ້ປົດປ່ອຍລີເບຍແລ້ວ.
ໃນວັນຈັນວານນີ້ ເຈົ້າໜ້າທີ່ຂອງສະພາປົກຄອງໄລຍະຂ້າມຜ່ານແຫ່ງຊາດລີເບຍ
ກ່າວວ່າ ເມືອງທະເລຊາຍ Bani Walid ແມ່ນປອດຈາກພວກນັກລົບ ຂອງກາດ
ດາຟີຢ່າງສິ້ນເຊີງແລ້ວ. ກອງກໍາລັງຂອງລັດຖະບານຊົ່ວຄາວລີເບຍໄດ້ທໍາການ
ບຸກໂຈມຕີບັ້ນໃໝ່ ໃນວັນອາທິດຜ່ານມານີ້ ຕໍ່ເມືອງ Bani Walid ຊຶ່ງຫ່າງຈາກ
ນະຄອນຫຼວງ Tripoli ໄປທາງທິດຕາເວັນອອກສຽງໃຕ້ ປະມານ 170 ກິໂລແມັດ.
