ຫົວໜ້າລັດຖະບານຊົ່ວຄາວຂອງລີເບຍ ກ່າວວ່າ ທ່ານຄາດວ່າ ທີ່ໝັ້ນສຸດທ້າຍ
ທັງຫລາຍຂອງພວກທີ່ຈົງຮັກພັກດີຕໍ່ອະດີດຜູ້ນໍາ Moammar Gadhafi ຈະ
ຕົກ ພາຍໃນອາທິດນີ້ ໃນຂະນະທີ່ການປະທະກັນຍັງດໍາເນີນສືບຕໍ່ມາຢູ່ໃນເມືອງ
ເຊີຕ (Sirte) ບ້ານເກີດຂອງ Gadhafi ນັ້ນ.
ປະທານຂອງສະພາປົກຄອງໄລຍະຂ້າມຜ່ານແຫ່ງຊາດຂອງລິເບຍ ຫລື NTC
ທ່ານ Mustafa Abdel Jalil ໄດ້ກ່າວໃນວັນອາທິດນີ້ວ່າ ກອງກໍາລັງຂອ ຝ່າຍ
ຕໍ່ຕ້ານ Gadhafi ໄດ້ທໍາຄວາມກ້າວໜ້າຢ່າງຫລວງຫລາຍໃນເຂດເມືອງ Sirte
ແລະເມືອງ Bani Walid ທາງກໍ້າຕາເວັນຕົກສຽງໃຕ້ຂອງນະຄອນຫຼວງຂອງ
ປະເທດ.
ໃນເມືອງ Sirte ນັ້ນ ພວກຕໍ່ສູ້ຂອງ NTC ກ່າວວ່າ ພວກເຂົາເຈົ້າໄດ້ຍຶດເອົາ
ຫລາຍໆຕຶກຂອງສູນກາງປະຊຸມ ບ່ອນທີ່ພວກທີ່ຈົງຮັກພັກດີຕໍ່ Gadhafi
ໄດ້ໃຊ້ໃນຖານປະຕິບັດງານນັ້ນ. ພວກເຂົາເຈົ້າຍັງກ່າວອ້າງອີກວ່າ ເຂົາເຈົ້າ
ໄດ້ຍຶດເອົາໂຮງພະຍາບານແລະມະຫາວິທະຍາໄລຂອງເມືອງນໍາ ຫຼັງຈາກທີ່
ໄດ້ເປີດສາກທໍາການໂຈມຕີຕໍ່ເມືອງ Sirte ໃນວັນສຸກທີ່ຜ່ານມານີ້.
ມີນັກຕໍ່ສູ້ຂອງພວກ NTC 30 ກວ່າຄົນໄດ້ຖືກສັງຫານ ໃນການສູ້ລົບກັນເປັນ
ເວລາ 3 ມື້ນັ້ນ ແລະຫລາຍກວ່າ 400 ຄົນ ໄດ້ຮັບບາດເຈັບ. ແຕ່ບໍ່ຮູ້ຈໍານວນ
ພວກບາດເຈັບລົ້ມຕາຍຂອງຝ່າຍກາດດາຟີ.
ເຈົ້າໜ້າທີ່ຂອງ NTC ກ່າວວ່າ ການໄດ້ເຂົ້າຍຶດຄອງເມືອງ Sirte ນັ້ນຈະອໍານວຍ
ໃຫ້ເຂົາເຈົ້າ ສາມາດປະກາດເຖິງການປົດປ່ອຍປະເທດໄດ້ ເພາະນັ້ນໝາຍເຖິງວ່າ
ທາງລັດຖະບານຊົ່ວຄາວ ໄດ້ຄອບຄອງທ່າເຮືອແລະອ່າວທຸກແຫ່ງ ຂອງປະເທດ
ທັງໝົດແລ້ວ.
