ຫົວໜ້າລັດຖະບານຊົ່ວຄາວຂອງລີເບຍໄດ້ຮຽກຮ້ອງໃຫ້ພວກສະໜັບສະໜຸນທີ່ຮ້ອງເຊຍ
ລັດຖະບານຫຼາຍພັນຄົນໃນນະຄອນຫລວງຕຣີໂປລີໃນແລງວັນຈັນວານນີ້ ໃຫ້ສະໜັບ
ສະໜຸນລັດທີ່ປົກຄອງໂດຍພົນລະເຮືອນແລະປະຊາທິປະໄຕທີ່ນັບຖືສາສະໜາອິສລາມ
ແລະເຄົາລົບນັບຖືຕໍ່ການປົກຄອງດ້ວຍຕົວບົດກົດໝາຍ.
ທ່ານ Mustafa Abdel Jalil ປະທານສະພາປົກຄອງໄລຍະຂ້າມຜ່ານແຫ່ງຊາດ ກ່າວ
ວ່າລັດຖະບານຊົ່ວຄາວຂອງທ່ານພະຍາຍາມຊອກຫາສ້າງຕັ້ງລັດຫລືປະເທດບ່ອນທີ່ກົດ
ສາສະໜາອິສລາມເປັນພື້ນຖານຂອງການອອກກົດໝາຍ ແຕ່ປະຕິເສດຕໍ່ຫລັກອຸດົມ
ການທີ່ຮຸນແຮງ ອຽງໄປທາງຂວາຫລືທາງຊ້າຍສຸດນັ້ນ.
ທ່ານ Jalil ເດີນທາງໄປຮອດກຸງຕຣີໂປລີໃນວັນເສົາຜ່ານມາ ເປັນເທື່ອທໍາອິດນັບແຕ່
ພວກພັນທະມິດຂອງທ່ານໄດ້ຂັບໄລ່ທ່ານມວມມາກາດດາຟີ ອະດີດຜູ້ນໍາລີເບຍອອກ
ຈາກເມືອງໄປ. ທ່ານ Jalil ໄດ້ກ່າວເຊ່ນນີ້ຕໍ່ຝຸງຊົນທີ່ຟົດຟື້ນຢູ່ຈັດຕຸລັດ Martyr ຊຶ່ງ
ເປັນບ່ອນໂຮມຊຸມນຸມປະທ້ວງພວກນິຍົມກາດດາຟີຈົນຮອດໃນຫວ່າງບໍ່ດົນຜ່ານມານີ້.
ທ່ານ Jalil ໄດ້ເປັນຜູ້ປົກຄອງລັດຖະບານຊົ່ວຄາວມາໃນເມືອງ Benghazi ໃນພາກ
ຕາເວັນອອກຂອງປະເທດ ຊຶ່ງເປັນບ່ອນກຳເນີດໃນການລຸກຮືຂຶ້ນທີ່ໄດ້ໂຄ່ນລົ້ມທ່ານ
ກາດດາຟີອອກຈາກອໍານາດໄປໃນເດືອນແລ້ວນັ້ນ.
ທ່ານ Jalil ຍັງໄດ້ຮຽກຮ້ອງປະຊາຊົນລີເບຍ ໃຫ້ຫລີກລ່ຽງການໂຈມຕີແກ້ແຄ້ນຕໍ່
ພວກນິຍົມກາດດາຟີທີ່ກໍາລັງລີ້ຊ່ອນຢູ່ນັ້ນເຊ່ນກັນ ໂດຍກ່າວວ່າລະບົບຕຸລາການ
ຂອງລີເບຍຄວນຈະເປັນສິ່ງດຽວທີ່ຄວບຄຸມຄວາມເປັນທໍາສໍາລັບພວກທີ່ເຂັ່ນຂ້າປະ
ຊາຊົນລີເບຍນັ້ນ.
ໃນລາຍງານສະບັບນຶ່ງທີ່ເປີດເຜີຍໃຫ້ຊາບໃນວັນອັງຄານມື້ນີ້ ອົງການນີລະໂທດກໍາ
ສາກົນກ່າວວ່າ ທັງສອງຝ່າຍທີ່ເປັນຄູ່ປໍລະປັກກັນຕ່າງກໍໄດ້ກໍ່ອາຊະຍາກໍາສົງຄາມຂຶ້ນ
ໃນລະຫວ່າງສົງຄາມກາງເມືອງເປັນເວລາ 6 ເດືອນນັ້ນ. ລາຍງານສະບັບນີ້ສ່ວນໃຫຍ່
ແລ້ວ ໄດ້ໃຫ້ລາຍລະອຽດກ່ຽວກັບອາຊະຍາກໍາຕໍ່ພວກພົນລະເຮືອນທີ່ກໍ່ຂຶ້ນໂດຍພວກ
ທີ່ຈົງຮັກພັກດີຕໍ່ທ່ານກາດດາຟີນັ້ນ ແຕ່ໃນຂະນະດຽວກັນ ກໍໄດ້ເກັບກໍາເອກະສານ
ກ່ຽວກັບການແກ້ແຄ້ນທີ່ໂຫດຫ້ຽມທີ່ກໍ່ຂຶ້ນໂດຍພວກກໍາລັງຂອງອໍານາດປົກຄອງຊົ່ວ
ຄາວບາງຄົນ ເວລາພວກນັກຕໍ່ສູ້ທີ່ຈົງຮັກພັກດີຖືກຂັບໄລ່ອອກຈາກພາກຕາເວັນອອກ
ຂອງລີເບຍໄປນັ້ນ.
