ລັດຖະບານລີເບຍປະຕິເສດ ຕໍ່ການກ່າວອ້າງຂອງພວກກະບົດທີ່ວ່າ ພວກນັກລົບຝ່າຍ
ຄ້ານໄດ້ຍຶດຄອງເມືອງ Zlitan ທາງພາກຕາເວັນຕົກ ຂອງປະເທດໄດ້ແລ້ວນັ້ນ.
ໂຄສົກຄົນນຶ່ງຂອງຜູ້ນໍາລີເບຍ ມວມມາ ກາດດາຟີ ກ່າວເມື່ອວັນພຸດວານນີ້ວ່າ ເມືອງ
Zlitan ຍັງຢູ່ໃນການຄອບຄອງໂດຍເຕັມຂອງລັດຖະບານນັ້ນຢູ່
ກໍາລັງສະໜັບສະໜຸນລັດຖະບານ ແລະກໍາລັງພວກກະບົດໄດ້ສູ້ລົບກັນ ຫລາຍໆບັ້ນ
ໃກ້ເມືອງ Zlitan ໃນບໍ່ເທົ່າໃດມື້ຜ່ານມານີ້. ພວກກະບົດ ໄດ້ພະຍາຍາມຕີເອົາພື້ນທີ່
ເພີ່ມຕື່ມ ຈາກບໍລິເວນອ້ອມແອ້ມຕົວເມືອງດັ່ງກ່າວ ທີ່ພວກເຂົາເຈົ້າຕີໄດ້ເມື່ອໄວໆມານີ້.
ເມື່ອວັນອັງຄານທີ່ຜ່ານມານີ້ ພວກກະລົດ ແລະພວກເຈົ້າໜ້າທີ່ການແພດ ກ່າວວ່າ
ການໂຈມຕີໂຕ້ຕອບຄືນໂດຍກໍາລັງຂອງກາດດາຟີ ໄດ້ສັງຫານ ພວກນັກລົບຝ່າຍ
ຄ້ານຢ່າງໜ້ອຍເຈັດຄົນ ແລະໄດ້ຮັບບາດເຈັບອີກ ຢ່າງໜ້ອຍ 30 ຄົນ.
ໃນຂະນະດຽວກັນ ກຸ່ມສື່ມວນຊົນຂອງລະຫວ່າງຊາດໄດ້ປະນາມການ ໂຈມຕີທາງ
ອາກາດຂອງກຸ່ມເນໂຕ້ ຕໍ່ສະຖານີໂທລະພາບລີເບຍແຫ່ງນຶ່ງ. ໃນຖະແຫລງການ
ສະບັບນຶ່ງເມື່ອວັນພຸດວານນີ້ ສະຫະພັນພວກນັກຂ່າວ ນາໆຊາດກ່າວວ່າ ການຖິ້ມ
ລະເບີດຂອງຝ່າຍພັນທະມິດ ຖືວ່າເປັນການຝ່າຝືນກົດໝາຍສາກົນ ເພາະເປັນໄພ
ຂົ່ມຂູ່ຕໍ່ຊີວິດຂອງພວກນັກຂ່າວ.
ເມື່ອວັນເສົາຜ່ານມານີ້ ລັດຖະບານລີເບຍກ່າວວ່າ ນັກຂ່າວສາມຄົນເສຍຊີວິດ ຍ້ອນ
ການໂຈມຕີທາງອາກາດຂອງກຸ່ມເນໂຕ້ ຕໍ່ສະຖານີໂທລະພາບຂອງລັດ ໃນນະຄອນ
ຫລວງ Tripoli. ຝ່າຍເນໂຕ້ກ່າວວ່າ ຕົນໄດ້ຖິ້ມລະເບີດໃສ່ຈານດາວທຽມສາມແຫ່ງ
ໃນນະຄອນຫລວງທຣິໂປລີ ເພື່ອພະຍາຍາມຂັດຂວາງບໍ່ໃຫ້ ທ່ານກາດດາຟີ ໄດ້ໃຊ້
ການສື່ສານທາງໂທລະພາບ ເພື່ອປາບປາມແລະນາບຂູ່ປະຊາຊົນລີເບຍນັ້ນ.